1 KORINTUS 1

1Sibara kai Paulus, sinogai bailiu apostel Kristus Yesus ka teu bagat Taikamanua, samba sibara kai Sostenes sarainanta, 2masiailiake paamian Taikamanua ka Korintus, sia sipuneni ka bagat Kristus Yesus, sioniakenen sipunenan sambada sangamberi sirimanua ka senen kudduat, sipasisosogai onin Tuhanta Yesus Kristus, Tuhanda samba Tuhanta. 3Kiliu baga samba aban sibara ka Taikamanua, Ukkuita samba kai Tuhan Yesus Kristus masipaalei kam. 4Sarat kukua sura ka Taikamanuangku kalulut kam, kurepdep kiliu bagat Taikamanua sipanguruatnakenennia ka kam ka bagat Kristus Yesus. 5Aipoi ka bagat Kristus, amakayongan kam ka bagat sangamberinia: ka sene ngamata tiboiet samba sene ngamata puaagai, 6sedda te imatotoila pasimunengan pagalaiat Kristus bulat amaronan ka kam. 7Taan te anai simagulai ka kam panguruat apa pa ka pangenaatmui katutoilakat Tuhanta Yesus Kristus. 8Nia leu masiparoron kam teret kalepakatnia, bailiu kam malina ka gogoi kaoijanan Tuhanta Yesus Kristus. 9Taikamanua, sipasisosogai kam ka pasambaat Togania Yesus Kristus Tuhanta, Taikamanua katoneman le. 10Tapoi kunganturu kam sasaraina ka onin Tuhanta Yesus Kristus, bule sisara tiboiet kam sangamberimui, bui ibara pasaraat ka kam, kau le imaron nupusara kam, sikere baga samba sikere paatuat. 11Arasegeake poi ka mataku tai Klo"e pagalaiat kam sasarainangku, kababarat pajoggolat ka talagamui. 12Nene le kukukua, aipoi senemui masikua, "Si Paulus le kutut kaku," sabagei masikua, "Kaku si Apollos," sabagei masikua, "Kaku si Kepas," sabagei, "Kaku Kristus le kutut." 13Atuparubei pa Kristus? Atusiliktengaake pa si Paulus punu tubumui? Ele ka onin Paulus pa aiturau kam? 14Sura le kukua, kalulut ta anai kam beri sara akurau, sarat si Krispus samba si Gayus le; 15bailiu ta anai sipasikukua, ka oningku le aiturau kam. 16Samba sia ka lalep Stefanus aku leu airau sia. Bagei geti taan kuagai, ele ai pa akurau. 17Aipoi ta masirau aikoiniake aku Kristus, masipaarep Katuareman Simaeru le; beri nenda ta ka agai mutitiboat, bui ipusiboboi siliktengan Kristus. 18Aipoi katuareman pagalaiat siliktenga, putaiagaiat paatuat le ka sia sieei ka pulangokat, tapoi ka sia siarauakenen, ron Taikamanua le nia. 19Atusuratnakean poi ka Surat Sipunenan, "Kupepeake le sikut paatuatda simasiku paatuat, samba puaagaira simaagai paatuat kutatataake le." 20Kaipa sia simasiku paatuat? Kaipa sia siagaisurat? Kaipa sia sioba pajoggolo ka polak nene? Ta aibailiuakean Taikamanua pusikuat polak nene bailiu putaiagaiat paatuat? 21Kalulut sikut paatuat Taikamanua, ta momoi raagai Taikamanua taikapolak ka sikut paatuatda, obanangan Taikamanua iarauake simatonem baga kalulut ngantoman Katuareman Simaeru addeakenenda taikapolak putaiagaiat paatuat. 22Tai Yahudi masikiddi kerek, tai Grika masigaba sikut paatuat, 23kai geti Kristus siniliktengaakenen le kupaarep kai; sibailiu kabelekat baga ka tai Yahudi samba ka sabangsa bagei putaiagaiat paatuat. 24Tapoi ka sia sinogai geti, ele tai Yahudi, ele ta tai Yahudi, Kristus ia te ron samba sikut paatuat Taikamanua. 25Aipoi putaiagaiat paatuat Taikamanua ia pei le maron ka sikut paatuat sirimanua samba putataimaron Taikamanua, ia pei le maron ka sirimanua. 26Repdep le kam sasaraina, pagalaiat tubumui, ka teteret atusogai kam: siripot kirekat sirimanua ta maigi kam simasiku paatuat, ta maigi simagege, ta maigi siabeu tiboi tubu. 27Tapoi sitaimaagai paatuat ka polak nene le aipili Taikamanua masipakaila sia simasiku paatuat, samba sitaimaron ka polak nene aipili Taikamanua masipakaila simaron. 28Sigoiso tiboi tubu samba loloietda taikapolak ipili Taikamanua; bulatnia sitaiaaddeakenen ipili Taikamanua masiputata addeakenen, 29bui bara kasei pa siumunake tubuna ka matat Taikamanua. 30Sibara ka Taikamanua le poi aikau kam musara ka Kristus Yesus, sibailiu sikut paatuat ka sita, siparoipo, sipuneni samba sipasitetebui sita. 31Bule kele sitususurat ka Surat Sipunenan, "Kasei masiumun tubu, kau ipasiumun tubu ka bagat Tuhan."

will be added

X\