1 PETRUS 4

1Oto kalulut amasiorikngan Kristus ka putubuat, kam leu buita pupaatuanan kele nenda nuparon kam tubumui. Aipoi kasei sipasioorik pangoringan tubu, aiariakean mugalai jo, 2bule tetere sipulelegei taan nupakei kam nia murimanua masitut obaket sirimanua, tapoi masitut obaket Taikamanua le. 3Aipoi amaigingan tetere anupakei kam ka silelepa masigalaiake obaket bagada sipuarat sabulungan. Anugalaiakean kam sene ngamata sitaimateu, pubotbonan, pupupuineng, pukokom, pulolo samba pasipaninindogi buluat keraet surukat. 4Kise makisei ka bagada sipuarat sabulungan kalulut taan nututnake kam sia mulebbu ka puparaboanan sikatai kele siburu, ia te rapalololoi kam. 5Tapoi raaalegi te nia, simatarek masiukumake sipuririmanua pei le samba simamatei. 6Ia te lulunia ka simamatei leu tusegeake Katuareman Simaeru, bule sia, kele sangamberi sirimanua, tuukumake ka putubuat, tapoi murimanua ka puketsanan, siripot teu bagat Taikamanua. 7Kalepakat sangamberinia amalegerengan. Oto kau nujago kam tubumui samba mumata, bule ioi nupanindou kam. 8Tapoi sisaliu sangamberinia kau bulat panuntu kam baga pasasambamui, aipoi nuntut baga itabbo maigi jo. 9Parauma kam pasasambamui si ta ngungu. 10Kau paletsei kam pasasambamui siripot panguruat sinilomui senemui, kele sipugagalai simatopit masipasikeli panguruat kiliu bagat Taikamanua. 11Ke sipungangantoman, kau ipungantoman siripot sipasisesegeake tiboiet Taikamanua; ke sipuuku pasikelat, kau igalaiake nia siripot ron sipanguruatnakenen Taikamanua, bule ka bagat sangamberinia tulatsatnake Taikamanua kalulut Yesus Kristus. Nia poi sibakkat pulatsanan samba gege teret buruburu. Amen. 12Sasaraina kilibet baga, bui te imakisei ka bagamui juluu apit paoreat siooi ka tubumui masisibo kam, kele ai apa pa simasaliu sipuaaili ka tubumui. 13Bailoknia, kau le imagora bagamui siripot rubeiat sinilomui ka bagat pangoringan Kristus, bule imagora leu bagamui samba maangka baga ka teteret ipatoila pulatsanannia. 14Mauktuk te kam ke rapaloloi kam kalulut onin Kristus, aipoi Ketsat pulatsanan, ia te Ketsat Taikamanua ai ka tubumui. 15Bui ibara ka talagamui sipasioorik kalulut pamamateinia ele pananangkou ele pugagalai sikatai ele pasigegeugeu anunda sabagei. 16Tapoi ke masiorik nia kalulut pukikristen, bui imaila; kau le iumunake Taikamanua ka bagat onin Kristus nenda. 17Aipoi kineneiget aiailingan teterenia panandaat pasiukuman, samba siboiki ukumakenen ia te paamian Taikamanua. Ke ka sita itaddaake, kipangan pa kalepakatnia ka sia sitaimatonem baga ka Katuareman Simaeru sibara ka Taikamanua? 18Samba kele sikuat Surat Sipunenan, "Ke beringan simaroipo baga ta malabbei rasilo puaragat, apangan le geti babara ka sia sitaimareddet ka Taikamanua samba sijo?" 19Oto sia sipasioorik kalulut teu bagat Taikamanua, kau rasegeake ketsatda ka Sipasibabaraake sia simatopit, ka bagat masigalaiake simaeru.

will be added

X\