1 YOHANNES 3

1Itco pei kam beunan nuntut baga sipanguruatnakenen Ukkui ka sita, amuoningan sita tatogat Taikamanua; kirenangan tatogat Taikamanua le sita. Ia te ta raaagai sita taikapolak, kalulut ta poi raagai Taikamanua. 2Sasaraina kilibet baga, tatogat Taikamanuangan te sita, taimatotoilana pei le kipa sita geti. Tapoi ataagaian, amatoilaan geti Kristus, makeretangan ka tubunia, bulat tubungangan poi taiitco. 3Senen sipukakaronan kele nene ka Kristus, masipuneni tubunia, kele Kristus sipunenan. 4Senen sigalai jo, sipasabau surukat leu et, aipoi jo, ia te pasipasasabau surukat. 5Samba nuagai kam, aioi Kristus ia te masiposa sangamberi jo, samba ka tubunia ta anai jo. 6Senen sirimanua simariuriu ka tubut Kristus, taan igagalai jo; senen sirimanua simariuriu mugalai jo, tapei aiitco samba aiagai Kristus. 7Ale tatogaku, bui rapepeake kam kasei pa. Sigalaiake puroipoat, simaroipo te nia, makere kele Kristus simaroipo. 8Simariuriu mugalai jo, sibara ka Sanitu le nia, aipoi Sanitu sigalai jo le, barania ka panandaatnia. Ia te aioi Togat Taikamanua, bule isubuake galajet Sanitu. 9Senen siputututu mata sibara ka Taikamanua, taan igagalai jo; aipoi galai tubut Taikamanua aian ka tubunia samba ta momoi igalai jo, sinutuakenen Taikamanua poi nia. 10Ka bagat nene le imatotoila putotogat Taikamanua samba putotogat Sanitu: Senen sitaigalaiake puroipoat, ta sibara ka Taikamanua, kisedda leu sitaimanuntu baga ka sarainania. 11Aipoi nene le katuareman siarepmui ka panandaatnia: Buita panuntu sita baga. 12Bui kele si Kain sibara ka Sijo samba simateiake baginia. Samba apa lulu aimateiake nia? Aipoi sangamberi galajetnia sikatai le, galajet baginia geti maroipo. 13Bui imakisei ka bagamui sasaraina, ke rapulagaki kam baga taikapolak. 14Ataagaian, amutalipoan sita barata ka kamateiat mei ka purimanuaiat, kalulut punununtut bagata ka sarainanta. Sitaimanuntu baga, sarat ka kamateiatnan le nia. 15Senen simalaga baga ka sarainania, simateiake sirimanua le nia. Samba nuagai kam, senen simateiake sirimanua, ta anai ka tubunia purimanuaiat sitaitatata. 16Ka bagat nene te taagai kam nuntut baga: Kristus aibuluakean engania punu tubuta. Sita leu mateu tabuluake enganta punu tubuda sasarainanta. 17Kasei simabibilet samba iitco sarainania simageba, tapoi iluplupmake le paatuatnia ka sarainania nenda, kipa te iooi ikuddu nuntut bagat Taikamanua ka tubunia? 18Ale tatogaku, bui sarat ka nganga ele ka lila tapununtu baga, kau le itugalaiake samba ka bagat pubulanan. 19Kisedda te taaagai nia sibara ka pubulanan le sita, bailiu pasanangtangan paatuatta ka matat Taikamanua, 20aipoi ke inganduake sita paatuatta, Taikamanua abeu ka paatuatta, samba iagai sangamberinia. 21Sasaraina kilibet baga, ke taan inganduake sita paatuatta, maemenangan bagata masilegeri Taikamanua, 22samba apa le tatiddou, tasisilo sibara ka tubunia, kalulut tareddet surukatnia samba tagalaiake obaket bagania. 23Samba nene le surukatnia: bule imatonem bagata ka onin Togania, Yesus Krusrus samba panuntu sita baga pasasambata kele sitoneakenen Kristus ka sita. 24Samba sipasirereddet surukatnia ka Taikamanua le ikuddu samba Taikamanua mukuddu ka tubunia. Samba kisedda te taaagai nia pukukuddut Taikamanua ka tubuta ia te kalulut Ketsat sipanguruatnakenennia ka sita.

will be added

X\