ROMAN 6

1Cun ah a kyak ung a i ah pyein vai ang! Khanpughi ah m'geinsei nak a däm law pi vai ah kat nak cu bi lä vai maa! 2Cun ah kä kyak ci nei, kat nak mi hnu nah pyi ciah chang cu, a i ah kya sei kat nak ung mi ng'len ba lä vai ang! 3Nang mi naw akcang ah nami hmat vai cu, mik mi cu Bawi Khrit Jesuh awn kawng ät nak ah tui mi ng'hnim nak awn, ani awn atäng ah mi si tuk ci ah kyak ci. 4Cun ah kya sei mik mi cu tui hnim nak awn Bawi Khrit awn atäng ah mi ng'phuh ne, ani awn atäng ah mi sik ci. Cun ah ani awn atäng ah mi sih ah mawng cu, Pa Khanpughi naw abäkhäk hlüngtai nak awn Bawi Khrit cu sih nak ung kaa a thawh ba sak ah mäih ah, mik mi cu ghin nak thai ung mi om vai ah hmawk ah kyak ci. 5A i ah kyah sei ci ung, ani awn atäng ah mi sih tu ung, ani awn atäng ah sih nak ung kaa mi thawh tu ba vai ah hmawk ah kyak ci. 6Mi ghin nak k'phyim cu Bawi Khrit awn atäng ah kutlam tung ngawn pyi ah kyak ci. Cun ah kya sei kat nak awn be ciah mi m'lung kyong cu dimaih pyi ci kya ne, mik mi cu kat nak ah khlei-htein ah kä mi kya ba ci, ci cu mi hmat pyi ci. 7Bawi Khrit ung sik ciah chang cu shetkat nak phiawn nak ciah kyak ci. 8Mik mi cu Bawi Khrit awn atäng ah mi si pyi ci kya sei, ani awn atäng ah mi ghing khai ah, mi zum ci. 9Bawi Khrit cu sih nak ung kaa tho ba pyi ci kya sei, ani ung sih nak kä om ba phung khai, sih nak naw ani cu kä uk ba hlawt khai. 10Cun ah kya sei ani cu sih nak näng ci kya ne, kat nak ah hlüngtai nak naw ani cu kä uk ba hlawt sei, tuk bäi Khanpughi awn lünlawi ne ghing ne om ci. 11A cun ah mäih ah nang mi cun phi, sih nak näng ne, kat nak nawng shüt ne, Bawi Khrit Jesuh awn, Khanpughi ung lünlawi ne nami om vai. 12Cun ah kya sei nami pumsa ah ng'zak hlü ah kä nami läk en hlawt vai ah, kat nak naw nami pumsa cu käm khüt ten hlawt sä. 13Nami pumsa cu a i zah ung phi shetkat nak ah hmawk ah kä nami mang en vai. Cun nak vaisü ung, sih nak ung kaa ghing ba ciah chang gui ah kya ne, nami pumsa cu Khanpughi am nami ap vai, Düng nak ah amawng ung a ning mang gui vai ah pumsa la ghin nak avan cu, Khanpughi ung nami ng'ap vai nei. 14Kat nak cu nami bawimang ah kä kya en sä; nang mi cu thukhän ah kaa ah kä nami om ci, Khanpughi ah m'gein nak ah kaa ah nami om ci nei. 15Cun ah kya sei mik mi cu, kat nak ah kaa ah kä om ba ne, Khanpughi ah m'geinsei nak ah kaa ah mi om ci kya sei, kat nak mi bik khai ah mi pyein khai ang!cun ah kä kyak ci. 16Nang mi cu chang tumat ah khlei-htein ah kya ne nami ng'ap ung, a cun ah bawi ah khlei-htein ah nami kyak cu ak cang ah nami hmat ci. Nang mi cu kat nak ah khlei-htein nah nami kyak ung, nang mi ah gah vai cu sih nak ah kyak ci, Khanpughi ah ng'thu nami ngaih ung nang mi cu Khanpughi naw chang düng ah ning dou gui khai. 17Nang mi cu kat nak ah khlei-htein ah nami kyak man ung phi, tuk bäi nami gah ah m'theithang nak cu, nami m'lung kyong avan nawn nami läk ah hmawk ah Khanpughi cu kam hlüngtai ci. 18Nang mi cu kat nak ah khlei-htein nami phiawn nak kawn ah, ng'düng nak ah khlei-htein ah nami kya lawk ci. 19(Nang mi cu ng'thu thuuk kä hmat man uk ci sei, chang ah hmat zäi vai ah thu awn ka guk nei). A zan ä nang mi cu, cheishoh nak a hlühlü bi nak vai ah shetkat nak ah khlei-htein ah ng'khäm ne nami ng'ap ci. A cun ah mäih ah tuk bäi nangmi cu, theing cim ciah bi bi nak vai ah, ng'düng nak ah kaa ah khlei-htein ah kya ne ng'khäm ne nami ng'ap vai. 20Nang mi cu kat nak ah khlei-htein ah nami kyak zah ung ng'düng nak awn nami ng'tai ci. 21Cun zah ung nami bi lawh gui naw a i ah phi kä ning khüi ng'vong gui ci, cun naw tuk bäi ning lü ng'aa sak gui ne, ak hnu ah sih nak ung ning gawk sak gui ci. 22Cun ung phi nang mi cu tuk bäi kat nak ung kaa phiawng ne, Khanpughi ah khlei-htein ah nami kya pyi ci. Nang mi ah gah ah bämang nak cu, Bawipa am nami ghin nak ak be ah ap ne, ak hnu ah ang täi ghin nak nami gah ah kyak ci. 23Shetkat nak ah a phu cu sih nak ah kyak ci;Cun ung phi Khanpughi naw a phu kä m'hnüt vai ah am gein nak cu, mi Bawipa Jesuh Khrit ung kawng ät nak awn gah ah ang täi ghin nak ah kyak ci.

will be added

X\