1 PETRUS 1

1Sibara kai Petrus, apostel Yesus Kristus, masiailiake taitoi simasasaragai ka Pontus, Galatia, Kapadokia, Asia samba Bitinia, 2ia te sipili siripot isiat Taikamanua, Ukkuita, samba silinaakenen Ketsat Sipunenan, bule masireddet Yesus Kristus, samba tusosoki sia logaunia. Bule memei masusun ka tubumui kiliu baga samba aban. 3Tuumunake le Taikamanua, Ukkui Tuhanta Yesus Kristus, situtuake sita minca siripot beunan katet bagania, tapukaronan sipuririmanua lulut katususurut Yesus Kristus ka simamatei, 4tasilo ikepmakenen sitaimasusuet, sitaimalololit samba sitaimalalaju, situkokoiri ka sorga ka kam. 5Ia te kam pinasikeli ka geget Taikamanua kalulut tonem baga ujumui masingena puaragat simatatarek patoilaket ka gogoi sialu. 6Pugoraji kam baga pagalaiat nene, kenanen ka oggak nene murereureu pei le kam baga kalulut sene ngamata pasisiboat. 7Sangamberinia nene ia te pasimuneng linania tonem bagamui -- sisaliu pei le kepput sakit mas simasusuet, sisibo linania ka api -- sikau kam masisilo katuumun samba pulatsanan samba pubeunanan ka gogoi katutoilakat Yesus Kristus. 8Kenanen tapei anuitco kam nia, tapoi nupununtuki kam nia baga. Nukatonemi kam nia, kenanen tapei nuitco kam nia kineneiget. Mugora kam baga kalulut angkat baga simalatsat samba sitaioi tutiboi, 9kalulut anusiloan kam buat tonem bagamui, ia te puaragat ketsatmui. 10Puaragat nenda te aragaba samba aralelekngake tai nabi sipasipopoiliat kiliu baga akenen Taikamanua ka kam. 11Ralelekngake kipa samba pigamoi teterenia ipuaili siniboi Ketsat Kristus, sikuddu ka bagada, ia te Ketsat sipasimumunengake pagalaiat paoreat sipuaaili ka tubut Kristus samba pagalaiat pulatsanan pasat nenda. 12Aipoiliatnan Taikamanua ka matada, ta tubuda pasikelietda, kam le, ia te pagalaiat sipaarepda kineneiget ka kam sia sikoiniakenen Ketsat Sipunenan sibara ka sorga, masisegeake Katuareman Simaeru ka kam, ia te katuareman simakiddi ka bagada leu samalaika masiagai. 13Oto patarek kam paatuatmui, mumata samba kau kam pukakaronanmui sangamuinenia ka kiliu baga panguruatnakenen ka kam ka teteret katutoilakat Yesus Kristus. 14Siripot tatoga simareddet, buian nututnake kam pubotbonanmui siburu ka teteret pepemui pei le. 15Tapoi kele Taikamanua sipasisosogai kam sipunenan le nia, kam leu kau ibailiu kam sipunenan ka bagat sangamberi puparaboananmui, 16atusuratnakean poi, "Kau numasipunenan kam, aipoi sipunenan le aku." 17Ke nuagai kam nia Ukkui, sitaiiggat masiukum senen sirimanua siripot sigalaira, oto kau numaloto kam murimanua ujumui musitoi ka polak nene. 18Anuagaian poi kam, ta bibilet simasusuet kele mas ele perak atukau masitebui kam ka puparaboananmui siboboi pangusunan sibara ka taikebbukatmui, 19logau Kristus simakeppu saki le, kele logau biribiri si ta loloiet samba simalina. 20Enan tapei atubaraake polak atupilingan nia, tapoi kalulut kam ia pei ipatoila tubunia ka gogoi kalepakat. 21Kalulut nia te anukatonemi kam Taikamanua sisuruake nia ka simamatei samba sipasilalatsatnake nia, bailiu Taikamanuangan le katonemietmui samba karonietmui. 22Anulinaakean poi kam ketsatmui ka purereddet ka pubulanan ioi nugalaiake kam nuntut baga simalina ka sasaraina, kauan sibulatnia nupanuntu kam baga pasasambamui sibara ka muinet paatuat. 23Atututuakean poi kam minca ta ka karamen simasusuet, sitaimasusuet le, kalulut tiboiet Taikamanua sipuririmanua samba simatom. 24Aipoi, "Sangamberi sirimanua kele turuturu le samba latsatnia kele botcoket turuturu. Malalaju le turuturu, botcoketnia leu iraragat, 25tiboiet Taikamanua geti, riuriu le teret buruburu." Nene te tiboiet Katuareman Simaeru sinegeakenen ka kam.

will be added

X\