2 PETRUS 2

1Siburu amuottou tai nabi sipatataju ka talagat bangsat Taikamanua. Kisedda leu ka talagamui momoi te tai guru sipatataju, siguruake nganturat pasipepe sibaraake kalimaiat, samba Tuhan sipanebui sia raputata; kisedda te imaola rabaraake ka tubuda pulangokat. 2Maigi sia sipasitututnake pubotbonanda sikatai, samba kalulut sia bailiu tupaloloi enungan pubulanan. 3Samba kalulut alau bagada tai guru sipatataju tiboirangan pumumuan pinabara ka kam masigaba uktukda. Tapoi ukuman ka tubuda amaujungan aimatarek samba kasubuatda taan tupabuburu. 4Aipoi beringan samalaika sigalai jo, ta aiinou sia Taikamanua, tapoi airibbaiake le sia ka guluggu simagepgep, masikoiriake sia teret iaili gogoi pasiukuman; 5samba polak siburu ta aiinou Taikamanua, sarat si Noak le singantomanake puroipoat aipasikeli samba pitu sia sabagei, ka teteret aibaraake eba sabeu sitalu taikapolak sitaimareddet ka Taikamanua. 6Samba laggai Sodom samba Gomora aisubuake Taikamanua labo anau masiukumake sia samba masibailiuake repdemen ka sia sitaimareddet ka Taikamanua ka tetere sibabara; 7tapoi aibelaake le si Lot sirimanua simaroipo, sipasioorik gejat baga kalulut paraboatda sitaiagai surukat, situtnake pubotbonanda le; 8aipoi si Lot nene ka talagada le aikuddu samba senen gogoi iitco samba iarep sigalaira sikatai, bailiu ketsatnia simaroipo nene masiorik. 9Oto iagai si Tuhan masibelaake sia simatopit ka pasisiboat samba iagai masikoiriake sia sirimanua sikatai iukumake sia ka gogoi pasiukuman, 10sara pei sia situtnake pubotbonan akkula sipalolit tubuda sipuarak paneineiat Taikamanua. Kopet emenda samba buak paatuatda tai guru sipatataju nene pat ta magila sia masipaloloi siputubu simalatsat ka sorga. 11Beringan samalaika, kenanen sia pei le maron samba magege ka sia, ta ratiboake nganga paloloiat ke ranganduake sia ka matat Tuhan. 12Sia geti, samba le kele tarimeu si ta paatuat, kele tarimeu labaket samba mateiakenen le arabara; rapaloloi sitaiaagaietda, bailiu sia ilango kele tarimeu simasakbak kalulut katai sigalaira, 13orikrangan geti paoreat silit katai sigalaira. Musiobat tubu sinago, ia te addeakenenda pusanangan. Sikau puailaat samba paloloiat le sia rapupuineng ka bagat pubotbonanda, ke ai sia sambamui ka punen. 14Matada sun paelenan samba ta sesege bagada mujo. Ragalai paalakat baga ka simagulai paatuat. Paatuatda araubuian mualau baga. Sirimanua teleiet le sia! 15Kalulut rakaddiuake enungan simaroipo, mapeperangan, tutnakerangan si Bileam, togat Beor, sioba masisilo upa ka pasigagalai sikatai. 16Tapoi iorak le si Bileam asekat simapali kalulut jonia, kalulut kalidei sitaiagai manibo bailiu manibo kele ngangan sirimanua masikera purorokat nabi Bileam. 17Tai guru sipatataju nene kele bubuakat simagarak le sia, kele tanairusa siboroiat talabari; ka sia amatarekngan kudduat ka bagat pugepgeman simakope gepgep. 18Kalulut ratiboake tiboiet pubuangan tubu samba si ta baga, samba rapakei pubotbonanda sikatai masikau paalakat bagada sirimanua simaruei pei le arabela ka mungkuatda simapepepe. 19Rakau palelengan puujaat ka sirimanua, beringan tubuda ai le ka bagat pupagugulenan pulangokat, aipoi kasei sikalaakenen, pagugulet sipasikakalaake nia le nia. 20Aipoi ke arakatsiliakean tubuda ka pulolinan polak nene kalulut pasiaagaira si Tuhan samba Sipaarau sita Yesus Kristus, tapoi lepa junung sia minca ka bagania, bailiu makope katai kalepakatnia ka sia, bele pei ka panandaatnia. 21Aipoi makaeru pei le ka sia kirenangan ta raagai enungan puroipoat bele pei raagai nia, tapoi lepa kaddiuakerangan surukat sipunenan sinegeakenen ka tubuda. 22Amuailingan tebai ka tubuda bulatnia sikuat pasikat, "Ikom le minca jojo geleknia," samba "Sakkoilo silelepa murau, mulebbu minca ka lotte."

will be added

X\