2 KORINTUS 7

1Oto sasaraina kilibet baga, atabakkatingan poi kineneiget palelengan nene, kauan tapalina kam tubuta ka sangamberi pulolinan tubu samba ketsat, samba ka bagat nene tasutnake pusisipunenanta ka bagat loto ka Taikamanua. 2Silo kam kai ka bagat paatuatmui! Ta anai akugalai kai sele ka kasei pa, ta anai beri sara akurugiake kai, samba ta anai akugaba kai uktuk ka tubut kasei pa. 3Ta masiseleake kam kukukua nene, aipoi akukuangan siboiki, ai le kam ka paatuatmai, alei matei samba murimanua. 4Bulat amaemengan aku manibo ka kam, maigi umunakenenku ka kam; ka bagat sangamberi pugejaat bagamai, sun le pusuibiat kaku, ta magulai angkat bagaku. 5Aipoi kele akusege kai ka Makedonia, ta anai puaroiat akkulamai; kaipa kaipa le kuorik kai gejat baga: sibara ka bebe pajoggolat, sibara ka baga loto. 6Tapoi Taikamanua sipusuibi simaepe paatuat, masipusuibi kai ka bagat kaooi Titus. 7Ta sarat lulut kaooinia, tapoi samba leu kalulut pusuibiat sisuibiakenenmui ka tubunia. Aisegeake poi ka matamai ngelei bagamui, sou bagamui, osamui masirom aku, kopekope ituppai angkat bagaku. 8Oto kenanen kureureuake bagamui ka suratku, ta leu iolei bagaku. Oo aiolei tedda bagaku, kalulut kuitco, surat nenda ikau kam mureureu baga -- kenanen ta leu mauju --, 9kineneiget maangka le bagaku, ta kalulut purereureumui baga, tapoi kalulut reureu bagamui masikau kam masibau paatuat. Aipoi reureu bagamui siripot siobat Taikamanua le; oto ta leu akurugiake kai kam beri goiso. 10Aipoi reureu baga siripot siobat Taikamanua, masibaraake katubaugat paatuat sipasikakau ka puaragat samba ta ioolei baga; tapoi reureu baga sibara ka polak masibaraake kamateiat. 11Itco pei kam kipa reureu baga siripot siobat Taikamanua nenda masibaraake ka kam: ngamang sabeu, pasiaalegimui tatat selemui, malaga bagamui ka jo, loto, ngelei baga, ukut baga, masiase simasele! Ka bagat sangamberinia nene anupatoilaan kam tatat selemui ka pagalaiat nenda. 12Oto kenanen kukoiniake surat ka kam, ta kalulut sigalai sele, ele ai sipasioorik kalulut galajet simasele, tapoi bule imatoila le ukumui ka tubumai ka matat Taikamanua. 13Kalulut nenda te tupusuibi kai. Ta sarat kalulut pusuibiat sinilomai, ituppai pei le kopenia angkat bagamai kalulut angkat bagat Titus, lulut sangamberimui masikulaake ketsatnia. 14Akuumunakean kam ka matania, samba ta anupakaila kam aku. Sangamberi sikuamai ka matamui sibulatnia le, kisedda leu pasiuumunmai kam ka matat Titus, sibulatnia le. 15Samba memei ituppai beunan nuntut bagania ka tubumui irepdep purereddetmui sangamberimui, samba sisilomui nia ka bagat loto samba geret tubu. 16Bulat maangka bagaku, aipoi momoian kukaroni kam ka bagat sangamberinia.

will be added

X\