2 KORINTUS 8

1Sasaraina, koba kusegeake kai ka kam pagalaiat kiliu bagat Taikamanua ka sapaamian ka Makedonia. 2Talagat ai sia ka bagat pasisiboat gejat baga sabeu, kalulut sun angkat bagada, kenanen bulat mageba sia, tapoi makayo sia ka puaanggai. 3Kumunengake nia ka matamui, bulat teret sibabara ka tubuda arakau; momoi takua, saliu pei le siripot sibabara ka tubuda. Sibara ka teu bagada, 4tiddourangan simanana ka kai, bule tuobaake leu sia masitut masikau paroman ka sia sipunenan. 5Saliu pei le ka sikaronimai araake, tubuda le arasegeake, boiki kai Tuhan, lepa ka kai leu, kalulut teu bagat Taikamanua. 6Ia te lulunia kutubbui kai si Titus bule ikappuluake ka talagamui pasikelat nuntut baga nenda, kele sitaddaakenennia siburu. 7Oto kineneiget, kele kayomui ka bagat sangamberinia, -- ka putotonem baga, ka titiboat, ka puaagai, ukumui ka sangamberi galajet, punununtut bagamui ka tubumai -- bule kisedda leu et kayomui ka pasikelat nuntut baga nene. 8Ta leu kele parenta kukua nia, tapoi masipatoila ukura sabagei masirom le, samba masisibo linania nuntut bagamui. 9Aipoi anuagaian kam kiliu bagat Tuhanta Yesus Kristus, kenanen simakayo nia, ipageba le tubunia kalulut kam, bule numakayo kam kalulut gebania. 10Siripot pinaatuku ka pagalaiat nene, mateu le nulepaake kam nia. Kirenangan kam le amasitaddaake masigalaiake barania ka rura silelepa, samba nuteuake kam masilepaake nia. 11Oto kineneiget, riuriuake kam masilepaake; bule kele tarekmui masipaatu, kisedda leu masilepaake teret siooi ka tubumui. 12Aipoi ke aian obamui masikau, isisilo Taikamanua siripot sibabara ka kam nukau kam, ta siripot sitaibabara. 13Ta bule sabagei musanang, kam mugeja baga, bule imakere le. 14Ka tetere kineneiget sipulelegei ka kam masisutnake simagulai ka sia, bule sipulelegei ka sia geti masisutnake simagulai ka kam, bule imakere. 15Kele sitususurat ka Surat Sipunenan: "Siruruake simaigi, ta mulelegei, samba siruruake goiso, ta magugulai." 16Sura le ka Taikamanua, sipanguruatnake ngamang kele nene ka paatuat Titus kalulut kam. 17Kirenangan aisilo pananakatmai, tapoi bulat kopet ngamangnia le bagei sibara ka teu bagania moi masibalou kam. 18Tapoi masipaaleiake nia kukoiniake leu kai sarainanta simaeru katuareman ka sangamberi paamian, kalulut galajetnia ka bagat masipaarep Katuareman Simaeru. 19Samba ta sarat nenda. Rapili leu nia sapaamian masipaalei kai ka pasikelat nuntut baga nene, sigalaiakenenmai katulatsanan Tuhan samba masipatoila tarekmai masirom. 20Aipoi bulat kupasikeli le kai, bui bara kasei pa sijoake kai ka bagat pasikelatmai masisegeake paroman sabeu nene. 21Simaroipo le poi koba kugalai kai, ta sarat ka matat Tuhan, tapoi samba leu ka matat sirimanua. 22Samba masipaaleiake sia kukoiniake leu kai minca sara sarainanta; saraina nene mareireian kusibo kai nia, matoila ngamangnia masirom. Samba kineneiget memei itutuppai ngamangnia, lulut kopet tonem bagania ka tubumui. 23Si Titus, aleiku mugalai te nia masipasikeli kam; saalei sabagei ia te punu tubuda sapaamian samba katulatsanan Kristus. 24Oto pakoinong kam ka tubuda ka matat paamian nuntut bagamui samba uumunakeku kam.

will be added

X\