1 KORINTUS 3

1Aku leu sasaraina ka teteret nenda ta momoi kupanibo ka kam kele ka sirimanua sibara Ketsat Taikamanua, tapoi ka sirimanua akkula le, kele taiguigui ka bagat Kristus. 2Susu le akuake ka kam, ta kan simakela, aipoi tapei momoi nukom kam nia. Beringan kineneiget tapei momoi nusilo kam nia, 3aipoi sirimanua akkula pei le kam. Aipoi ke ai ka talagamui tutut baga samba pajoggolat, ta ia ne masipatoila sirimanua akkula le kam, samba muparaboat siripot pusisirimanua? 4Aipoi ke sisara masikua, "Si Paulus le kutut kaku," sabagei masikua, "Kaku si Apollos," ta ia ne masipatoila, sirimanua akkula le kam? 5Kasei poi si Apollos? Kasei si Paulus? Pagugulet Taikamanua le sia, sipalulu kam mutonem baga, samba senenda masienungake siripot panguruat Tuhan. 6Aku masiurep, si Apollos masisubui, tapoi Taikamanua le masitututuake. 7Kalulut nene ta abeuakenen sipasiuurep ele sipasisusubui; Taikamanua le sipasitututuake. 8Sipasiuurep samba sipasisusubui makere le; samba senenda masisilo upa siripot sigalaira. 9Aipoi alei pagalaiakenen Taikamanua le kai; kam monen Taikamanua, lalep Taikamanua. 10Siripot kiliu bagat Taikamanua sipanguruatnakenennia kaku, aku kele tukang siagai kabei, akugalakngakean bongen, sabagei masirioake minca ka uddutnia. Tapoi senen sirimanua kau ipagaba kipa ipasigalai ka uddutnia. 11Ta poi anai kasei pa siooi masigalakngake bongen bagei silit silepa galak, ia te Yesus Kristus. 12Ke mas, perak, bukku simakeppu saki, loinat, sigaratat ele loinan bera bai rarioake ka uddut bongen nenda, 13matotoila le geti galajetda senenda. Gogoi Tuhan poi masipatotoila, aipoi api le ipatotoila nia samba kipa erunia galajet senen sirimanua, api le isisibo nia. 14Ke ta malabo sirioakenen sirimanua ka uddut bongen nenda, silonangan upa. 15Ke malabo le sigalainia, maruginangan; tubunia geti muririmanuania, tapoi kele silalau ka apingan le. 16Ta nuagai kam, uman Taikamanua le kam, samba Ketsat Taikamanua mukuddu ka tubumui? 17Ke ai sipakatai uman Taikamanua, ipakakatai leu nia Taikamanua. Sipunenan le poi uman Taikamanua, ia te kam. 18Bui bara kasei pa sipataju tubuna. Ke ai ka talagamui sipaatu tubunia simasiku paatuat siripot kirekat polak nene, kau le ikau tubunia sitaiagai paatuat, bule ibailiu nia simasiku paatuat. 19Aipoi sikut paatuat polak nene, putaiagaiat paatuat le ka Taikamanua. Atusuratnakean poi ka Surat Sipunenan, "Ilalaba le simasiku paatuat Taikamanua ka bagat pabelokatda." 20Samba minca, "Iagai si Tuhan paatuatda simasiku paatuat; sangamberinia siboboi le." 21Oto bui bara kasei pa siumunake sirimanua, sangamberinia le poi kam le sibakkatnia: 22ele Paulus, ele Apollos, ele Kepas, ele polak, ele purimanuaiat, ele kamateiat, ele sibabara kineneiget, ele sibabara geti, sangamberinia kam le sibakkatnia. 23Tapoi kam, Kristus le sibakkat kam, Kristus geti bakkat Taikamanua le.

will be added

X\