1 TIMOTEUS 1

1Sibara kai Paulus, apostel Kristus Yesus siripot patonekat Taikamanua, Sipaarau sita, samba Kristus Yesus, karonanta baga, 2masiailiake Timoteus, togaku sipulelelek ka bagat tonem baga: kiliu baga, anggai baga samba aban sibara ka Taikamanua Ukkui samba ka Kristus Yesus, Tuhanta. 3Kei mei aku ka Makedonia, akutubbuian ekeu bule nukuddu ka Epesus, nupanganturu piga pa sia nenda, bui ragelaiake apa pa bagei, 4ele masipaatu pumumuan samba surat paninikat si ta anai kalepakat, sibaraake pajoggolat, ta aturan masipasikeli puaragat siaket Taikamanua ka bagat tonem baga. 5Isiat nganturat ia te nuntut baga sibara ka paatuat simalina, samba agai baga simaeru samba tonem baga sipulelelek. 6Tapoi ai sabagei sitaisesege ka ailiakenen nenda, mapeperangan ka titiboat si ta galai. 7Raoba ibailiu sia guru Surukat, kenanen beri sia ta raagai kolou apa sikuada samba pagalaiat apa ronakenenda. 8Taagai kam, Surukat geti simaeru le ke tupakei ka siripokatnia. 9Samba buita turepdep, Surukat ta ioorak sirimanua simaroipo, ka sirimanua sipasabau Surukat le samba sirimanua sikatai, sitaikalotoake Taikamanua samba sirimanua sijo; sitaimalina samba si ta arat, simateiake ukkui samba inania, samba sia sipasimamatei sirimanua, 10sipuuumun, samba sipujojo pasasambada simanteu, silaba sirimanua, sipaboboko, sipasimumuneng boko samba apa pa bagei sisaggangi nganturat simalina, 11siripot Katuareman Simaeru sibara ka Taikamanua simalatsat samba puuktungan sabeu, kele sinegeakenen Taikamanua kaku kupaarep nia. 12Sura le kukua ka tubut sipasiroronake aku, Kristus Yesus Tuhanta, kalulut aiaddeake aku mateu samba isegeake pasikelat nene ka tubuku. 13Kenanen siburu sipasiaasa le aku, sipasikukuru samba sigalai gege, tapoi aipukateki le aku baga; ka taiagaikunia le poi akugalai sangamberinia nene, ka taimatonem baga. 14Tapoi ia pei aiuruake kiliu bagania Tuhanta ka tubuku, samba tonem baga samba nuntut baga ka bagat Kristus Yesus. 15Katoneman samba bulat mateu tusilo le tiboiet nene: Aioi Kristus Yesus ka polak masiarauake sirimanua sijo; ka talagada aku simakope katai jo. 16Tapoi kalulut nene aipukateki le aku baga Taikamanua, bule ka bagat tubuku sikatai jo nene, ipatoila Yesus Kristus sangamberi om bagania, ibailiu aku uluiet ka sia sipasikakatonemi nia geti, rasese purimanuaiat sitaitatata. 17Katuumun samba pulatsanan le ka Rimata sangamberi tetere, Taikamanua sisasara sitaitatata, sitaimaiitco, teret buruburu! Amen. 18Pasikelat nene kusegeake kekeu, togaku Timoteus, siripot sinibalaakenen siburu pagalaiat tubum, bule sibalat nenda ironake ekeu masipasaggakngake pasaggangan simaeru, 19ka bagat tonem baga samba agai baga simalina. Ai piga pa sia sitaipuletsei bagai bagania simalina, oto lukke tonem bagada; 20ka talagada ia te si Himeneus samba si Aleksander, sinegeakenenku kai Sanitu, bule ramakiro masiasa.

will be added

X\