THU PHLAAN 4

1Cun kawn ah ka mang ung Khanmawpi ah m'kawt ng'hmawng sei ka hmuk ci. 2Kei naw ka ng'zak htük ah phyungheng ah ng'gin ah mäih ah ng'ging ciah k'aw naw”, shin ung law ä, ngawi ah ng'dang lawk khai gui ah a mawng cu ka ning hmuh sak khai” ci ne pyein ci. A cun vai-am Mumcha cu kei ah khan ah gawk lawk ci. Khanmawpi ah mang kiaang tumat om ci, Cun ah kiaang ung mang tumat ngok ci. 3Ani ah hmai cu pyüü m'htak vai ah mäih ah pyü ci. Mang kiaang ah ang veing ung cüi ne ng'kah ciah zapi pawk ci. 4Cun ah mang kiaang ah ng'veing ung a hei mang kiaang m'ku-lei-phli om ci. Cun ah kiaang gui ung aghaampa sing m'ku-lei-phli ngok ci gui. Ngami cu a bawk bäng bäng sui u ne, ghui lukhu ng'büng bäng bäng ci gui. 5Mang kiaang ah kyong ung khaw lailäp ne ng'thüi ne ng'hmum kyeek ciah ak aw gui lut lawk ci. Mang kiaang ah maa ah Khanpughi ah Mumcha pachih ah kiak ciah mei im pachih cu däi ne khang ci. 6A cun ah mang kiaang ah maa ung pyüülung ah mäih ah vai ci cu om ci. Mang kiaang ah ng'veing ak kit päng ung khiküi paphli om ci. Cun gui cu ami hnu ami maa ah mik bäng ah kia ci gui. 7Ak htük bäih tumat cu phongkawng ah mäih lawk ci, ak hnih nak cu vantang ah mäih lawk ci;ak thum nak cu chang ah hmai ah mäih hmai nak ci, ak phli nak cu zong ciah vanbuk hmu ah mäih lawk ci. 8Cun ah khiküi paphli cu, ami ng'phia pachuk ci lawk ci, ami pum akpung akyong avan ung mik bäng ah kiak ci. Amü ak hnüüp ngami cu kä ng'düm phung ne ng'äi m'cu u ne; “Aktheing, aktheing, aktheing cu Bawipa nei, Hlüngtai pi säih ne, Zanta, tuhngawi, ngawi zä angta"i ghing ciah Khanpughi nei,” ci ne m'kümtou ci gui. 9Mang kiaang ung ngo ne, angtäi sei ghing ne om ciah Bawimang ah bühmang nak, hlüngtai nak, küikyang nak gui cu, khiküi paphli naw ng'äi m'cu ne m'kümtou ci gui. A cun päng ung, 10aghaampa m'ku-lei-phli naw angtäi ah ghing ne mang kiang ung ngok ciah, Bawimang ah maa ah m'khuukdong ne, khawihnah ci gui. Ngami naw mang kiaang ah maa ah ami lukhu gui cu m'shän u netah; 11“Kami Bawipa, Khanpughi, Nang naw ang tüi avan cu na tüisho ciah kia sei, Nang ah ng'zak hlü ah ang tüi cu ghing om ciah kia ci. Cun ah kia sei bühmang nak, küikyang nak, hlüngtai nak gui cu Nang awn khinkhaa ci nei” ci ne pyein ci gui.

will be added

X\