THU PHLAAN 17

1Khankhaw chang pachih ung kaa eikbei chih kawt ciah khankhaw chang tumat cu kei ah law netah, “Lawä! Tuinu gui ah pei ah ami sak ah mang gaw ah kiak ciah pletbeng ciah hnumi ami m'shetkat law cu ka ning hmuh sak khai nei. 2Khomdek ah khan ah ghangpughang gui cu, ani awn ng'zaw ng'pawm lä ci gui nei. Chang ah hta gui avan cun phi ani awn ng'zaw ng'pawm nak ah kiak ciah zu cu awktat ci gui nei,” ci ne pyein ci. 3Cun kawn ah khankhaw chang naw mumchaa awn kei cu bung ah na hteh püi ci. A cu ah khiküi asen ung ngok ciah hnumi nu cu ka hmuk ci. Cun ah khiküi ah pum avan ung Khanpughi ah thang shetsak ciah ming cu be ne ng'guk ci, khiküi cu alu chih law ne aki ghaa lawk ci. 4Hnumi nu cu asen la akshon ah kiak ciah sui cu sui ne, ghui ni, ng'mo ni, k'cünglung mi gui cu awi ci. Ani cu pletbeng nak ah kiak ciah m'shemshai nak awn be ciah ghui khap cu kawt ci. 5Ani ah amcalai ung, “Khaw ah kaa ung shemshai ne pletbeng ci gui ah nu, Babilon gawnu” ci ne thuuk ciah ng'thu awn ami guk ah kiak ci. 6Cun ah hnumi nu naw Khanpughi ah chang gui ah si la Bawipa Jesuh ung bekhüt u sei, ami ngawn gui ah chang gui ah si cu aw ne, awktat sei ka hmuk ci. Ani hmu netah kei cu ang htei ah cäi ne ka tu ci. 7Khankhaw chang naw, “A i ah kiasei na cäi ang? Cun ah hnumi nu ah thuuk ciah amanwg la ang cum nak ah alu chih law ne aki ghaa lawk ciah khiküi ah manwg cu ka ning m'thein khai nei. 8Cun ah khiküi cu, azan a ghin te ung phi tuhbäi kä ghing ba ci nei. Ani cu m'hteilung khui ung kaa lut law netah, m'di nak gah lawk khai nei. Khomdek khan kä a tüisho pha ge ung, ghin nak cauk ung ami ming kä guk tu ah khomdek chang gui naw, cun ah khiküi ami hmuh ah a kiak ung cäicat khai gui nei. Ani cu azan ghing te ci, tuhbäi kä ghing ba ci, cun ung phi ghing ne dang law ba khai. 9“Shin ah amawng ung cüivai vai la lunglang vai hlü ci. Lu chih cu hnumi nu ah ngoh nak ah m'htung chih ah kiak ci. Ghangpughang chih ah phi kiak ci. 10Ghangpughang pahmaa cu sih pyi ci gui, tumat ghing ne om zah ci, tumat cu kä dang law phak ci, ang dang law ung phi a shänghta vah uk tuk khai. 11Azan ghing te ci, tuhbäi kä ghing ba ciah khiküi cu akcheit nak ah ghangpughang ah kiak ci. Cun ung phi ani cu chih ung kaa tu ah kia ci, ani cu di law ge khai ah kiak ci. 12“Nang ah na hmuh ah aki ghaa cu, kä uk tu phak ci gui ah ghangpughang ghaa ah kiak ci. Ngami cu khiküi awn atäng ah nazi ät hta ung huham gah tuk khai gui ah kiak ci. 13Cun ah ghaa gui cu ami ng'bü nak täng ci, Ngami naw ami hlüngtai nak la huham cu khiküi-am ap ci gui. 14Ngami naw Htomehta cu ng'tuk püi khai gui. Cun ung phi Htomehta cu bawi nüng ah Bawi, mang nüng ah Mang (Ghangpughang nüng ah Ghangpughang) ah kiak ciah kia ne, ngami cu näng gui khai. Bawipa ah a ghü gui la bekhüt ne läk ci gui cu ani awn atäng ah näng nak gah khai gui,” ci ne pyein ci. 15Cun kawn ah khankhaw chang naw kei-am, “Nang naw na hmuh ah pletbeng ciah hnumi ah ngoh nak ah tui cu khaw nüng ung ahlü hlü ah ng'thu ci gui ah khui päng pa päng, chang khli gui ah kiak ci. 16Nang naw na hmu ah khiküi la aki ghaa naw pletbeng ciah hnumi nu cu thüi nak khai gui nei. Ngami naw cun ah hnumi cu asui sak avan suh pe u sei akplui ah om khai nei. Asa cu ei u ne, ani cu mei awn m'khih khai gui nei. 17Ngami naw Khanpughi ah ng'thu düng a gawk law güt ami huham cu khiküi-am ami ap vai ah, Khanpughi naw ngami ah m'lung cu pian pe gui ne, amät ah ng'bü nak ah mäih ah bilawh sak gui ci. 18“Nang ah na hmuh ah hnumi nu cu khomdek khan ah ghangpughang gui uk gui ciah mang gawnu ah kiak ci,” ci ne pyein ci.

will be added

X\