1 TESALONIKA 5

1Tapoi pagalaiat tetere samba jam geti, sasaraina, taan leu tususuratnake ka kam, 2aipoi bulat anuagaian kam, gogoi Tuhan kele ioi sipananangkou sinoibo le. 3Ke rakua bai, "Aban le samba ta anai apa pa," lepa tulut saksaknangan sia gejat baga, kele sara sinanalep sipususuruket iorik besit pususule, bulat ta te momoi rabela. 4Tapoi kam sasaraina, ta anai kam ka bagat gepgep, bui itulut kam gogoi kele ke sipananangkou; 5aipoi togat pato le kam sangamberimui samba togat tago. Ta sirimanuan soibo ele sirimanuan gepgep sita. 6Oto buian taperep kam kele sia sabagei, tapoi kau le tapumata samba tamasikeli. 7Aipoi sia sipeperep, sinoibo le rapeperep samba sia sipupupuineng, sinoibo le rapupuineng. 8Tapoi sita sirimanuan tago kau tamasikeli, muleppei laba tonem baga samba nuntut baga, samba mututu laba pukakaronan puaragat. 9Aipoi ta aikau sita Taikamanua bailiu pugolukiet, masipuuktungi puaragat le, kalulut Tuhanta Yesus Kristus, 10simamatei punu tubuta, bule ele ai sita muririmanua ele amateian sita, pasamba nia le tapurimanua. 11Oto kau nupanganturu kam pasasambamui samba pasopo pasasambamui, kele sigalaiakenenmui leu. 12Kutiddou kai kam sasaraina, bule nuagai kam sia sipusasaggo tubu ka talagamui, sipalulu kam ka bagat Tuhan samba sipanganturu kam; 13samba bule nusuru kam sia simakope ka nuntut baga kalulut galajetda. Kau nupaaban kam pasasambamui. 14Kunana leu kai kam sasaraina, bule nunganturu kam sia sitaimalelek paraboat, pusuibi kam sia simagulai paatuat, romake kam simasaggo, omake kam bagamui ka sangamberi sirimanua. 15Jago kam, bui ibara sisiliake katai silit katai, sarat simaeru le besiake kam nugalai kam ka pasasambamui samba ka sangamberi sirimanua. 16Kau imariuriu angkat bagamui, 17panindou kam simariuriu. 18Pusura kam ka bagat sangamberinia, ia poi ne obaket Taikamanua ka bagat Kristus Yesus ka kam. 19Bui nupeake kam Ketsat, 20samba bui nupuarak kam pamoilianan. 21Sibo le kam sangamberinia samba ukkaake kam simaeru. 22Areuake kam tubumui ka sene ngamata katai. 23Bule Taikamanua sipaaban sita masipuneni kam simasun samba ibujai kam sangalionia, ketsat, enga samba tubumui bailiu si ta loloiet ka kaoijanan Tuhanta Yesus Kristus. 24Katoneman le nia sipasisosogai kam, ai leu igalai nia. 25Sasaraina, tiddouake leu kam kai! 26Segeake kam salammai ka sangamberi sasaraina ka pasiggungan sipunenan. 27Ka onin Tuhan kutiddou ka kam simakope, bule nubasaake kam surat nene ka sangamberi sasaraina. 28Kiliu bagat Tuhanta Yesus Kristus, masipaalei kam.

will be added

X\