THU PHLAAN 10

1Cun kawn ah khankhaw ah kaa m'gääi ciah khankhaw chang tumat kyum law sei ka hmuk ci. Ani cu khongmei sui ne ng'hlawp ci, alu cu zapi naw koi ci, a hmai cu khohni ah mäih lawk ci, akhaw gui cu mei ah däi ciah k'tung gui ah mäih lawk ci. 2Ani cu k'phiaat pyi ah cakchaw hta akut ung kawt ci. Akpat lam a khaw awn tuinu ung ng'leh ne, ak eng lam a khaw awn khaw kawng ung ng'leh ne ng'düi netah; 3phongkawng ah m'ngaw ah mäih ah thüng sei ng'khü ci. 4Cun ah ng'hmumkyeek ciah ng'thu cu ka guk khai ah pawng ngätah, “kä na guk-en vai nei, chih vei ng'hmumkyeek ciah ng'thu cu na m'zih vai nei” ciah khankhaw ah k'aw cu ka ng'zak ci. 5Cun kawn ah tuinu la khaw kawng ung ng'düi ciah khankhaw chang naw, ak pat lam akut khankhaw ah han shäng ne, 6ng'shon päng ung ghing ne, khankhaw la khomdek, tuinu la apäng avan tüi sho ciah Khanpughi ah ming cu han be netah, “Cän kawn ah kä shou shü ba khai nei! 7akchih nak ah khankhaw chang naw pyungheng a tum law ung, Khanpughi naw ak chang, purofet gui amcäi gui ah mäih ah, thuuk ciah apawng püi gui cu pyi phleh sak gui khai nei,” ci ne pyein ci. 8Khankhaw ah ng'thu sei ka ng'zak ah k'aw naw kei-am, “Hteit ne tuinu la khomdek ung ng'leh ne ng'düi ciah, khankhaw chang ah kut ung k'phiaat ah cakchaw cu na lak vai nei” ci ne pyein ci. 9Cun ah kia sei kei naw, cun ah khankhaw chang ah hteit netah, cakchaw hta cu ana peit vai ah ka k'thäh ci. Cun ah khankhaw chang naw, “La netah ei ä, tui khai nei” ci ne pyein ci. 10Kei naw khankhaw chang ah kut ung kaa cakchaw cu la ne ka ei ci. Cun ah cakchaw cu ka m'gawng ung khawitui ah mäih ah tui pang ne phi, ka zuk düh kawn ah ka chikyong ah kha ne ng'liit ci. 11Cun kawn ah khankhaw chang naw, “Nang cu khaw akda ung, ahlü hlü ah ng'thu ciah khui päng pa päng la ghangpughang gui ah ma ah Khanpughi ah ng'thu cu shäu ne na pyein ba khai nei” ci ne na kiak nak ci.

will be added

X\