THU PHLAAN 13

1Cun kawn ah alu chih aki ghaa lawk ciah khiküi tumat cu tuinu ung kaa lut law sei ka hmuk ci. Aki päng ung lukhu büng ne, alu päng ung Khanpughi ah thang shet sak ciah ming om ci. 2A müi cu pupi kawng ah mäih law ne, a khaw gui cu khawm ah khaw ah mäih lawk ci. Am gawng cu phongkawng ah m'gawng ah mäih lawk ci. Shawk naw ahlüngtai nak, amangkiaang la m'gäi nak ah a huham cu khiküi-am ap ci. 3Khiküi ah lu tumat cu sih nak vai hlawk ah leim pang ne phi, khan ba pyi ci. Khomdek khan ah chang avan cu cäicat u ne khiküi ah hnu ah läk zawp ci gui. 4Shawk naw a huham cu khiküi-am a ap pyi ah kia sei, chang avan naw shawk cu khawhnah ci gui. Chang gui naw khiküi cun phi khawihnah u ne, “Khiküi ah mäih a u om khai ang? Ani ng'tuk püi hning ci a u om khai ang?” ci ne pyein ci gui. 5Khiküi cu m'ghämce ne Khanpughi ah thang shet sak nak vai la cha phlikip-lei-goi ung uk nak vai ah huham cu gah ci. 6Ani naw Khanpughi ni, Khanpughi ah angming ni, a om nak ah khanmawpi ni gui cu tün ne shetkat sak pyi ci. 7Ani cu Khanpughi ah chang gui tu ne näng nak gui vai la akhaw päng ung ahlü hlü ah ng'thu ciah khui päng pa päng uk nak vai ah huham cu gah ci. 8Ami ngawn ah Htomehta ah ghinnak cauk ung khomdek khan kä a tüisho pha ge ung a guk ah, ming gui ah kawn ah k'pawih ba ciah chang phung naw khiküi cu khawihnah ci gui. 9Akhnga om ci phung naw ngai ne ang zak vai nei! 10Ami phaa vai cu pha tuk cang khai gui, khim awn ami ngawn vai cu ngawn tuk cang khai gui, shin ah a mawng ung Khanpughi ah chang gui cu ng'düng ne bekhüt zawp ne ami om vai nei. 11Cun kawn ah khiküi tumat cu m'dek ung kaa lut law sei ka hmuk ci. Ani cu htome ah mäih ah aki hnih om ne, shawk ah mäih ah ng'thu pyein ci. 12Ani naw dang law htük ciah khiküi ah m'gäi nak huham cu amät ah ma ah mang zawp ci. Ani naw asih nak vai ah aleim khan ba ciah khiküi cu, khomdek la khomdek chang avan-am liing ne khawihnah sak gui ci. 13Akhnih nak ah khiküi naw küikyang ciah cäi aih vai gui m'dang ci. Chang gui ah maa ah khankhaw ah kaa mei cu khomdek khan ah kiak law sak ci. 14Ani naw ak htükbäih ah khiküi ah maa ah abi hning ah cäi aih vai gui cu m'dang ne khomdek chang gui cu hmühma sak gui ci. Ani naw khim awn leim ne phi kä si ne ghing ciah khiküi m'tamkhah nak ah agup cu pian sak gui ci. 15Ak htük ung khiküi ah agup-am ghin nak peit nak hning cu akhnih nak ah khiküi ung om ci. Cun ah kia sei agup cu ng'thu ne ani kä khawihnah tuk ci gui cu m'sih gui hning ci. 16Cun ah khiküi naw, zaw däm ci, pyam mang ci, khleihtein la khuimah chang avan cu ami k'pat lam kut ung, kä cun ung ami m'calai ung m'hnüt nak awn liing ne m'hnüt gui ci. 17Cun ah m'hnüt nak ah kiak ciah khiküi ah ming, kä cun ung ang ming dang sak ciah khei nak, awn kä ami m'hnüt tu ah chang phung cu sumlei ng'dong'pe ne kä gah tuk ci. 18Shin ah amawng ung cüivai vai hlü ci. Lunglang ciah chang naw acun ah khiküi ah khei nak gui ah mawng cu khei thei ci. Cun ah khei nak cu chang tumat ah ming ah phäh ah ng'düi ci. Cun ah khei nak cu 666 ah kiak ci.

will be added

X\