2 YOHANNES 1

1Sibara kaku paneinei paamian, masiailiake Ina sipilit Taikamanua samba tatogania bulat kanuntuat bagaku. Ta sarat aku masipununtuki kam baga, tapoi samba leu sangamberi sipasiaagai pubulanan, 2kalulut pubulanan sikuddu ka bagata, samba sipaalei sita teret buruburu. 3Kiliu baga, anggai baga samba aban sibara ka Taikamanua Ukkui samba sibara ka Yesus Kristus, Togat Ukkui, masipaalei sita ka bagat pubulanan samba nuntut baga. 4Bulat magora bagaku akuagai kababarada piga pa tatogam siparaboatnake pubulanan siripot surukat sinilota sibara ka Ukkui. 5Kineneiget kutiddou kekeu Ina, bule panuntu sita baga; ta parenta kusuratnake nene kekeu, tapoi siripot surukat sibabara ka sita ka panandaatnia. 6Samba nene le nuntut baga, ia te bule murimanua sita siripot surukat Taikamanua. Samba surukat siarepmui ka panandaatnia ia te buita murimanua kam ka bagat nuntut baga. 7Aipoi amaigingan sipasipepe muottou ka polak nene, sitaimunengake kaooi Yesus Kristus ka bagat pusirimanuaat. Sirimanua nene sipasipepe le samba saggak Kristus. 8Pagaba kam, bui imalimai ka kam sigalaimai, tapoi bule nusilo kam upamui simasun. 9Senen sirimanua sitaikuddu ka bagat nganturat Kristus, tapoi masipasabau le, ta ibabakkati Taikamanua. Sipukukuddu ka bagat nganturat Kristus geti, ia te masibabakkati Ukkui samba Toga. 10Ke moi kasei pa ka kam sitaiambit nganturat nene, bui nusilo kam nia ka lalepmui samba bui nusalam kam nia. 11Aipoi kasei sipasisasalam nia, aitutnakean galajet sirimanua nenda sikatai. 12Maigi pei leu kuanenku ka kam, tapoi taan kususuratnake nia ka karate samba tinta, tapoi kukaroni bule tubuku le moi ka kam, samba patibo sipatutuggut mata, bule imasun angkat bagata. 13Salam kekeu sibara ka tatogat sarainam sipilit Taikamanua.

will be added

X\