ROMAN 15

1Mi zum nak khäng htek ciah chang gui naw, azum nak ken ciah chang gui cu m'hteihtang gui vai kyak ci. Mi mät ah zeikiai nak bäng vai ah mi bi khai ah kä kyak ci. 2Mik mi mi van naw azum nak kä khäng htek tu phak ciah phäi nau gui, ami zum nak a khän htek law tu vai ah, ngahmi ah zeikiai nak la ni kiom nak cu mi piang khai. 3Bawi Khrit cu amät ah zeikiai nak vai a i kä bik ci, cun ah abi nak vaisü ung cacim theing ung om ciah; “Chang gui naw Bawipa ami k'shedam nak cu kei ami na k'shedam nak ah kyak ci nei,” a ciah mäih ah chang gui ah k'shedam nak cu gah ci. 4Cacim ung ami guk phung cu mik mi ami nam theithang nak gui ah kyak ci. Cun ah ami guk ah mawng cu, mik mi naw cacim ah na peit gui ah hnimgei nak la k'thamah nak awn m'lung üp ngaih gep nak a om vai ah hmawk ah kyak ci. 5Nang mi naw Bawi Khrit Jesuh ah lam shüm cu läk ne, m'lung ät ngaih ät awn nami om vai ah hnimgei nak la k'thamah nak ning pe gui ciah Khanpughi naw, nangmi cu ning m'htei gui sä. 6Cun ung vah nang mi naw mi Bawipa Jesuh Khrit ah Pa, Khanpughi cu k'aw tumat awn a kawng ät ah nami m'hlüngtai khai. 7Bawi Khrit naw nangmi cu a ning dou gui ah mäih ah, Khanpughi ah bämang nak ang dang vai ah tumat la tumat nami ng'dou tu vai. 8Kei naw ka ning m'thein gui cu, Bawi Khrit naw a ghin zah ung khuut abi nak cu, Jew chang gui ah hmawk ah kyak ci. Cun cu khanpughi bä ne ang khän ah mawng am dang nak la pu pa gui am khanpughi naw shaitaak nak a peit gui cu ng'düng ne bä khai ah abi nak ah kyak ci. 9Cun bäng ah kä kyak ciah Chang Pakhui hei gui naw phi amät ah chim'gein nak awn Khanpughi ami m'hlüngtai tu hlawt vai ah hmawk ah ani cu kyum lawk ciah kyak ci. Cacim Theing ung; “Cun ah kya sei kei naw chang khui hei gui ah ng'lung ah Khanpughi cu kam hlüngtai khai nei; Ng'äi awn ka m'hlüngtai khai nei,” ciah om ci. 10Cun kawn ah a pyein ba mä cu; “Chang pakhui hei gui, Khanpughi ah chang gui awn atäng ah Zeikiai vä,” ciah kyak ci. 11Cun kawn ah; Chang khui hei gui nami van naw Bawipa cu m'hlüngtai vä, Chang ah hta avan naw Bawipa cu m'hlüngtai vä,” ci ne pyein ba mä ci. 12Cun kawn ah Isaiah naw; “Jesse ah hta ng'shon tumat cu dang lawk khai nei: Ani cu khui hei chang gui uk gui khai ah lawk khai nei, Cun ah chang gui naw ani cu ak be ah ngaih u khai gui nei,” ci ne pyein ba ci. 13Zum ne ngaih u nak ah ang zung ah kyak ciah Khanpughi naw, ani ung nami zum nak awn, zeikiai nak la dimdeeih nak cu ning k'be gui sä. Cun ah kya sei zum ne nami ngaih u nak cu, Mumcha Theing hlüngtai nak awn, phung ghing ne ng'ghotai khai nei. 14Phäi nau gui aw, nang mi cu ni kiom nak awn be ne, hmuhmat nak phi küm sei, tumat la tumat m'theithang nak hning phi a om ah phäh ah ning ngaih gep gui ne ka zeikiai ci. 15Cun ung phi shin ah ca ung, am shah amawng ama gui ah mawng ung nang mi ka ning m'cäi nak gui ung, kei naw Khanpughi ah na peit ah akhin k'ni cu mang ne m'gäi nak awn ka guk nei. 16Cun ah m'gäi nak cu chang khui hei gui ah hmawk ah a khuut bi vai ah Bawi Khrit Jesuh ah chang shäm ah kyak nak ah kyak ci. Chang pakhui hei gui cu Khanpughi ah dou hlü ah khawihnah nak ah kyak ci. Chang pakhui hei gui cu Khanpughi ah dou hlü ah khawihnah nak ah kyak ciah, Mumcha Theing naw Khanpughi am a ap ah ami kyak law vai ah, keinaw