ROMAN 8

1Cun ah kya sei Jesuh Khrit ung kawng ät ne om ciah chang gui cu Khanpughi ah shet m'kat nak phiawn nak ci gui. 2Cun ah kya sei Jesuh Khrit ung na kawng ät sak ciah Mumcha ah thukhän naw, kat nak la sih nak ah thukhän ung, kei cu na phiawn sak pyi ci nei. 3Hnicim chang ak tha kä om sei, thukhän naw kä a bi peit hlawt cu Khanpughi naw bi pyi ci nei. Khanpughi naw hnicim chang ung om ciah kat nak cu m'kat khai ah Ahtapa cu zuk m'kyum lawk ci. Ahtapa cu kat nak k'täm ne m'di khai ah, hnicim chang ah mäih ah kat nak nupuk nah ne ng'tüi lawk ci. 4Khanpughi naw cun ah abi cu hnicim chang nupuk nak ciah kä kya ne, Mumcha ung ghing ciah, mik mi naw thukhän ah ng'düng sei mi läk vai ah hmawk ah kyak ci. 5Hnicim chang nupuk nah ne ghing ciah chang gui cu, hnicim chang ah ng'zak hlü bängbäng ngaih tüh ci gui, Mumcha ah m'cäi m'ä ah ghing ciah chang gui cu, Mumcha ah ng'zak hlü bängbäng ngaih tüh ci gui, 6Hnicim chang ah ng'zak hlü bäng ngaih tüh ciah chang cu sih nak ung gawk ci, Mumcha ah ng'zak hlü ngaih tüh ciah chang cu ghin nak la dimdeeih nak gah ci. 7Hnicim chang ah ng'zak hlü bäng ngaih tüh ciah chang cu Khanpughi ah gaa ah kyak ci, ani naw Khanpughi ah thukhän kä läk hlawt ci, akcang ah kä läk hlawt ci. 8Amät ah hnicim chang ah ng'zak hlü ah läk ciah chang cu, Khanpughi naw kä m'tamkhah hlawt ci. 9Cun ung phi Khanpughi ah Mumcha cu nang mi ung akcang ah om ciah a kyak ung, hnicim chang ah m'cäi ah kä om u ne, Mumcha Theing ah m'cäi ah nami om vai. Bawi Khrit ah Mumcha ah kä om nak ah chang cu Bawi Khrit awn kä ng'phaa ci. 10Nangmi ung Bawi Khrit cu akcang ah om ciah a kyak ung, nami pumsa cu kat nak awn sik khai ah a kyak tu pang ung phi. Mumcha naw ning ghin sak gui khai, a i ah kya sei ci ung nang mi cu Khanpughi ung ng'düng nak nami gah pyi ciah a kyak ah hmawk ah kyak ci. 11Bawi Jesuh sih nak ung kaa thawh ba sak ciah Khanpughi ah Mumcha cu nang mi ung akcang ah om ciah a kyak ung, Bawi Khrit sih nak ung kaa thawh ba sak ciah Bawipa naw, amät ah Mumcha awn sih thei ciah nami pumsa cun phi ghin sak khai nei. 12Cun ah kya sei phäi nau gui aw, mik mi cu hnicim chang ah ng'zak hlü ah kä mi om ne, Khanpughi ah Mumcha ah m'cäi ah mi om khai nei. 13Nang mi cu hnicim chang ah ng'zak hlü ah nami om ah a kyak ung nami sik khai nei, cun ung phi nami shetkat nak cu Mumcha Theing awn nami sih sak ah a kyak ung ghin nak nami gah khai nei. 14Khanpughi ah Mumcha ah lam shüm nak läk ciah chang cu Khanpughi ah Hta ah kyak ci. 15Khanpughi ah ning peit gui ah Mumcha naw nang mi cu Khlei-htein ah kä ning k'hmoh gui ci, kyih ah phi kä ning kyihkyawk sak gui ci. Mumcha naw mik mi cu Khanpughi ah hta gui ah na piang gui sei, Mumcha ah na peit gui ah hlüngtai nak awn Khanpughi cu, “Ka Pa, Ka Pa,” ci ne khü tu vai ah mi khin tuk ci. 16Mik mi cu Khanpughi ah hta gui ah mi kyak ah mawng ang dang vai ah Khanpughi ah Mumcha naw, mi mumcha cu ng'khap püi ci. 17Mik mi cu Khanpughi ah hta gui ah mi kyak ci kya sei, aë chang gui ah hmawk ah Khanpughi naw am hnüt ah hrilham cu mi khäm khai. Bawi Khrit ah hmawk ah Khanpughi naw am hnüt ah bäkhäk nak cun phi mi khäm tuk khai. Mik mi cu Bawi Khrit awn atäng ah gein vai nak mi gah ah a kyak ung, ani awn atäng ah bämang nak phi mi gah khai. 18Tuk bäi chü mi bui aut ah gein vai nak cu, Khanpughi naw a na peit law gui vai ah bämang nak awn kä tutäng khai ciah kei naw ka zum ci. 19Khanpughi naw ahta gui am, am dang gui vai ah amawng gui cu, a tüi pian avan naw ang htei ah ging co ci gui. 20Khanpughi naw a tüi pian avan cu alä k'ding ah kyak khai ah m'shetkat ci. Cun ah abi cu khomdek khan ah ng'zak hlü ah kä kyak ci, Khanpughi ah ang zak hlü ah kyak ci. Cun ung phi ngaih u nak