ROMAN 4

1Cun kawn ah mi pughi Abraham ah mawng cu mi ngaih tüh khai. Ani ah buiaut law gui cu a i ang! 2Abraham cu amät a bilawh om ih nak awn Khanpughi ung ng'düng ciah a kyak vai sü ung, a ni ung khähghah nak vai om khai sü te; cun ung phi ani cu Khanpughi ah ma ah kä khähghah hlawt ci. 3Cacim theing ung, “Abraham cu Khanpughi zum ci, a zum nak awn Khanpughi naw, chang düng ah k'bäi ne dou ci,” ciah om ci. 4Chang tumat cu bi bi ne, ng'cheng a gah ah a kyak ung, cun ah ng'cheng cu ghüh ci naw a peit tu düt ah kä kyak ciah, gah khin ne a gah ah kyak ci. 5Chang cu amät ah bilawh om ih düt kä ngaih u ne, Khanpughi zum ne a ngaih u ah a kyak ung, Khanpughi naw ani ah zum nak cu ngaih pe ne, ani cu kat nak kä om ciah m'hnüt ne k'bäi ci. A cu chaa ah Khanpughi naw chang cu düng sak ne dou ci. 6Amät ah bilawh nak awn kä kyak ciah Khanpughi naw düng ciah chang ah a dou cu zeikiai nak om ci, ci ah mawng cu, David naw; 7“Cheishoh nak ung m'geinsei nak gah ci gui la, Shetkat nak ung hun phiawn nak gah ci gui cu, zeikiai nak om ci! 8A shetkat nak Bawipa naw kä a khei peit ah chang cu zeikiai nak om ci!” ciah guk ci. 9Shin ah David ah pyein ah zeikiai nak cu, vun-ah nak bik ci gui bäng ah gah ah kya ne ang! Cun ah kä kyak ci, vun-ah nak kä bi tuk ci gui naw phi gah tuk ci gui nei. Mik mi naw mi hmuh pyi ah cacim ung, “Abraham cu Khanpughi zum ci, a zum nak awn Khanpughi naw chang düng ah k'bäi ne dou ci. 10Cun ah Abraham cu chang düng ah Khanpughi naw k'bäi ne a dou nak ah khin cu, Abraham naw vun-ah nak abi kawn ah ang! kä a bi pha ung ang!, abi kawn ah kä kyak ci, kä abi pha ung ah kyak ci. 11Cun ah Abraham cu Khanpughi naw k'bäi ne a dou kawn ah vun-ah nak cu bik ci. Cun ah vun-ah nak abi ah mawng cu, Khanpughi naw Abraham ah zum nak cu hmu netah, vun-ah nak kä abi pha ung, chang düng ah k'bäi ne a dou cu saksi ah ng'dang khai ah am hnüt nak ah kyak ci. Cun ah kya sei Abraham cu vun-ah nak kä abi ung phi, Khanpughi a zum nak awn, chang düng ah k'bäi ne dou nak gah ci gui ah Pa ah kya lawk ci. 12Ani cu vun-ah nak bik ci gui ah Pa ah phi kyak ci. Cun kawn ah ani cu vun-ah nak bik ci gui bäng ah kä kya ne, mi pughi Abraham naw vun-ah nak kä a gah pha ung, Khanpughi cu zum ne, ghing ne om te ci gui cu thei tu gui ci gui ah Pa ah phi kyak ci. 13Khanpughi naw Abraham la a hta ng'shon am, khomdek khan a van cu na khäm khai ci ne shaitaak nak pek ci. Cun ah shai a taak cu, Abraham naw thukhän a läk ah hmawk ah kä kyak ci, Khanpughi a zum nak awn ani cu, Khanpughi naw chang düng ah k'bäi ne a dou ah hmawk ah kyak ci. 14A vaisü ah thukhän läk ciah chang naw vah shaitaak cu küm sei gah khai ah a kyak läi ung, chang ah zum nak phi a kholä ah kya ne, Khanpughi ah shaitaak phi a kholä ah kyak khai. 15Thukhän naw Khanpughi ah m'lung k'she nak cu m'dang ci; cun ung phi thukhän kä a om ung m'shekat nak phi kä om khai kyak ci. 16Cun ah kya sei Abraham ah hta ng'shon gui naw Khanpughi ah shaitaak, a phu kä peit ah ami gah vai cu ngaih gep khai ah, Khanpughi naw Abraham ah zum nak ah khan ah shaitaak nak a peit ah kyak ci. Cun ah shaitaak cu thukhän läk ci gui ah hmawk bäng ah kä kyak ci, Abraham ah mäih ah Khanpughi zum ciah chang gui ah hmawk ah phi kyak ci; a i ah kya sei ci ung Abraham cu mi van ah pa ah akyak ah hmawk ah kyak ci. 17Cun cu cacim theing ung, “Kei naw nang cu chang pakhui-van ah pa ah ka ning piang ci nei,” ci ne a pyein ah mäih ah kya ci. Cun ah kya sei Khanpughi ah shaitaak cu kümbe ci. Khanpughi cu Abraham ah ngaih u, sik ciah chang gui ghin ba sak ci la, kä ng'tüi om man ci gui ng'tüi om sak ciah Khanpughi ah kyak ci. 18Abraham cu a khaw m'vui ne a kyak zah ung phi Khanpughi cu zum ne ngaih u ci. Cun ah kya ne ani cu chang pakhui avan ah pa ah kya lawk ci. Cacim theing ung, “Nang ah hta ng'shon gui cu aisi k'chü ah püi khai nei,” a ci ah mäih ah kyak ci. 19Abraham cu a khokum phyaa law pyi sei a pumsa cu ak si ah mäih ah kyak ci, Sarah cun phi kä hta hning khai ah ghi pyi ci, cun ung phi Khanpughi a zum nak cu khäng htek aih ci. 20Ani cu a zum nak kä ng'hlat phung ci, Khanpughi ah shaitaak phi kä a ngaih gep nak kä om ci; a zum nak naw hlüngtai nak awn be sak sei, Khanpughi cu m'hlüngtai ci. 21Khanpughi naw a shaitaak ah mäih ah bik khai ci cu Abraham naw ak be ah zum ci. 22Cun ah a zum ah hmawk ah Khanpughi naw ani cu, chang düng ah k'bäi ne adou ah kyak ci. 23“Khanpughi naw ani cu chang düng ah k'bäi ne dou ci,” ciah thu cu Abraham ah hmawk bäng ah kä kyak ci; 24Mik mi ah hmawk ah phi kyak ci, a i ah kya sei ci ung, Jesuh mi Bawipa sih nak ung kaa thawh ba sak ciah Khanpughi cu, mi zum nak awn Khanpughi naw chang düng ah na k'bäi gui ne a na dou gui ah hmawk ah kyak ci. 25Khanpughi naw Bawipa Jesuh cu mik mi ah kat nak ah hmawk ah sih nak ung gawk sak ci, Khanpughi naw mik mi cu chang düng ah k'bäi ne ana dou gui vai ah hmawk ah sih nak ung kaa thawh ba sak ci.

will be added

X\