2 PETRUS 3

1Sasaraina kilibet bagaku, surat nene ia te surat sikaruania sinuratnakenenku ka kam. Ka bagat ruania surat nene kubesiake masisuruake paatuatmui simalina, 2kutubbui kam nurepdep kam tiboietda tai nabi sipunenan siburu samba masiparepdep patonekat Tuhan Sipaarau, sinegeakenenda tai apostelmui ka kam. 3Agaietmui siboiki ia te ka gogoi kalepakat momoi te sipagegegei masiake pagegeiatda, ia te sipasitututnake pubotbonanda. 4Kuarangan, "Kaipangan ne palelengan pagalaiat kaoijanannia? Aipoi barania aratata taikebbukatta, sangamberinia kele ka panandaat aitubaraake polak leu et." 5Rapali ta roba masiagai, manua samba polak abarangan barania ka siburu, kalulut tiboiet Taikamanua; samba polak sibara ka oinan samba kalulut oinan, 6samba kalulut oinan leu polak siburu amasubungan aitalu nia eba sabeu. 7Tapoi manua samba polak kineneiget, tiboiet Taikamanua leu et ipasikeli nia, itukoiri teret itulaboake ka gogoi pasiukuman samba pasisubuatda sirimanua sitaimareddet ka Taikamanua. 8Tapoi nene sara bui nukalipogi kam nia, sasaraina kilibet baga: Sangagogoi kai Tuhan kele saribu ngarura, samba saribu ngarura kele sangagogoi. 9Ta ipauuju si Tuhan masigalaiake sikuania ka palelengannia kele pinaatuda sabagei; om bagania le ka kam, ta ioba ibara simalilimai, tapoi bule sangamberi le masibauake paatuat. 10Gogoi Tuhan geti kele sipananangkou le ioi. Ka gogoi nenda ukku manua ituapuru, samba sangamberi sibabara ka polak ragget iraggetnake nia api, polak nene samba sangamberi sibabara ka bagania pipi. 11Oto ke iaanau le sangamberinia nene kele kise, buita memei malina samba matopit nupuparaboat kam, 12ka bagat ai kam masingengena samba masiola kaoijanan gogoi Taikamanua. Ka gogoi nenda manua sappuru ilabo nia api samba sangamberi sibabara ka bagat polak anau kalulut juluunia. 13Tapoi siripot palelengan Taikamanua tangenaake le kam manua sibau samba polak sibau, kudduat puroipoat. 14Oto sasaraina kilibet baga, ka bagat ai kam masingengena sangamberinia nene, kau nubesiake kam bule si ta loloiet samba si ta lolit kam ka matat Taikamanua; samba ai kam paaban ka tubunia. 15Samba om bagat Tuhanta addeake le kam oggak ibara puaragatmui, kele sinuratnakenen Paulus leu ka kam, sarainanta kilibet baga, siripot sikut paatuat sipanguruatnakenen Taikamanua ka tubunia. 16Ka sangamberi suratnia sarat itiboi pagalaiat sangamberi nene. Kirenangan ka bagat suratnia ai simabesi tuagai, bailiu sitaiagai nia samba sitaimaron tonem baga, rapabailok le, kele sigalaiakenenda ka surat bagei, bailiu kalangokatda ka sia. 17Tapoi kam geti sasaraina kilibet baga, anuagaian kam sangamberinia nene. Oto pagaba kam, bui rapagirit kam ka bagat kapepeatda sitaiagai surukat, samba tujulut kam ka kudduatmui sipulelelek. 18Kau le nupuurau kam ka bagat kiliu baga samba ka bagat pasiaagai Tuhan samba Sipaarau sita, Yesus Kristus. Ka tubunia le pulatsanan, kineneiget samba teret buruburu.

will be added

X\