1 KORINTUS 12

1Pagalaiat panguruat Ketsat, ta koba ta nuagai kam nia sasaraina. 2Nuagai kam, ka teteret sipuarat sabulungan pei le kam, taipaatuetmui aitiktikngan kam ka buluat sitaiagai manibo. 3Kalulut nene kupaagai ka kam, ta anai kasei pa sinopsop Ketsat Taikamanua masikua, "Teleiet le Yesus!" samba ta anai kasei pa siooi masimunengake, "Yesus ia te Tuhan," ke ta kalulut Ketsat Sipunenan. 4Maigi ngamata panguruat, tapoi sara le Ketsat. 5Samba maigi ngamata pasikelat, tapoi sara le Tuhan. 6Samba maigi ngamata galajet kiseiet, tapoi Taikamanua sara le sipasigagalaiake sangamberinia ka bagat sangamberi sirimanua. 7Tapoi ka senen sirimanua ipanguruatnake panoilakat Ketsat puuktungan sangamberi. 8Aipoi ka sisara ipanguruatnake Ketsat manibo ka sikut paatuat, ka sabagei Ketsat nenda leu et masikau panguruat muagai manibo. 9Ka sisara Ketsat nenda leu et masipanguruatnake tonem baga, samba ka sabagei ikau panguruat masialeake sirimanua. 10Ka sabagei gege masibaraake kiseiet, ka sabagei pasipoilianan, ka sabagei panguruat masipabaggei sene ngamata ketsat, ka sabagei ikau panguruat manibo ka nganga kiseiet, samba ka sabagei ikau panguruat masikolouake nganga kiseiet. 11Tapoi sangamberinia nene Ketsat sisara nenda leu et masigagalaiake nia, iparubei nia ka senen sirimanua, siripot teu bagania. 12Aipoi kele tubu sara le samba maigi laddounia, tapoi sangamberi laddou, kenanen maigi, bailiu sara tubu le, kisedda leu te Kristus. 13Aipoi ka bagat sara Ketsat leu sita sangamberita turau bailiu sara tubu, ele tai Yahudi, ele bangsa begei, ele pagugulet ele ta pagugulet; samba sangamberita tupalo sibara ka sara Ketsat. 14Aipoi tubu leu ta sara laddounia, tapoi maigi. 15Ke ikua bai rere, "Kalulut ta kabei aku, ta tuaddeake aku rubeiat tubu," ta kalulut nene taibailiunangan nia rubeiat tubu. 16Samba ke ikua bai talinga, "Kalulut ta mata aku, ta rubeiat tubu aku," ta kalulut nene taibailiunangan talinga rubeiat tubu. 17Ke sangalio tubu bai mata, kaipangan le pasiarep? Ke sangamberi bai talinga, kaipangan le pasiping? 18Tapoi aipagalakngan Taikamanua sangamberi laddou ka kudduatda senenda ka tubu siripot teu bagania. 19Ke sangamberinia bai sangaladdou, kaipangan le tubu? 20Bulatnia maigi laddou, tapoi tubu sara le. 21Oto ta momoi ikua mata ka kabei, "Ta anai kauku ekeu." Ele ute masikua ka rere, "Ta anai kauku ekeu." 22Bailoknia laddou tubu addeakenen si ta paluluat, ia le bulat abeu kauta nia. 23Samba laddou tubu addeakenen ta bulat suruket, kau tasuru nia simakope; samba laddou tubuta simagulai lainge, tapasikeli simakope. 24Tapoi laddou tubuta simalainge geti ta leu makope tupasikeli. Aipagalakngan Taikamanua tubuta kele kise, bule laddou tubu sitaimalatsat, tusuru simakope, 25bui ibara pasaraat ka bagat tubu, tapoi sangamberi laddou pasopo pasasambada. 26Ia te lulunia ke masiorik sara laddou, sangamberi laddou le masiorik; ke tusuru sara laddou, sangamberi laddou le muangka baga. 27Kam sangamberimui te tubut Kristus samba senemui laddounia. 28Samba ka bagat paamian, airioakean piga pa Taikamanua: siboiki tai apostel, sikarua tai nabi, sikatelu tai guru. Ia geti sia sisilo panguruat masigalai kiseiet, masialeake, masirom, masipaneinei, samba manibo ka bagat sene ngamata nganga kiseiet. 29Sangamberida pa apostel, ele nabi, ele guru? Sangamberida pa masisilo panguruat masigalai kiseiet, 30ele masialeake, ele manibo ka bagat nganga kiseiet, ele masikolouake nganga kiseiet? 31Oto besiake kam masisilo panguruat bulat sabeu. Tapoi kusausau pei le ka kam enungan bulat simaeru.

will be added

X\