k'taigü ah bi bi ne, Khanpughi ah kaa lawk ciah Thu Ni cu shäu ne ka pyein ci nei. 17Bawi Khrit Jesuh ung kawng ät nak awn, Khanpughi ah khuut ka bi hning ah phäh ah, kei cu khähghah ne ka zei ci nei. 18Chang khui hei gui naw Khanpughi ah ng'thu ami läk tu vai ah, Bawi Khrit naw ana bilawh sak ah mawng cu, kei naw m'gäi ne ka pyein khai nei. Cun ah Khanpughi ah ng'thu ami läk law tu cu, kei ah thu pyein la bilawh nak 19Cäicat vai ah cäi aih gui vai la ngaih khit gui vai, Mumcha Theing ag hlüngtai nak gui awn ah kyak ci. Cun ah kya sei kei cu, Jerusalem ung kaa naw Illirikam ung khüt sei, ka hteh nak phung la ka gawk nak phung ung, Bawi Khrit ah mawng Thu Ni cu ak be ah shäu ne ka pyein ci. 20Kei cu chang gui ah cawh nak pyi ah im hmun ung kä ka cokyang hlük ci, kei ah ng'bü nak cu, Bawi Khrit ah mawng kä ng'za tu phak ciah khohmun ung ah, Thu Ni cu shäu ne pyein vai ah kyak ci. 21Cacim theing ung; “Cun ah Bawi ah mawng cu, a u naw kä a pyein man ung phi, Ngahmi naw hmu tuk khai gui nei, Kä ng'za tuh man ciah chang gui naw phi hmat tuk khai gui nei,” ciah a pyein ah mäih ah kyak ci. 22Shin ah a mawng awn nang mi ah ka gawk law vai ah kei naw akda vei kak tha nak ci. 23Cun ung phi cun ah kho ung ka bi gui vai cu, tuk bäi ka bi pyi ci nei. Nang mi ah ka law vai ah cau pui tüi ne ka ngaih tüh ah mäih ah, 24tuk bäi ka law hning khai ah ka ngai ci nei. Kei cu Spain kho ah ka hteh lam ah, nang mi ah ka lawk khai ah ka ngai te ci, nang mi ah om nak ah a shäng ka om tu kawn ah, Spain kho ah ka hteh hlawt vai ah nami na m'hteihtang tu vai ka ng'za hlük ci nei. 25Cun ung phi tuk bäi hta kei cu, Khanpughi ah chang gui m'hteihtang gui vai ah, Jerusalem ah ka hteit khai nei. 26A i ah kya sei ci ung Macedonia kho la Achaia kho ah Khritha bum gui naw, Jerusalem ah pyamthaam ciah Khanpughi ah chang gui cu m'hteihtang peitaak gui vai ah ami k'bäi pyi ah hmawk ah kyak ci. 27Cun ah ami k'bäi cu, chang ah bi sak gui ah kä kyak ci, ami mät ah ngaih ah, ami mät ah m'gein nak awn ami bi ah kyak ci, pyamthaam ci m'gein tu vai cu ngahmi ah bi ah kyak ci. Jew chang gui naw, khui hei chang gui am, ami mumcha hrilham cu ami teipai tu gui ah kya sei, khui hei chang gui naw phi, Jew chang gui am ami pumsa hrilham cu, ami teipai gui vai ah kyak ci. 28Cun ah kya sei kei naw cun ah gahtang ah ngui gui cu, ngahmi am pe gui ne, ap nak gui ah mawng cu ka bi zawp kawn ah, Spain khaw ah ka hteh nak lam ah, nang mi ah om nak ah phi ka lawk khai nei. 29Kei cu nang mi ah om nak ah ka law ah a kyak ung, Bawi Khrit ah hrilham ak be law püi ne ka lawk khai ah kei naw akcang ah ka hmat ci nei. 30Phäi nau gui aw, Bawipa Jesuh Khrit mi zum nak la, Mumcha Theing ah na peit gui ah zumhni nak awn; kei ah hmawk ah kei awn atäng ah Khanpughi ah nami taigü tu vai ah ka ning khü gui ci nei. 31Judea kho ah kä zum ci ah chang gui ka phiawn nak gui vai ah kei ah m'hteihtang nak gui cu, Jerusalem a kaa Khanpughi ah chang gui naw zeikiai ne ami dou nak hning vai ah, nami taigü vai nei. 32Cun kawn ah Khanpughi naw ang zak hlü a om ung, zeikiai nak awn nangmi ah om nak ah law ne nang mi awn atäng ah lünlawi ne ka om tuk khai nei. 33dinggei nak ung mi zum ah kyak ciah Khanpughi cu, nami van awn atäng ah om sä, Amen.

will be added

X\