1 TIMOTEUS 5

1Bui nugoluki simabaja, nana le nia kele ukkui. Sibau tubu kele saraina, 2tainanalep simabaja kele ina samba tainanalep sibau tubu kele maniunu ka bagat linat paatuat. 3Tailumang bulat sipululumang suru sia. 4Tapoi ke ai togania ele punuteteunia silumang nenda, siangan te boiki tukau masigelai masipuuku saeppuda samba masisiliake simaeru sigalai eppu samba sibubuada, nene poi siobat Taikamanua. 5Silumang bulat sipululumang, si ta anai sipasikeli nia, Taikamanuangan le ikakaroni samba riuriu le nia masitiddou samba manindou sinago sinoibo. 6Silumang sigalai siobat tubu geti, amateian nia kenanen ai pei le nia muririmanua. 7Segeake nganturat nene ka sia bule rapurimanua si ta loloiet. 8Tapoi kasei pa sitaipuuku saeppunia, sara pei sikuddu ka lalepnia, aiputataan tonem bagania, saliu pei le kataira sitaimatonem baga. 9Silumang suratnakenen, bui sitaiaili enem pulu ngarura bajania, sara le aipulumangake; 10samba amaarepman gagalaina galajet simaeru, pasikatnia: masiurau tatoga, masiletsei tairauma, masibui rereda sasaraina sikere tonem baga, masirom sia sipugegeja baga samba sangamberinia galajet simaeru aigalaiakean. 11Tailumang sibau tubu geti bui nusuratnake sia. Aipoi ke aratutnakean siobat tubuda, siareuake sia ka Kristus, obarangan minca mutalimou, 12ia geti oraknangan sia ukum, kalulut raputata tonem bagada siboiki. 13Samba minca mutairoa tubungan le ragagalai barania ka lalep sara ei ka lalep sara; samba ta sarat mutairoa tubu, tapoi samba masitiboi sabagei samba masisaila sabagei samba masitiboi sitaimateu tutiboi. 14Ia te lulunia kuoba pei le bule tailumang sibau tubu mutalimou sia minca, bara togada, masipasikeli lalepda, bui itukau paluluat ka saggakta masipakatai oninta. 15Aipoi aian piga pa tailumang simapepepe masitut si sanitu. 16Tapoi ke sinanalep tai Kristen ai eppunia sipululumang, kau ipasikeli sia, buian ibailiu sia pugejaat bagat paamian, kei sarat bulat sipululumangan le iroromake paamian. 17Sipugagalai ka paamian simalelek pugagalai, mateu tuabeuake rua ngaoleat, sara pei sia sipusasaggo tubu mungantoman samba masigelaiake. 18Aipoi aikua Surat Sipunenan, "Bui nuratsat ngungun jaui sipamemera bera," samba "Mateu le isilo upania sipugagalai." 19Bui nusilo panganduat ka tubut sipugagalai ka paamian, ke ta anai rua ele telu sipasimumuneng. 20Sia sigalai jo ase sia ka matada sapaamian bule ramaloto sabagei. 21Ka matat Taikamanua samba Kristus Yesus samba samalaika sipilinia kutoneake simaron ka matam: Lelekngake nganturat nene, bui ka goat baga samba galaiake sangamberinia si ta paigganan. 22Bui paolaola nurioake sipugagalai ka paamian, bui iaili ekeu joda sabagei. Suru tubum imalina. 23Bui sarat oinan nulo, tapoi lo goiso anggur kalulut balugunu samba reireinia numabesi. 24Ka sabagei, tapei atuukum amatoilaan joda; ka sabagei geti ka teiteian le imatotoila. 25Kisedda leu et sangamberi galajet simaeru matotoila le, samba kenanen ta maruei imatoila, ta leu et iagai tulipputnake.

will be added

X\