1 YOHANNES 5

1Senen sipasikakatonemi Yesus, ia te Kristus, siputututu mata sibara ka Taikamanua le nia; samba senen sipununtuki Ukkui sipasi tututuake, masipununtuki leu Toga sinuntuakenennia. 2Ka bagat nene le ituaagai nuntut bagata ka tatogat Taikamanua, ia te: ke tapununtuki baga Taikamanua samba tagalaiake surukatnia. 3Nene le nuntut baga ka Taikamanua, ia te masireddet surukatnia. Samba surukatnia ta maoru, 4aipoi senen siputututu mata sibara ka Taikamanua masikalaake polak; samba kamanangan sikalaake polak ia te tonem bagata. 5Kasei poi sikalaake polak, ke ta nia sikatonemi Yesus, iate Togat Taikamanua? 6Yesus Kristus nene te siooi ka bagat oinan samba ka logau; ta sarat ka bagat oinan, tapoi ka oinan samba ka bagat logau. Samba sipasimunengake ia te Ketsat, aipoi Ketsat ia te pubulanan. 7Aipoi ai telu sipasimumuneng: 8Ketsat, oinan samba logau; samba telunia sara le. 9Beringan pasimunengan sirimanua tasisilo; tapoi pasimunengan Taikamanua pei le maron. Aipoi kise te pasimunengan Taikamanua, masimunengake pagalaiat Togania. 10Sipasikakatonemi Togat Taikamanua, aian pasimunengan nene ka paatuatnia. Sitaikatonemi Taikamanua, aikauan Taikamanua simaboko, aipoi ta matonem bagania ka pasimunengan Taikamanua pagalaiat Togania. 11Samba nene le pasimunengan: Aipanguruatnakean Taikamanua purimanuaiat sitaitatata ka sita, samba purimanuaiat nenda ai ka bagat Togania. 12Sipasibabakkati Toga, aibakkatingan purimanuaiat; sitaibakkati Toga, ta ibakkati purimanuaiat. 13Lulunia kususuratnake sangamberinia nene ka kam, nuagai kam nia, kam simatonem baga ka onin Togat Taikamanua, anubakkatingan kam purimanuaiat sitaitatata. 14Nene te emen bagata ka Taikamanua, iaarepi panindogatta ke tatiddou apa pa ka tubunia siripot teu bagania. 15Samba ke taagai iaarepi apa pa sinindouta, agaitangan leu, atasiloan sangamberi sinindouta ka tubunia. 16Ke ai kasei pa sipasiitco sarainania mugalai jo, ia te sia jo sitaibaraake kamateiat, kau itiddouake nia ka Taikamanua, samba ikakau Taikamanua ka sia purimanuaiat, ia te sigalaijo sitaibaraake kamateiat. Ai jo sibaraake kamateiat; ta pagalaiat jo nenda kukukua ipanindou. 17Sangamberi galajet sikatai ia te jo, tapoi ai jo sitaibaraake kamateiat. 18Taagai kam, senen sinutuakenen sibara ka Taikamanua, ta igagalai jo, aijajago poi nia Togat Taikamanua, samba ta ipagegeugeu nia Sijo. 19Taagai kam, sibara ka Taikamanua le sita, samba sangalio polak ai le ka paneineiat Sijo. 20Tapoi taagai kam, amoian Togat Taikamanua samba aiakean puaagai paatuat ka sita, bule taagai kam Taikamanua sibulatnia; samba ai le sita ka bagat Taikamanua sibulatnia, ka bagat Togatnia Yesus Kristus. Taikamanua sibulatnia le nia samba purimanuaiat sitaitatata. 21Ale tatogaku, jago kam tubumui ka buluat.

will be added

X\