2 KORINTUS 1

1Sibara kai Paulus, sibailiu apostel Kristus Yesus ka teu bagat Taikamanua, samba sibara kai Timoteus sarainanta, masiailiake paamian Taikamanua ka Korintus samba sangamberi sipunenan ka sangalio Akhaya. 2Kiliu baga samba aban sibara ka Taikamanua Ukkuita samba kai Tuhan Yesus Kristus masipaalei kam. 3Tuumunake le Taikamanua, Ukkui Tuhanta Yesus Kristus, Ukkui sipulukatet baga samba Taikamanua bakkat sangamberi pusuibiat, 4sipusuibi kai ka bagat sangamberi pugejaat bagamai, pat oinangan kupusuibi kai sia, sipasioorik sene ngamata pugejaat baga kalulut pusuibiat sisuibiakenen Taikamanua ka kai. 5Aipoi kipa taimagulainia pangoringan Kristus ka tubumai, kisedda leu te taimagulainia kusilo kai pusuibiat kalulut Kristus. 6Ke masiorik kai, sibailiu pusuibiat samba puaragatmui le; ke tupusuibi kai, pusuibiatmui le, sibaraake ron ka kam masiorik ka bagat om baga pangoringan kele siorikmai. 7Samba maron pukakaronanmai pagalaiat kam, kuagai poi kai, kele aailina kam pugejaat bagamai, iaili leu kam ka bagat pusuibiatmai. 8Aipoi koba le kai bule nuagai kam nia sasaraina, pagalaiat pugejaat baga sipuaaili ka tubumai ka Asia. Bulat makope sane, taan aiom tubumai masibairat, pat taan akurepdep kai murimanua. 9Akukuangan kai ka paatuatmai, ukuman kamateiatnan le akuorik kai. Tapoi sibabara nene, bule ta kukaroni kai tubumai, tapoi Taikamanua le kukaroni kai sipasisusuruake simamatei. 10Aibelaakean kai ka kamateiat kalotoakenen samba ka sibabara geti ibebelaake leu kai; ka tubunia le kupukaronan kai baga, nia le poi ibebelaake kai, 11kalulut kam leu masirom masitiddouake kai, bule ramaigi sirimanua sipasisusuraake panguruat pukatekat baga sinilomai lulut igit panindogatda. 12Aipoi sikau kai maangka baga nene le: bagai bagamai masimunengake, puririmanuamai ka polak nene, sara pei ka bagat pasambaatmai ka kam simasuru samba ka linat paatuat sibara ka Taikamanua le akugalaiake kai nia, ta sikut paatuat sirimanua ka ron panguruat Taikamanua le. 13Aipoi siooi nubasa samba nuagai kam le akusuratnake kai ka kam. Samba kukaroni kalepakatnia agaimuian nia sipulelelek, 14kenanen kineneiget tapei sangamberinia nuagai kam sikuamai. Bule ka gogoi kaoijanan Tuhanta Yesus kai bailiu katuumunanmui keleu kam katuumunanmai. 15Kalulut masikatonemi nenda te akubesiake masibalou kam ka panandaatnia, bule nusilo kam panukanan rua ngaoleat. 16Samba baraku ka kam ei ka Makedonia, samba baraku ka Makedonia oi aku minca ka kam, bule kam iromake aku ka puenungananku ka Yudea. 17Kipa, masikua aku sitaimariuriu paatuat pa akugalai isiat kele nene? Ele ka bagat masigalai isiat siobat bagaku le kugagalai, bailiu makere le "oo" samba "taa"? 18Tapoi ka onin Taikamanua sipulutopit, palelenganmai ka kam ta te "oo" samba "taa". 19Aipoi Yesus Kristus, Togat Taikamanua sipaarepmai ka kam, aku samba si Silwanus samba Timoteus, ta "oo" samba "taa", tapoi sarat "oo" le ka Tubunia. 20Aipoi sangamberi palelengan Taikamanua bailiu "oo" ka tubut Kristus. Kalulut nia leu takua kam "Amen", katulatsanan Taikamanua. 21Aipoi nia sipasiroronake kai samba kam leu ka bagat Kristus, ia te Taikamanua sipasitutulaji, 22sipasitotoggaiji sita samba sipasiaake Ketsat Sipunenan ka paatuatta pasironta ka sangamberi sinarekngakenennia ka sita. 23Tapoi Taikamanua le kusogai sipasimuneng kaku -- iagai poi paatuatku --, kiliu bagaku ka tubumui le tapei ipuririuriu kuoi ka Korintus. 24Ta masipaksa kam apa katonemietmui, alei sipasirorom kam ka puangkakat bagamui le; aipoi amurioan kam simaron ka bagat tonem bagamui.

will be added

X\