2 KORINTUS 5

1Kuagai poi kai, ke turagat bai sapou kudduatta ka polak nene -- ia te tubuta -- aitarekngakean Taikamanua kudduat ka sita, lalep ta sigalai kabei sirimanua simatom ka sorga. 2Ujuta ka sapou nene poi, sarat muhoihoi le sita, lulut turepdep simakope masipakei kudduat ka sorga. 3Ke atupakeian bai nenda, taan mububulutut sita. 4Aipoi ujut ai pei le sita mukukuddu ka sapou nene, muhoihoi le sita, lulut sanenia bairanen. Ta kalulut obata bela ka putubuat polak nene, tapoi obata le masipakei putubuat sorga, bule tubuta simamateiet nenda iguk nia purimanuaiat. 5Tapoi Taikamanua le sipatarek sita ka pagalaiat nene samba masipanguruatnake ka sita Ketsat, kele panere ka sangamberi sinarekngakenen ka sita. 6Oto kalulut nene riuriu le ron paatuatmai, kenanen kuagai kai, ujut kukudduji kai tubu nene, areu kai kai Tuhan; 7aipoi puririmanuamai nene murimanua kalulut tonem baga le, ta kalulut pasiitco. 8Tapoi ron le paatuatmai, samba koba pei le kai bela ka tubu nene mei mukuddu kai Tuhan. 9Ia te kubebesiake kai, ele ai kai ka bagat tubu nene, ele bela ka bagania, bule ioba kai si Tuhan. 10Aipoi sangamberita buita murio ka matat uddenan pasiukuman Kristus, bule senen sirimanua masisilo siloketnia, siripot sigalaiakenennia ka putubuat, simaeru ele sikatai. 11Oto lulut agaimai loto kai Tuhan, ia te kunanana kai sirimanua. Ka matat Taikamanua geti matoila le kai, samba kukaroni bule ka bagat paatuatmui leu matoila kai. 12Ta kuooleake kai masiumunake tubumai ka matamui, masikau oggak le ka kam ituumun kam kalulut kai, bule ioi nualegi kam sia sioba masiumunake simatotoila ka uddut, tapoi ta ka paatuat. 13Ke aibailiuan bai kai kele taiagai paatuat, nenda kalulut Taikamanua; ele ke siagai paatuat bai kai, uktukmui te. 14Nuntut bagat Kristus le poi masipaneneinei kai, kalulut amakolouan ka kai ke amateian sara sirimanua punu tubut sangamberi, oto sangamberida amateian. 15Samba Kristus amateian punu tubut sangamberi, bule sia sipuririmanua taan murimanua ka tubuda, tapoi ka tubut simamatei samba sisuruakenen punu tubudangan le. 16Ia te lulunia taan kugagalai kai masiagai kasei pa siripot kirekat sirimanua. Ke siburu akugalai kai masiagai Kristus siripot kirekat sirimanua, kineneiget geti taan kisedda kugagalai kai. 17Oto ke kasei pa ka bagat Kristus, sibaraakenen sibau te nia; atusabauan siburu, sibauan le. 18Sangamberinia nene sibara ka Taikamanua le, siabanake sita ka tubunia kalulut Kristus samba isegeake ka sita galajet masipaarep paabanan nene. 19Ka bagat Kristus le poi aiabanake taikapolak ka tubunia Taikamanua; ta aiaddeake ka tubuda pinasabaura, samba aisegeakean ka kai galajet masipaarep paabanan nene. 20Oto punu tubut Kristus le kai, kele Taikamanuangan le masinanana kam ka ngangamai; ka onin Kristus kutiddou kai: oba kam ituabanake kam ka Taikamanua. 21Nia sitaiagai jo, aibailiuakean nia jo kalulut sita, bule ka bagat tubunia iparoipo sita Taikamanua.

will be added

X\