2 TESALONIKA 1

1Sibara kai Paulus, Silwanus samba Timoteus, masiailiake paamian Tesalonika sikuddu ka bagat Taikamanua Ukkuita samba Tuhan Yesus Kristus. 2Kiliu baga samba aban le ka kam sibara ka Taikamanua Ukkui samba Tuhan Yesus Kristus. 3Bulat mateu le kusuraki kai simariuriu Taikamanua kalulut kam, sasaraina. Imateteu ia te kalulut tonem bagamui memei iuurau samba nuntut bagamui ka pasasambamui memei itutuppai, 4bailiu tubumai leu masiumunake kam ka paamian Taikamanua kalulut om bagamui samba tonem bagamui ka bagat sangamberi katukukuratmui samba paoreat siorikmui. 5Ia te toggaiat roiponia ukuman Taikamanua, masipatoila mateuan kam bailiu tatogat Purimataat Taikamanua, kalulunia poi anupasiorik kam. 6Aipoi maroipo le Taikamanua masisiliake paoreat ka sia sipaoreji kam 7samba masiake puaroiat ka kam pinaoreda samba leu kai, ka teteret ipatoila tubunia Tuhan Yesus barania ka sorga sambada samalaika ka bagat gegenia, ka bagat api sipujujuluu, 8samba masiukumake sia sitaioba masiagai Taikamanua samba sitaireddet Katuareman Simaeru sibara kai Tuhan Yesus. 9Orikrangan leu ukuman pulangokat sitaitatata, tuareu ka matat Tuhan samba tuareu ka pulatsanan pubeunanannia, 10ke moi nia ka gogoi nenda ralatsatnake nia sia sipunenannia samba rakiseiake nia sangamberi simatonem baga, aipoi simunengakenenmai ka kam anukatonemingan kam. 11Ia te imaririuriu kutiddouake kai kam, bule iaddeake kam Taikamanuanta mateu ka pasogaiatnia samba ka gegenia isutnake puoobamui masigalai galajet simaeru samba galajet tonem bagamui, 12bule itulatsatnake onin Tuhanta Yesus ka bagamui, samba kam ka bagania, siripot kiliu bagat Taikamanuanta samba Tuhan Yesus Kristus.

will be added

X\