ROMAN 13

1Chang päng naw kho uk ciah bawi ah huham cu a läk vai nei. A i huham phi Khanpughi naw kä a m'hnüt ung kä om ci nei. Huham gah ne uk ciah khobawi cu Khanpughi naw m'hnüt ne am düih ah kyak ci. 2A u chang phi huham gah ne uk ciah bawi hnu ng'tuk püi ci cu, Khanpughi ah ng'thukhän hnu ng'tuk püi ciah kyak ci:cun ah bik ciah chang cu m'shetkat nak gah khai nei. 3Akni ah kä om ci naw a kyih vai kyak ci akni ah om ci naw akyih vai kä kyak ci. Huham om ciah bawi cu kä na kyih hlü ung akni ah na om vai nei, cun ung ani naw ning m'hlüngtai khai nei. 4A i ah kya sei ci ung, ani cu nang ah ni nak vai ah Khanpughi naw ak chang ah am düih ah kyak ci. Cun ung phi kat nak na bi ah a kyak ung ani cu na kyih vai, aniung akcang ah shet m'kat nak vai ah huham nak cu om ci. Ani cu Khanpughi ah chang shäm ah kya ne, kat nak bik ciah chang gui cu Khanpughi ah huham awn m'shetkat gui ci ah kyak ci. 5Cun ah kya sei nang cu Khanpughi ah m'shetkat nak kyih nak bäng awn ah kä kyak ciah namät ah m'lung kyong theing cim nak awn, uk ciah bawi ah huham cu na läk vai nei. 6Shin ah a mawng ung nang mi cu kphlam phi nami m'cu ci. A i ah kya sei ci ung, uk ciah bawi gui cu ami bi m'htei ne ami bi ah a kyak ung Khanpughi ah khuut bik ci gui ah kyak ci. 7Cun ah kya sei nang mi naw nami peit vai ah khin ci phung cu nami peit vai, a khawn m'cu vai ah a mawng om ciah phäh phung ah nami m'cu vai nei, uk ciah bawi gui ami van cu m'tamkhah gui ne nami chang m'sui gui vai nei. 8Nang mi tumat la tumat nami ng'zumhni tu ah kawn ah a i pupawn phi kä om men sä. A paw chang m'hni ciah chang cu thukhän läk ciah kyak ci. 9A i ah kya sei ci ung, “chang ah k'chuhta kä na kat püi vai, chang kä na ngawn vai, kä na m'guuk vai, chang ah khawh kä na ng'zak hlü düt vai,” ciah thukhän gui la a hei thukhän avan cu, “Na chang paw cu na mät awn m'täng ne nam hni vai,” ciah thukhän naw avan ak küm zawp ah kyak ci. 10Ak chang paw m'hni ciah chang cun naw, a i zah ung phi am hni ah shetkat nak vai cu kä bik khai nei. Cun kya sei ak chang paw m'hni ciah chang cu thukhän a van läk ciah kyak ci. 11Nang mi cu nami ih nak ung kaa nami thawh nak ba vai ah a khin gawk law ciah nami hmat pyi ci kya sei, ng'zumhni tu ne nami om vai. A i ah kya sei ci ung mik mi naw hun nak mi gah nak vai ah khaw hnüüp cu, mi zum law nak htük ah mä, ang et law pi k'täi ah hmawk ah kyak ci. 12Khaw ah mü nak ng'pyi law ne, khaw cu thai law ghi ghi ci nei. Cun ah kya sei mik mi cu, hnüp khui ah ng'zak hlü ah om ih nak gui cu mi nawng shüt ne, akdei ung gaa tuk nak vai ah li khim cu mi pawng püi khai nei. 13Mik mi cu akdei ung om ciah chang gui ah mäih ah ak ni ah mi om ih khai nei; auk tat nak, om k'she nak, plet beng nak, lü ng'aa nak, ng'tuk ng'ah nak, m'thüi m'khang nak gui cu avan mi nawng zawp khai nei. 14Bawipa Jesuh Khrit cu li khim ah mäih ah nami suisak vai nei, ng'tüipüi ah nami shetkat nak cu nawt heng u ne, mät ah ng'zak hlü düt ah kä nami om ih ba vai nei.

will be added

X\