1 YOHANNES 4

1Sasaraina kilibet baga, bui nukatonemi kam senen ketsat, tapoi sibo le kam paketsatketsat, ele sibara ka Taikamanua pa; aipoi amaigingan nabi sipatataju muottou mei ka sanngalio polak. 2Kise le nuaagai kam ketsat sibara ka Taikamanua: senen ketsat simunengake Yesus Kristus amoian nia ka pusisirimanua, ia te ketsat sibara ka Taikamanua. 3Samba senen ketsat sitaimunengake Yesus, ta sibara ka Taikamanua. Ketsat nenda ketsat saggak Kristus le samba pagalaiat nia anuarepman kam kaooinia, samba kineneiget amoian nia ka polak nene. 4Kam geti sibara ka Taikamanua le, tatogaku, samba anukalaakean kam nabi sipatataju; aipoi Ketsat sikuddu ka bagamui pei le abeu ka ketsat sikuddu ka polak. 5Sibara ka polak le sia; ia te lulunia pagalaiat sibabara ka polak le ratitiboi, samba taikapolak raoba masiarepi sia. 6Sita geti sibara ka Taikamanua le; sipasiaagai Taikamanua, iaarepi sita, sitaibara ka Taikamanua geti ta iaarepi sita. Kisedda te ituaagai Ketsat Taikamanua samba ketsat sipasipepe. 7Sasaraina kilibet baga, kau tapanuntu baga pasasambata, aipoi nuntut baga sibara ka Taikamanua le; samba senen sipunununtu baga, siputututu mata sibara ka Ukkui le samba iagai Taikamanua. 8Sitaimanuntu baga, ta iagai Taikamanua, aipoi nuntut baga le Taikamanua. 9Ka bagat nene le imatotoila nuntut bagat Taikamanua ka sita, ia te kokoiniakena Togania sisasara Taikamanua ka polak, bule tapurimanua kalulut nia. 10Ne le nuntut baga: Ta sita amasipununtuki baga Taikamanua, Taikamanua le amasipununtuki sita baga, samba aikoiniake Togania pasiaban ka jota. 11Sasaraina kilibet baga, ke kise nuntut bagat Taikamanua ka sita, sita leu mateu panuntu baga pasasambata. 12Beri pei sara sipasiitco Taikamanua. Ke panuntu sita baga pasasambata, pukuddunangan Taikamanua ka bagata samba nuntut bagania sun ka bagata. 13Ka bagat nene le taagai kukudduta ka bagat Taikamanua samba nia ka bagata, ia te: aiakean ka sita Ketsania. 14Akuitcoan kai samba kumunengake kai kokoiniakena Ukkui Togania bailiu Sipaarau taikapolak. 15Kasei simunengake, Yesus, ia te Togat Taikamanua, ka tubunia ipukuddu Taikamanua samba nia ka tubut Taikamanua. 16Ataagaian samba atakatonemingan nuntut bagat Taikamanua ka sita. Nuntut baga le Taikamanua, kasei sipukukuddu ka nuntut baga, ka Taikamanua le aipukuddu samba Taikamanua mukuddu ka tubunia. 17Itususutnake nuntut bagat Taikamanua ka bagata, bule tamaeme ka gogoi pasiukuman, aipoi kipa puririmanuan Kristus, kisedda leu sita ka polak nene. 18Ka bagat nuntut baga ta anai loto; aipoi nuntut baga simasun masi tataake loto. Aipoi loto ai pei le ka bagat ukuman, samba kasei simaloto ta masun ka bagat nuntut baga. 19Tapunununtu baga, kalulut Taikamanua le boiki amasipununtuki sita baga. 20Ke ai bai sipasikukua, "Manuntu bagaku ka Taikamanua," tapoi malaga bagania ka sarainania, sipaboboko le nia. Aipoi sitaipununtuki baga sarainania siitconia, ta momoi ipununtuki baga Taikamanua taiitcoketnia. 21Samba surukat sinilota sibara ka Kristus ia te: Sipununtuki baga Taikamanua, kau leu ipununtuki baga sarainania.

will be added

X\