ROMAN 7

1Phäi nau gui aw, nang mi cu thukhän nami hmat pyi ci kia ne tuk bäi ka pyein vai ah a mawng gui cu nami hmat khai nei. Chang cu a ghin zah ak chuih thukhän ah kyong ung om ci. 2Ceimah pyi ciah hnumi tumat awn m'tumtäng ah a kyak ung, cun ah hnumi cu a cei a ghin zah ak chuih ng'chungla nak ah thukhän ah kaa ah om ci. Cun ung phi a cei a sih ah a kyak läi ung ng'chu laa nak thukhän phiawn nak ciah kyak ci. 3Cun ah kya sei ani cu a cei ghing ne om lang sei, a hei pami awn ani om ba ah a kyak ung ani cu thuihmai chang ah pyein vai kyak ci. Cun ung phi a cei a sih läi ung, ani cu thukhän phiawn na pyi ci kya sei, a hei pami awn ani ng'chulaa ba ung thuihmai chang ah pyein vai ah kä kyak ci. 4Phäi nau gui aw, shin ah mawng cu nang mi awn phi ng'lüng ci nei. Nang mi cu Bawi Khrit ah pumsa ah nami kya pyi ci kya ne, thukhän ung nami ghin nak cu si pyi ci nei. Khanpughi ah khuut bi nak ung hnüntho ciah mi kyak nak vai ah sih nak ung ka tho ba ciah BawiKhrit ah chang ah nami kya pyi ci nei. 5Mik mi cu khomdek pumsa ah ng'zak hlü ah ghing ne mi om zah ung thukhän awn lawk ciah shetkat nak hlü ah m'lung naw mi pumsa kyong ah bi bi ne, mik mi cu na sih sak gui ci. 6Zanä na khitpawng gui man ciah thukhän cu mi sih püi pyi ci kya sei, tuk bäi mik mi naw thukhän cu mi phyawn ah pyi ci nei. Tuk bäi mik mi cu gu ne pian ah thukhän lam k'phyim awn kä kyak ciah, Mumcha ah pian ah lam k'thai awn Khanpughi ah khuut cu mi bik ci nei. 7Cun ah a kyak ung thukhän amät cu kat nak ah mi pyein khai ang!Cun ah kä kyak ci!Cun ung phi kat nak cu a i ang, ci cu thukhän naw na hmat sak ci. A vaisü ah, “chang ah khawh kä ng'zak hlü düt vai,” ciah thukhän naw kä a pyein vai sü ung, ng'zak hlü nak düt ah mawng cu kei naw kä ka hmat khai sü te, 8Kat nak naw mik mi am cun ah thukhän cu na shüm sak gui ne, mi m'lung kyong ah ng'zak hlü nak a hlühlü cu dang sak ci. Thukhän kä a om ung kat nak cu ak si ah kyak ci. 9Kei ka mät phi thukhän cu kä ka hmat man ci, thukhän ka hmat law vai am tün ne, kat nak cu kei ung ghing lawk ci. 10Cun kawn ah kei cu ka sik ci. Kei naw ka ghing nak vai ah pyein ah thukhän naw kei cu na sih sak ci nei. 11Kat nak naw lam shui ne thukhän am'dang nak awn kei cu na sih sak ci nei. 12Cun ah kya sei thukhän cu theing cim ci, thukhän cu ng'cim ne, ng'düng ne, nik ci. 13Cun ah a kyak ung akni naw kei cu na sih sak ne ang! Cun ah kä kyak ci, Kei na sih sak ci cu kat nak ah kyak ci, kat na cu kei ah ka nupuk ng'tüipüi ah ang dang vai ah, ak ni cu mang ne kei cu ana sih sak ah kyak ci. Cun ah kya sei kat nak a i hlawk ah ashetkat ah mawng cu thukhän awn hmat ah kyak ci. 14Thukhän cu mumcha lam ah kyak ciah mi hmat ci, cun ung phi kei cu kat nak ah khlei-htein, chang ah hta ah ka kyak ci. 15Kei naw a i ka bi cu kä ka hmat ci. A i ah kya sei ci ung, kei naw ka bi hlü cu kä bi phung ne, kä ka ng'zak hlü bängbäng cu ka bik ciah kyak ci. 16Kei naw kä ka bi hlü bängbäng te, ka bik ciah a kyak nak awn, thukhän cu ng'düng ciah kak bäi ci. 17Cun ah kya sei kei naw ka bilawh gui bik ci cu kei akcang ah kä kyak ci;kei ah m'lung kyong ung ghing ciah kat nak ah bi ah kyak ci. 18Hnicim chang ah ka kyak ciah kei ung akni kä om ciah kei naw ka hmat ci. A i ah kya sei ci ung kei naw akni ka bi hlü ung phi, akni cu kä ka bi hlawt ci. 19Kei naw ka ng'zak hlü ah akni cu kä bi hlawt ne, kä ka ng'zak hlü ah akshe bängbäng cu ka bik ci. 20Kei naw kä ka ng'zak hlü bängbäng ka bi cu, kei ah bi ah kä kyak ci, kei ah m'lung kyong ung ghing ne om ciah kat nak ah bi ah kyak ci. 21Cun ah kya sei thukhän ah bi nak ung kei naw ka hmuh cu, Kei naw akni ka bi hlü nak awn, akshe bängbäng ghü ne ka bik ciah kyak ci. 22Khanpughi ah thukhän cu kei ah m'lung kyong naw zeikiai ne dou ci. 23Cun ung phi kei ah pumsa kyong ah kei ah m'lung ngaih ah ng'zak hlü awn ng'kükneet ng'tu ng'aat ciah thukhän ah mawng tumat om ci. Cun cu kei ah pumsa kyong ah hnüntho law ne, kei cu kat nak ah thawng khui ah na chum ci. 24Kei cu ang htei ah kam lung thüi aih ci nei, Kei na sih sak ciah shin ah pumsa ung kaa a u naw kei cu na hun tuk khai ang! 25Mi Bawipa Jesuh Khrit awn na hun gui ciah Khanpughi ah m'gein nak cu hlüngtai aih ci nei. Ak hnu ah ka mät ah mawng ka pyein hlü cu, Ka m'lung kyong awn Khanpughi ah khuut ka bi sang ung, ka hnicim chang nak naw kat nak ah bi cu ka bik ci nei.

will be added

X\