1 TIMOTEUS 4

1Tapoi makolou le ikua nia Ketsat, ka tetere sikateitei, babara sirimanua sikaddiuake tonem bagania, masitut ketsat pasipepe samba nganturatda sanitu, 2sibara ka patajuatda sipaboboko, aipoi bagai bagada aian toggaiat sanitu. 3Rakera sirimanua mutalimou, rakera masikom komen sibaraakenen Taikamanua bule ka bagat pusurakat rakom nia simatonem baga samba sipasiaagai pubulanan. 4Sangamberi sibaraakenen Taikamanua maeru le, ta anai keikeiet, ke ka surat baga bai itusilo; 5aipuneni poi nia tiboiet Taikamanua samba panindogat. 6Ke nenda bai nunganturuake ka sasarainanta, bailiunangan ekeu pagugulet Kristus Yesus sipulelelek, siparimanuaake tiboiet putoneman baga samba nganturat simaeru situtnakenennu. 7Katsiliake pumumuan si ta galai, ta anai kauta nia. Ubui tubum musuru ka Taikamanua. 8Olaraga putubuat goiso le uktuknia; tapoi olaraga puketsanan geti mauktuk ka sangamberinia, aipoi ai palelengannia, purimanuaiat kineneiget samba ka gogoi sialu. 9Katoneman samba bulat mateu tusilo le tiboiet nene. 10Ia te tamomomoake tubuta samba tapauukele, atakaroningan poi Taikamanua sipuririmanua, Sipaarau sangamberi sirimanua, sara pei simatonem baga. 11Segeake samba gelaiake sangamberinia nene. 12Bui rapaguileake ekeu kasei pa lulut bau tubum. Kau le ibailiu ekeu uluiet ka simatonem baga ka bagat titiboat, ka bagat paraboat, ka bagat nuntut baga, ka bagat tonem baga samba ka bagat linat puririmanua. 13Pangenan teret kuoi, pasikeli masibasaake Surat Sipunenan, mungantoman samba masigelaiake. 14Bui nuoreake masipakei panguruat sikuddu ka tubum, sinegeakenen kekeu ka tiboiet sinibalaakenen ka teteret ratonemake kabeira tai baja gareja ka utenu. 15Pasikeli sangamberinia nenda, nia nuparimanuaake bule imatoila kamajuannu ka sangamberi sirimanua. 16Jago tubum kekeu samba jago nganturatnu. Kau numariuriu ka bagat sangamberinia nenda, aipoi ke nugalaiake kisedda, maaraunungan samba leu sia sipasiaarepi ekeu.

will be added

X\