1 KORINTUS 6

1Bara ibara ka talagamui sipajojoggolo pasasamba tai Kristen, maeme koi nia mei masinganduake ka sipasiukum sitaimatonem baga, ta ka tai Kristen? 2Ele ta pa nuagai kam, sia sipunenan le masiuukum geti polak nene? Oto ke kam le masiuukumake polak nene, ta pa mateu nupasikeli kam pagalaiat sigoiso nene? 3Ta pa nuagai kam, sita masiuukumake samalaika? Sara pei pa pagalaiat purimanuaiat sisenen gogoi. 4Kenanen kisedda, bara pajoggolat pagalaiat purimanuaiat sisenen gogoi, ka sia sitaiaaddeakenen paamian nusegeake kam nia? 5Kukukua nia nene numaila kam. Ta pa anai beri sara ka talagamui simasiku paatuat siooi masipagaba pajoggolatda sasaraina? 6Pakakaro pa saraina ka saraina, ai pei bagei ka tubuda sitaimatonem baga? 7Oto kababarat pakaromui pasasambamui bulat amakalangan kam. Angoian pa eddangannia nuorik kam taimaroipo? Ta pa maeru pei le rarugiake kam? 8Tapoi kam tubumui masigalaiake sitaimaroipo samba kam tubumui masibaraake purugiat, samba ka tubuda sasarainamui pei bagei nugalaiake kam nia. 9Ele ta pa nuagai kam, sia sitaimaroipo ta raiikepmake Purimataat Taikamanua? Bui numapepe kam! Sia sipuuumun, sipanindogi buluat, sipaeelet, simaolop tubu, sipujojo pasasambada simanteu, 10sipananangkou, simaalau baga, simalo simapuinengen, sipakatai nganga samba sipatataju, ta raiikepmake Purimataat Taikamanua. 11Kisedda leu te paraboatda piga pa ka talagamui siburu. Tapoi kineneiget atulinaakean kam, atusipunenanakean kam, atuparoipongan kam ka onin Tuhan Yesus Kristus samba ka bagat Ketsat Taikamanuanta. 12Sangamberinia le momoi kaku; tapoi ta sangamberinia ai kauta nia. Sangamberinia le momoi kaku; tapoi ta kuoobaake tubuku ipaneinei nia apa pa. 13Kan ia te puektengan balugu samba balugu ektekngakenen kan; tapoi ruania itatataake le Taikamanua. Tapoi tubu ta puumunakenen, kaunen kai Tuhan le, samba si Tuhan katuuktungan tubu. 14Taikamanua sisuruake Tuhan Yesus, sita leu isusuruake kalulut gegenia. 15Ta pa nuagai kam, tubumui ia te laddou Kristus? Mateu pa kuala laddou Kristus, kukau nia ka puumunan? Bulat ta momoi! 16Ele ta pa nuagai kam, kasei sitabbaraake tubunia ka sinanalep sijo, aibailiuan sia ruada sangaakkula? Kise poi aikua Surat Sipunenan, "Ruada bailiu sangaakkula." 17Tapoi kasei sitabbaraake tubunia kai Tuhan, bailiu sisara Ketsat sia si Tuhan. 18Areuake kam tubumui ka puumunan! Pajoojoo bagei sigalaiakenen sirimanua, ta sisappo tubunia. Tapoi sigalaiake puumunan, ka tubunia le aigalai jo. 19Ele ta pa nuagai kam, tubumui ia te uman Ketsat Sipunenan sikuddu ka bagamui, Ketsat Sipunenan sinilomui ka Taikamanua, -- samba kam, ta kam sibakkat tubumui? 20Aipoi makeppu sakimui aisaki kam Taikamanua. Oto pakei kam tubumui sibailiu katulatsanan Taikamanua.

will be added

X\