1 KORINTUS 2

1Kaku leu ka teteret akuoi ka kam sasaraina, ta ka tiboiet paalakat baga ele sikut paatuat akuoi masisegeake pasimunengan pagalaiat Taikamanua ka kam. 2Aipoi akuteuakean ka paatuatku ta masiagai apa pa ka talagamui, sarat Yesus Kristus le, ia te nia siniliktengaakenen. 3Samba leu ka bagat pusaggoat samba loto simakope samba geret tubu le akuoi ka kam. 4Tiboietku samba ngantomanku leu ta ka sikut paatuat paalakat baga kusegeake nia, tapoi masikatonemi ron Ketsat le, 5bui ipubongen tonem bagamui ka sikut paatuat sirimanua, tapoi ka ron Taikamanua le. 6Tapoi sikut paatuat le kutiboake ka sia simatua pupaatuanan, tapoi ta sikut paatuat polak nene, ele sibara ka saute ka polak nene, tataakenen geti. 7Tiboakenenmai ia te sikut paatuat Taikamanua simakele samba simalipput, sinarekngakenen Taikamanua enan tapei abara polak, katulatsananta. 8Ta anai sia saute ka polak nene siagai nia, aipoi raagai bai nia, ta rasisiliktengaake Tuhan Sipululatsat. 9Tapoi kele sitususurat ka Surat Sipunenan, "Apa sitaiitcoket mata, sitaiaaremen talinga samba sitaituoottou ka paatuat sirimanua, aitarekngakean Taikamanua ka sia sipununtuki nia baga." 10Ka sita geti aipatoilaan Taikamanua kalulut Ketsat; aipoi sangamberinia le irirituake Ketsat, beringan simalipput ka tubut Taikamanua. 11Kasei poi sirimanua siagai sibabara ka paatuat sirimanua, ke ta ketsat sirimanua nenda le sikuddu ka bagat tubunia? Kisedda leu te ta anai siagai apa sibabara ka bagat Taikamanua, sarat Ketsat Taikamanua le. 12Ta ketsat polak nene atasilo, ketsat sibara ka Taikamanua le, bule taagai sipanguruatnakenen Taikamanua ka sita. 13Samba kupanibo kai masikolouake pagalaiat puketsanan ka sia sibara Ketsat, ta ka tiboiet sigelaiakenen sikut paatuat sirimanua, tapoi sigelaiakenen Ketsat le. 14Ta isisilo sirimanuan polak nene sibara ka Ketsat Taikamanua, putaiagaiat paatuat le poi ka sia; samba ta iaagai kolou, aipoi pagalaiat nene puketsanan le iagai ipatuptup nia. 15Sirimanua sinopsop Ketsat iagai ipatuptup sangamberinia, tapoi nia geti ta raagai sabagei masipatuptup nia. 16Aipoi ka Surat Sipunenan atusurat, "Kasei siagai paatuat Tuhan, pat oinangan inganturu nia?" Tapoi ka sita geti paatuat Kristus le ka tubuta.

will be added

X\