1 TIMOTEUS 3

1Sibulatnia le tiboiet nene, "Sirimanua sioba ibailiu sipugagalai ka paamian, galajet simaeru te ibebesiake." 2Oto sipugagalai ka paamian buita si ta kuat tubu, simanteu sisara sinanalep, siagai masisuru tubu, simasiku paatuat, simalelek tubu, simaletsei tairauma, simaagai masipanganturu, 3bui simasosot mulo simapuinengen, sitaimaoddoi, simaleppe baga le, simaaban, bui simaereu bulagat, 4simalelek masiuteake lalepnia, sipareddet tatogania ka bagat sangamberi lelek tubu. 5Ta bai iagai masiuteake lalepnia, kipa iooi ipasikeli paamian Taikamanua? 6Bui simaruei pei le aipukristen, mabubuak paatuatnia, sikau nia tuukum kele Sanitu. 7Buita leu simaeru katuareman ka sia sipuarat bagei, bui rapaloloi nia, isesere nia seseret Sanitu. 8Kisedda leu sia sipasirorom ka paamian, buita simalelek tubu, bui simaigi tiboiet, bui simaereu anggur, bui simaalau baga, 9sipasikeli pakeleat tonem baga le ka bagat bagai baga simalina. 10Sia leu buita tusibo boiki, ke amakoinongan tatat kuat tubuda, ia pei turioake sia mugalai. 11Kisedda leu et tainanalepda, buita simalelek tubu, bui sioba patiboi, siagai masisuru tubu le, samba katoneman ka bagat sangamberinia. 12Sipasirorom buita simanteu sisara sinanalep samba simalelek masipasikeli tatogania samba lalepnia. 13Aipoi sia simalelek mugalai galajet, memei tukatonemi samba memei maeeme sia masimunengake tonem bagada ka Kristus Yesus. 14Sangamberinia kusuratnake kekeu, kenanen aikukakaroni maruei kuoi masiailiake ekeu. 15Oto ke maburu aku, nuagaian kipa murimanua simateu ka lalep Taikamanua, ia te paamian Taikamanua sipuririmanua, arigi samba bongen pubulanan. 16Ta anai kasei pa siooi masisakkala beunannia keleat aratta: Nia sipatoila tubunia ka putubuat sirimanua, atupatoilaan roiponia ka bagat Ketsat, aipaitcoan tubunia ka samalaika, pinaarep ka sipuarat sabulungan, arakatonemingan nia taikapolak, situaakkat ka pulatsanan.

will be added

X\