1 TESALONIKA 4

1Pasilepania sasaraina, kutiddou samba kunganturu kai kam ka bagat Tuhan Yesus, bule nupuparaboat kam kipa sigelaiakenenmai samba siobat bagat Taikamanua. Kirenangan anugalaiakean leu kam, tapoi bule memei makope pei le nugalaiake kam nia. 2Aipoi anuagaian kam aturan apa siakemai ka kam ka onin Tuhan Yesus. 3Nene le poi obaket Taikamanua nupusipunenan kam, ia te nuareuake kam tubumui ka puumunan, 4bule senemui nuagai kam masiala kalalemanmui senemui samba mulalep simapunen samba simasuru, 5bui ka botbot akkula, kele sigalaiakenenda sirimanua sitaiagai Taikamanua; 6samba ka bagat nene bui ibara kasei pa sipajo samba sipataju sarainania ka bagat apa pa, aipoi si Tuhan le masisisiliake sangamberinia nene, kele sikuamai samba simunengakenenmai ka kam siboiki. 7Aipoi ta murimanua simalolit aisogai sita Taikamanua, murimanua sipunenan le. 8Oto kasei sitataake nene, ta sirimanua aitataake, Taikamanua le aitataake, sipasiaake leu Ketsatnia sipunenan ka kam. 9Pagalaiat nuntut baga pusarainaat geti taan tususuratnake ka kam, sasaraina aipoi aipanganturungan kam Taikamanua nupanuntu kam baga pasasambamui. 10Samba pagalaiat nene anugalaiakean leu kam ka tubuda sangamberi sasaraina ka sangalio Makedonia. Tapoi kutubbui kai kam sasaraina, bule memei makope pei le nugalaiake kam nia. 11Samba besiake kam murimanua simamengmeng, masipasikeli pasikelatna, samba mugalai masipakei kabeimui, kele sitoneakenenmai ka kam; 12bule rasuru kam sipuarat bagei samba ta leu mukaronan ka tubuda sabagei. 13Ia geti sasaraina, ta koba kai ta nuagai kam nia pagalaiat sia simamatei, bui imareureu bagamui, kele sia sabagei sitaipukakaronan. 14Aipoi ke matonem bagata kamamatei Yesus samba katususurunia, matonem bagata sia simamatei ka bagat Yesus isusuruake leu sia Taikamanua pasamba nia. 15Pagalaiat nene kusegeake kai ka matamui tiboiet Tuhanta: sita sipuririmanua, sipulelegei ka teteret kaoijanan Tuhan, ta muboboiki sita ka sia simamatei. 16Aipoi bulat tubut Tuhanta le poi tugogorosot barania ka sorga sialei gerei, sialei ngangan utera samalaika samba pipiau Taikamanua, ia geti tusururangan boiki simamatei ka bagat Kristus; 17lepa sita sipuririmanua sipulelegei samba sia akkat iakkatnake sita tanairusa ka goa paaili kai Tuhanta; sambata Tuhantangan le sita buruburu. 18Oto tiboiet nene pasuibiake kam pasasambamui.

will be added

X\