ROMAN 3

1Cun ah a kyak ung Jew chang gui cu khui hei chang gui ah mä bä tu ba u ne ang! Ngahmi naw vun-ah nak ami bi cu, a phuma mä om ne ang! 2A phuma läi cu akda om ci, a htük bäih ah Khanpughi ah ng'thu m'than cu Jew chang gui ung gawk law ma ci. 3Chang am shah cu pyein ah kä ami om ah a kyak ung,a cun ah phäh ah Khanpughi phi pyein ah kä om ciah kya thei khai ang! 4Cun ah kä kyak ci, chang ah hta van a hleeihlak ung phi Khanpughi cu ng'düng khenggeng ne om ci.Cacim ung, “Thu na pyein cu ng'düng bäbä ne, M'khoichaa nak na aut ung phi näng nak om khai nei,” ciah om ci. 5Mik mi ah cheishoh nak naw Khanpughi ah düng nak cu dang sak pi ciah a kyak ung, a i ah mi pyein khai ang! Khanpughi naw mi kat ana m'kat gui cu, Khanpughi cheishoh ciah mi pyein khai ang! (Cun cu chang gui ah thu man düt ah thu ah kyak ci). 6Cun ah kä kyak ci, Khanpughi kä a ng'düng ah a kyak ung, a i chaa khomdek khan cu m'khoichaa hlawt khai ang! 7A vaisü ah kei ah kä ng'düng nak naw, Khanpughi ah ng'düng nak cu dang sak pi ne, hlüngtai sak pi ciah a kyak ung, a i ah kya sei kei cu shekat ciah chang ah kya ne, hma m'kat nak cu ka gah ang! 8“Ak ni a gawk law vai ah ak she cu mi bi vai,” ci ne mi pyein khai ang! A cun ah mäih ah kei naw ka pyein ah pyein u ne chang am shah naw ng'thu gu na k'bün ne na kat nak ci gui nei. Cun ah chang gui cu ami gah vai ah mäih ah m'khoichaa nak gah khai gui nei. 9Cun ah a kyak ung mik mi Jew chang gui cu, chang khui hei gui ah mä mi ni kiom nak tuba ah a mawng om ne ang! A i phi mi nikiom nak tuba kä om ci, Jew chang gui la chang khui hei gui avan cu, kat nak ah hlüngtai nak kaa ah mi om ah mawng cu kei naw ka pyein pyi ah kiak ci . 10Cacim theing ung; “Ng'düng ciah chang tumat phi kä om ci, 11Akcang ah hmuhmat ciah chang tumat phi kä om ci, Khanpughi khawihnah ciah chang tumat phi kä om ci. 12Chang avan cu lam hma zawp ci gui nei, Chang avan cu atäng ah shekat zawp ci gui nei; Chang k'ni tumat phi kä om ci, tumat hta phi kä om ci nei. 13Ngahmi ah ami ng'thu m'kha cu, sih nak ng'cim hmun ah kyak ci; Ami m'lei awn thuvi hleeihlak ci gui, Ami m'gawng m'lei cu k'phyu m'äm ah mäih ah am äm om ci: 14Ami m'gawng cu shaila ng'plahtang, nget ngawng nak awn be ci, 15Ami khawlek cu chang ngawn nak vai ung zangkhai aih ci; 16Ami gawk nak päng ah ngahmi ah kut awn shetkat dimaih nak om ci; 17Ngami cu dimdeeih nak ah lam kä hmuk ci gui, 18Ngami ung Khanpughi kyih-aa nak ah m'lung api phi kä om ci,” ciah om ci. 19Thukhän ung om ciah thu gui phung cu, thukhän ah kaa ah om ci gui ah hmawk ah kyak ci, ci cu mi hmat ci. Cun cu hnicim chang gui naw thu m'kha ät phi kä pyein u sei, khomdek khan avan cu Khanpughi ah m'khoichaa nak ung a gawk vai ah kyak ci. 20Thukhän läk nak awn a u chang phi Khanpughi ah maa ah kä ng'düng hlawt ci; Thukhän cu chang gui ah shetkat nak dang sak ciah kyak ci. 21Cun ung phi Khanpughi ung chang gui ami ng'düng nak vai ah lam cu dang pyi ci nei. Khanpughi ung düng nak cu thukhän nawn na kä kyak ci, cun ah amawng cu Mose ah Thukhän la puorfet gui naw saksi m'dang ci gui. 22Khanpughi naw chang gui cu ami zum nak awn, Jesuh Khrit ung düng sak gui ci. Cun cu Khanpughi naw Bawi Khrit zum ciah chang phung ung abi ah kyak ci, a i ah kya sei ci ung, chang gui ung ng'lakmah nak a i kä om ci: 23Chang nüng nüng cu shekat u ne, Khanpughi ah bäkhäk nak cu kä gah ci gui. 24Cun ung phi chang gui hun gui ciah Jesuh Khrit ung, Khanpughi naw, aphu kä peit ah m'gein nak awn chang gui cu düng sak gui ci. 25Jesuh Khrit ah a sih nak awn chang gui cu, kat nak ung kaa ami phiawn vai ah Khanpughi naw, ani cu chang m'küi nak ah m'hnüt ne k'bäi ci. Chang gui cu ani ami zum nak awn kat nak ung kaa phiawn nak gah ci gui. Khanpughi naw cun ah abi cu, a i chaa ah chang gui ang düng sak gui ah mawng am dang nak ah kyak ci. Zanä akhin ung chang gui ah kat nak cu, Khanpughi naw hnimgei nak awn m'düm gui ci. 26Cun ung phi tuk bäi akhin ung Khanpughi naw, amät ah ng'düng nak cu am dang nak ah, chang gui ah kat nak cu, m'hnih sak gui ci. Cunah a bi nak awn Khanpughi naw, amät cu ng'düng ciah a kyak ah mawng la, Bawipa Jesuh zum ciah chang phung ang düng sak ah mawng cu m'dang ci. 27Cun ah kya sei mik mi mi khähghah nak vai om khai ang! a i kä om ci nei. A i ah kya sei ang! Thukhän mi läk u sei ang! Cun ah kä kyak ci, Khanpughi mi zum ah hmawk ah kyak ci. 28Chang cu a zum nak bäng awn vah Khanpughi ung ng'düng nak gah ci, thukhän läk nak awn gah ah kä kyak ci, ci cu mi hmat ci. 29Khanpughi cu Jew chang gui ah Khanpughi bäng ah kya ne ang! Chang khui hei gui ah Khanpughi ah kä kya tu ne ang! Akcang ah van ah Khanpughi ah kyak ci nei. 30Khanpughi cu tumat bäng om ci, Jew chang gui cu ami zum nak awn amät ung düng sak gui khai; a cun ah mäih ah chang khui hei gui cun phi ami zum nak awn amät ung düng sak gui khai. 31Cun ah a kyak ung mik mi naw Khanpughi zum nak awn thukhän cu mi nawng en ah kyak khai ang! Cun ah kä kyak ci, thukhän cu mi khän htek sak nak ah kyak ci nei.

will be added

X\