1 KORINTUS 11

1Ului le kam aku, kele aku masiului Kristus. 2Bulat kuumunake kam, aipoi ka bagat sangamberinia mariuriu le nurepdep kam aku samba nuukkaake kam nganturat sigelaiakenenku ka kam. 3Tapoi koba le bule nuagai kam pagalaiat nene, ia te Ute ka senen taimanteu ia te Kristus, ute ka tainanalep ia te simanteu samba Ute ka Kristus ia te Taikamanua. 4Senen taimanteu sipaninindou ele sipamomoiliat katuareman sibara ka Taikamanua sibara tutu ka ute, masipaloloi Kristus. 5Tapoi senen tainanalep sipaninindou ele sipamomoiliat katuareman sibara ka Taikamanua, sitaitabbo ute, masipaloloi simanteunia utenia, aipoi makere le nia ka sinanalep sisapu alai. 6Aipoi ke ta ioba itabbo utenia sinanalep, kau le isapu alainia. Tapoi ke ibailiu puailaat ka tainanalep itusapu alainia, ele tukirit, oto kau itabbo utenia. 7Simanteu geti ta leu itabbo utenia, lulut masipatoila tularat samba pulatsanan Taikamanua le nia. Tapoi sinanalep geti masipatoila pulatsanan simanteunia. 8Aipoi ta sibara ka sinanalep simanteu, sinanalep le sibara ka simanteu. 9Samba ta kalulut sinanalep aitubaraake simanteu, tapoi kalulut simanteu le aitubaraake sinanalep. 10Ia te lulunia sinanalep buita ipakei toggaiat gege ka utenia kalulut samalaika. 11Kenanen kisedda, ka bagat Tuhan geti, ta anai sinanalep ta pasamba simanteu, samba ta anai simanteu ta pasamba sinanalep. 12Aipoi kele sinanalep sibara ka simanteu, kisedda leu et simanteu sinutuakenen sinanalep; tapoi sangamberinia sibara ka Taikamanua. 13Paatu pei kam ka kam: Mateu pa sinanalep manindou ka Taikamanua si ta tabbot ute? 14Ta ainganturungan kam katukelat, puailaat le ka simanteu mualai simananta, 15tapoi ka sinanalep geti pulatsanan le ka tubunia ke mualai simananta? Aipoi alai atupanguruatnake ka tubunia silit panambo. 16Tapoi ke ai sioba pajoggolo, ta anai ka sita ele ka sapaamian Taikamanua arat kele kisedda. 17Ka bagat toneakenenku tuppainia nene, ta kuumunake kam, aipoi parurukatmui ta masibaraake katuerukat, masibaraake katukataikat le. 18Aipoi siboiki akuarep, ruru nuparuru kam ka pupaamianan, ai pasaraat ka talagamui, samba matonem bagaku kababarat nene. 19Aipoi ta momoi ta ibara pabaggeiat ka talagamui, bule imatoila kasei ka talagamui bulat Kristen sipulelelek. 20Ke paruru kam, ta bulat mukom Pukoman Sipunenan nugagalai kam. 21Aipoi ka pukoman, senen sirimanua paalau sikom kanna, pat ai simalaje, ai sabagei simapuineng. 22Ta pa anai lalepmui senemui, bule sedda nupukom kam samba nupulo kam? Ele noba nupaloloi kam paamian Taikamanua samba nupakaila kam si ta anai apa pa? Aponia kuanenku ka kam? Kuumunake pa kam? Ka bagat nene ta kuumunake kam. 23Aipoi sinegeakenenku ka kam, siniloku sibara kai Tuhan le, ia te: Tuhan Yesus, ka soibot katusegekatnia, alanangan roti, 24kuanangan sura; paabbonangan nia, kuanangan, "Tubuku te nene, sinegeakenen lulumui; galai kam nene, pasirerepdepmui Aku!" 25Kisedda leu et alanangan pulokat lepat koman, kuanangan, "Pulokat nene pakerekat baga sibau ka logauku te; galai kam nene pasirerepdepmui aku senen nulo kam nia." 26Aipoi senen nukom kam roti nene samba nulo kam ka pulokat nene, kamateiat Tuhan le nupopoiliat kam teret oi nia. 27Kasei masikom roti ele masilo ka pulokat Tuhan ka enungan sitaimateu, bailiu masele le nia ka tubu samba logau Tuhan. 28Ia te lulunia senen sirimanua kau le ilelekngake galai tubunia boiki, ia pei komnangan roti samba lonangan ka pulokat. 29Aipoi sipasikokom samba sipasilolo sitaipuletsei tubut Tuhan, masibaraake ukum ka tubunia le ikokom samba ilolo nia. 30Ia te lulunia maigi ka talagamui simasaggo samba simabesi samba ta magulai simamatei. 31Ke talelekngake tubuta ta leu tuukumake sita. 32Tapoi ke iorak sita ukum sibara kai Tuhan, masikiroi sita le, bule ta tuukum sita pasamba polak nene. 33Kalulut nene sasarainangku, ke paruru kam mukom, pangena kam pasasambamui. 34Ke ai simalaje, kau ipukom boiki ka lalepnia, bui sikau kam tuukum parururumui. Bagei geti, amoian geti aku kolouakekungan nia ka kam.

will be added

X\