1 PETRUS 2

1Oto ribbaiake le kam sangamberi pukataikat, sangamberi pajoat samba patajuat, sisit baga samba pakataikat nganga. 2Kau ibailiu kam kele tatoga sibau mututu mata, simaoggou suat tottot puketsanan simalina, bule nupuurau kam samba nusilo kam puaragat, 3ke bulatnia bai anunanaman kam anggai bagat Tuhan. 4Konan kam ka tubunia, bukku sipuririmanua, siribbaiakenenda sirimanua, tapoi ka matat Taikamanua geti sipili samba simakeppu saki le. 5Kam leu, kau tupakei kam kele bukku sipuririmanua pasiriot lalep puketsanan, bailiu kam imam sipunenan, masibuluake buluakenen puketsanan obaket Taikamanua kalulut Yesus Kristus. 6Atusuratnan ka Surat Sipunenan, "Bulatnia kugalakngake ka Sion sara bukku sipili, bukkut taiming simakeppu saki, samba kasei sikatonemi nia, ta tupakakaila." 7Oto ka kam simatonem baga, makeppu saki nia, ka sia sitaimatonem baga geti, "Bukku siribbaiakenenda tai tukang aibailiuan bukkut taiming," 8samba "Bailiu bukku tuluiet, samba bukku katusoksongan." Tusoksok sia sedda kalulut ta mareddet sia ka tiboiet Taikamanua; kisedda te aiteuake Taikamanua ka tubuda. 9Kam geti bangsa sipili le, imam rimata, bangsa sipunenan, bangsa bakkat Taikamanua, bule nupaarep kam beunan sigalainia sipasisosogai kam bela ka gepgep tuguru ka patonia kiseiakenen. 10Siburu ta bangsat Taikamanua kam, kineneiget aibailiuan bangsania; siburu ta pukatekiet baga, kineneiget pukatekiet bagangan le. 11Sasaraina kilibet baga, kunganturu kam, kam sitoi sipueekpak, bule nuareuake kam tubumui ka pubotbonan siobat akkula sipasasaggak ka ketsat. 12Kau imaeru paraboatmui ka talagada sipuarat sabulungan, bule kenanen ratiboi kam rakua kam sirimanua sikatai, tapoi kalulut raitco sigalaimui simaeru, umunakerangan Taikamanua ka gogoi kaoijanannia. 13Pusum kam ka sangamberi saute sibaraakenen sirimanua kalulut si Tuhan, ele ka rimata, nia poi siukkaake gege simabuak, 14ele kai gubernur sikoiniakenen rimata masiukum sigalai sikatai samba masiumun sigalai simaeru. 15Aipoi obaket Taikamanua ia te bule kalulut gagalaimui simaeru, petpetnakemuian ngungunda sitaiagai paatuat. 16Kau siripot sirimanua sipuuja nupurimanua kam; tapoi bui nupakei kam puujaatmui masitabbo katai, kau le kele pagugulet Taikamanua. 17Suru kam sangamberi sirimanua, pununtuki kam baga sasaraina, kalotoake kam Taikamanua, suru kam rimata. 18Kam sapagugulet, kau numareddet kam ka bagat loto ka tai tuanmui, ta sarat ka tubuda simatopit samba simaeru baga, tapoi samba leu ka simagolu. 19Panukanan le poi nene ka tubut sirimanua ke kalulut aagaina obaket Taikamanua ibairat gejat baga sitaipasesese sigalaira sirimanua. 20Aipoi katuumun pa oniakenen ke kalulut jomui nuorik kam bobobo? Tapoi ke kalulut gagalaimui simaeru nuomake kam masiorik paoreat, nene te panukanan Taikamanua. 21Ia poi lulunia aitusogai kam, aipoi Kristus leu amasiorikngan lulumui, aigalakngakean uluietmui, bule nutut kam siperakatnia. 22Ta anai aigalai jo, samba pajoat ta anai ka ngungunia. 23Ka teteret tupaloloi nia, ta aisiliake paloloiat; ka teteret aipasiorik, ta ailumunake, tapoi ka Taikamanua sipasiukum simaroipo le aisegeake nia. 24Nia le amasibairat jota ka bagat tubunia ka loina siliktenga, bule sita simamatei ka jo, murimanua ka puroipoat. Kalulut maujunia le anumale kam. 25Amapepengan poi kam siburu kele biribiri, tapoi kineneiget atoilingan kam ka Sipasijajago samba Sipasikeli ketsatmui.

will be added

X\