1 TESALONIKA 3

1Kalulut taan aiom bagamai kurepdep kai kam, teuakemaian maeruan le kukuddu kai saramai ka Atena. 2Oto koiniakemaian si Timoteus, sarainanta samba aleimai mugalai ka galajet Taikamanua ka bagat masipaarep Katuareman Simaeru sibara ka Kristus masiparon paatuatmui samba masinganturu kam pagalaiat tonem bagamui, 3bui bara kam simaguilak tonem baga kalulut pugejaat baga nene. Aipoi anuagaian kam, siteuakenen Taikamanua le nenda ka sita. 4Ai pei le kai ka talagamui, akukuangan kai ka kam pagalaiat oorikta gejat baga. Samba nene kele siagaimui amuailingan. 5Ia te lulunia taioomna bagaku, koiniakekungan nia, bule kuagai pagalaiat tonem bagamui, karat bagaku baleu aisibongan kam sipasisibo samba bailiu masibbu pusaggoatmai. 6Tapoi kineneiget, kele aitoili si Timoteus barania ka kam samba aisegeake pagalaiat tonem bagamui samba nuntut bagamui samba riuriu topitmui masirepdep kai samba obamui paaili ka kai, kele obamai leu paaili ka kam, 7kai leu sasaraina, bailiu tupusuibi ka bagat sangamberi gejat baga samba pangoringan kalulut kam samba kalulut tonem bagamui. 8Kineneiget amurimanuangan kai, kau le imariuriu nupurio kam ka bagat Tuhan. 9Bulat abeu surat bagamai ka Taikamanua kalulut sangamberi angkat baga sinilomai kalulut kam ka matat Taikamanuanta. 10Sinago sinoibo bulat ta magulai kutiddou kai bule momoi tapaaili kam samba masisutnake simagulai pei le ka tonem bagamui. 11Bule nia, Taikamanua Ukkuita le, samba Tuhanta Yesus masipolouake ka kai enungan moi ka kam. 12Samba bule Tuhanta masikau kam memei masusun samba ituppai ka bagat punununtut baga ka pasasambamui samba ka sangamberi sirimanua, kele kai leu masipununtuki kam. 13Bule nia masiparon paatuatmui, bailiu si ta loloiet samba sipunenan ka matat Taikamanua Ukkuita, ka teteret kaoijanan Tuhanta Yesus sambada sangamberi sipunenannia.

will be added

X\