om ci; 21Cun ah ngaih u nak cu, kho hnüüp ät ung a tüi pian gui naw khihpawn didap nak ung kaa phiawng ne, Khanpughi ah hta gui awn atäng ah bämang lünlawi nak ami gah vai ah hmawk ah kyak ci. 22Mi van naw mi hmat zawp ah tuh bäichü a khin ung, a tüi pian gui avan cu, nau poi m'neh ah mäih ah nat nak om ci. 23A tüi pian ah khomdek khan bäng ah kä kyak ciah, Khanpughi naw ak htük bäih ah a peit ah Mumcha gah ciah mik mi cun phi, Khanpughi ah hta ah kyak nak vai la, mi pumsa avan hun nak a gah nak vai cu, mi ging ne mi geinvai ci. 24Mik mi cu ngaih u nak awn hun nak mi gah ci. Cun ah mi ngaih u cu mik mi naw kä mi hmuk ci, mi hmuh ah a kyak ung cun cu akcang ah mi ngaih u ah kä kyak ci. Mik awn hmuh ei cu a u naw ngaih u khai ang! 25Mik mi naw kä mi hmuh cu m'lung üp ne mi ngaih u ne, hnimgei nak awn mi ngäng ci. 26A cun sang ung Mumcha naw ak tha ken ciah mik mi cu nam htei gui khai ah gawk lawk ci. Mik mi naw a i chaa taigü vai kä mi hmat ci;m'gawng shai awn kä pyein thei vai ah ak aw awn, Mumcha amät naw, mik mi ah hmawk ah Khanpughi ah na ng'zoih pe gui ci. 27Chang gui ah m'lung kyong hmu thei ciah Khanpughi naw Mumcha ah m'lung ngaih cun phi hmat zawp ci. A i ah kya sei ci ung Mumcha naw Khanpughi ah ang zak hlü ah, ak chang gui ah phäh ah ang zoih ah hmawk ah kyak ci. 28Khanpughi m'hni u sei ang zak hlü ah a khü gui ah chang gui naw, ami bilawh nak ung kaa ng'dang lawk khai ah, Khanpughi naw ngahmi awn atäng ah abilawh cu mi hmat ci. 29Khanpughi naw a ghü ah chang gui cu, Ahta ah mäih ah ami kyak vai ah m'cha ne m'hnüt ne om sak gui ci. Ahta cu ng'phäi nau gui akda ung, ang vai pi ah a kyak vai ah hmawk ah cun ah a ci ah kyak ci. 30Cun ah kya sei Khanpughi naw ghü ne ak pai gui cu khü gui ci;a khü gui ah chang gui cu amät ung chang düng ah k'bäi gui netah, amät ah bäkhäk nak cun phi gah sak gui ci. 31Shin ah amawng gui avan cu teng ah a kyak ung, Khanpughi cu mik mi lam ah a om ung a u naw na hnu ng'tuk püi gui hning khai ang! 32Khanpughi naw amät ah Htapa cu kä ng'vang nah ne, chang van ah hmawk ah pe ne, na küikyan gui ci nei. Ahtapa hngaw mik mi ah hmawk ah pek ciah Khanpughi naw, apäng avan cu, kä ng'vangca ah kä na pe gui ne kä om khai nei. 33Khanpughi naw a ghü ah chang gui cu a u naw m'kat gui khai ang! Ngahmi ung kat nak kä om ciah Khanpughi amät naw m'dang pyi ci nei. 34Cun ah kya sei ngahmi cu a u naw kä m'kat gui hlawt ci. Sih nak bäng ah kä kyak ciah sih nak ung kaa tho ba ciah Jesuh Khrit naw Khanpughi ah ak pat lam ah ngoh netah, mik mi ah hmawk ah ng'hui ng'paa ne om ci. 35Cun ah kya sei a u naw mik mi cu Bawi Khrit ah m'hni nak awn nam chaa gui hlawt khai ang! Zaica nak, cümbawng nak, k'dukdeiu nak, cawigha nak, pyamthaam nak, gaa kyih nak la sih nak; cun gui naw Bawipa ah m'hni nak awn nam chaa gui hlawt khai maa! 36Cacim Theing ung; “Bawipa ah Hmawk ah Kei mi cu, ak hnüüp pum ung, sih nak gaa awn kami ng'aut ci nei; Ngawn vai ah ami k'bäi ah htome ah mäih ah, Chang naw kei mi cu na ngai gui ci nei”, ciah om ciah mäih ah kyak ci. 37Kä ng'chaa bäng ah kä kyak ciah, a cun ah mawng gui avan awn ng'aut law nak ung, mik mi nam hni gui ciah Bawipa naw khüt sei, näng nak cu mi gah ci. 38Cun ah kya sei, a i naw phi mik mi cu Bawipa ah m'hni nak awn kä nam chaa gui hlawt khai:sih nak la ghin nak ka phi kya, khan chang gui la khankhaw uk ne hlüngtai ci gui ah phi kya, tuh chü mawng nak ah phi kya, ngawi ah ma nak vai ah phi kya, 39m'dek ah khan ah phi kya, m'dek ah kaa ah phi kya, kho ah kaa ung a tüi sho avan naw phi kya; a i naw phi mi Bawipa Jesuh Khrit awn Khanpughi naw ana peit gui ah m'hni nak awn kä nam chaa gui hlawt khai, ci cu kei naw akcang ah ka hmat ci nei.

will be added

X\