1 KORINTUS 10

1Koba le nuagai kam nia sasaraina, taikebbukatta siburu aikunemi sia tanairusa samba sangamberida masitalipoki koat. 2Ibailiu sia sipasitutut si Mose sangamberida aturauan ka bagat tanairusa samba ka bagat koat. 3Sangamberida mukom kan puketsanan simakere 4samba sangamberida mulo lo puketsanan simakere, aipoi sangamberida mulo ka bukku bulak puketsanan sipasitutut sia; bukku bulak nenda ia te Kristus. 5Tapoi kenanen kisedda maigi ka talagada taioobaket Taikamanua, ia te lulunia aramasubu ka simatangeu. 6Sangamberinia nene sibailiu itcoket ka sita, masiparepdep sita, bui taoba masigalai sikatai kele sigalaira. 7Samba bui leu ibailiu sita sibuluji buluat kele piga pa ka talagada, kele sitususurat, "Kuddu sia bangsa nene mukom samba mulo; lepa suru sia muturu." 8Bui tagalai puuumun, kele sigalaira piga pa ka talagada, bailiu matei sia ka bagat sangagogoi rua pulu telu ribu sirimanua. 9Samba bui tasibo si Tuhan, kele sigalaira piga pa ka talagada, bailiu matei sia ipapilaiji ulou. 10Samba bui nupungungu kam, kele sigalaira piga pa ka talagada, bailiu isubuake sia malaika sipasilalango. 11Sangamberinia nene muaili ka tubuda sibailiu itcoket samba tusuratnake sibailiu repdemen ka sita sipuririmanua kineneiget ka bagat tetere aiailingan kalepakat polak. 12Oto kasei ipaatu amaronan ipurio, kau ipagaba tubunia bui ibele. 13Pasisiboat siorikmui, pasisiboat simareirei le, sitaisaliu ron sirimanua. Katoneman poi Taikamanua, ta ioobaake itusibo kam sisaliu ronmui. Ka teteret tusibo kam iaake enungan kabelaiat, oinangan nuom kam nia. 14Oto sasaraina kilibet bagaku, kaddiuake kam pasibubuluji buluat! 15Ka kam simaagai paatuat le kupaninibo. Paatu le kam sikuaku nene! 16Loketta ka pukoman sipunenan, suraakenenta nenda, ta pa patabbaratta ka logau Kristus? Samba roti paabboketta, ta pa patabbaratta ka tubut Kristus? 17Kalulut roti sara le, sita leu kenanen maigi sita, sara tubu le, aipoi sangamberita masisilo rubeiat ka bagat sara roti. 18Itco le kam bangsa Israel siripot akkula. Sia sipasikokom sibuluakenen, ta pa amusarangan sia ka meja pasibuluat? 19Apa katukolobatnia sikuaku nene? Sibuluakenen nenda ai pa kuanennia? Ele buluat ai pa kuanennia? 20Ta nia. Nene le: Sibuluakenenda ka sanitu le arabuluake nia, ta ka Taikamanua. Ta koba nupagalu kam tubumui ka sanitu. 21Ta momoi nulo kam ka pulokat Tuhan samba ka pulokat sanitu. Ta momoi nupurubeiat kam ka pukoman sipunenan Tuhan samba ka pukoman sanitu. 22Ele taoba pa tangoingoiake bagat Tuhan? Sita pei le pa maron ka Taikamanua? 23"Sangamberinia le momoi." Aisesengan, tapoi ta sangamberinia ai kauta nia. "Sangamberinia le momoi." Aisesengan, tapoi ta sangamberinia masipaeru. 24Bui bara kasei pa masipasikeli sarat uktuk tubunia, tapoi kau leu ipasikeli uktukda sabagei. 25Sangamberi sinakiakenen ka pasakiat, kom kam, ta leu tupaatu apa pa kalulut agai baga. 26Aipoi: "Polak nene samba sangamberi ka bagania si Tuhan le sibakkatnia." 27Ke rarauma kam sitaimatonem baga, samba nusilo kam pasogaiatda, apa sinattatnakenenda ka matamui kom kam, ta leu tupaatu apa pa kalulut agai baga. 28Tapoi ke ai sipasikukua ka matamui: "Akkula nene atubuluakean ka buluat!" bui nukom kam nia, nia le poi amasikua ka matamui samba kalulut agai baga. 29Agai baga sikuaku nene ta te agai bagam saram, tapoi agai bagada sabagei. Ele ai pa sipasikukua, "Angoi iteuake agai bagada sabagei puujaatku? 30Ke akusuraakean nenda sikopku, apa lulu rakua sikatai ka tubuku, kalulut komen sisuraakenenku?" 31Oto ke mukom ele mulo ekeu, ele apa pa nugalai, sangamberinia galaiake sibailiu katulatsanan Taikamanua. 32Bui nubaraake kam kabelekat baga, ele ka tai Yahudi ele ka sabangsa bagei, ele ka sapaamian Taikamanua. 33Kele ke kaku kuangkaake bagada sangamberi sirimanua ka bagat sangamberinia, ta masibesiake puuktungan tubuku, tapoi uktukda sirimanua simigi le, bule rasese puaragat.

will be added

X\