MATTHE 21

1Bawipa Jesuh la ang düihpüi gui cu Jerusalem k'et lawk ciah Olives khomhtung pei Bethphage gawnu ah gawk law ci gui. Bawipa Jesuh naw ang düihpüi hnih cu khü goi netah, 2“mi hei ma ah om ciah pigaw ah ma ne na ni na hteh vai, a cu ah ng'se hta awn atäng ah ami pawn ah ng'senu cu na ni hmuk khai. Gui k'phian ne cun ah ng'se goi cu na ni law püi vai. 3Chang tumat mat naw, ‘a i vai na ni k'phian ang? a ci ung, ‘Bawipa naw ng'za hlük ci nei,’ ci ne na ni pyein vai, cun ung ani naw ng'se cu nani law püi vai ah pyein khai nei,” ci ne m'cäi ne tüi goi ci. 4Shin ah a mawng gui cu profet ah thu pyein abä nak ah kia ci. Cun ah thu cu; 5“Zion mang gaw-am thu nami m'thein vai cu, ‘Teng tu vä, nami ghangpughang cu nami om nak ah gawk law ci nei! Ani cu hniphnoi ng'awi gi ne, Phuih näng ciah ahta ng'sehta ung cum ci nei,” ciah kia ci. 6Ang düihpüi goi cu ana ma ni ne Bawipa Jesuh ah am cäi goi ah mäih ah bik ci goi. 7Ngani naw ng'se ang nuhta cu law püi ni ne, ani zih sui gui cu ak khan ah taih lawk ci goi. 8Bawipa Jesuh cu cun ah ng'se ung cum ci. Chang akda naw ami zih sui gui cu lam ung ana phah ci gui, chang am shah naw sing hnah gui shui ne lam ung phah ci gui. 9Bawipa Jesuh ah ahnu ama ung ana dou law ne läk lawk ciah chang gui cu, “David ah Htapa cu m'hlüngtai vä! Bawipa ang ming awn kyum lawk ci cu Khanpughi naw zeikiai nak pe sä! Khanpughi cu m'hlüngtai vä,” ci ne m'lau ci gui. 10Jerusalem gawnu kyong ah Bawipa Jesuh gawk law khätah, agawnu pum chang gui cu thüngkyüng zawp ci gui. Cun ah kia khätah chang gui naw, “Shin ah chang cu a u ang?” ci ne ng'shi tuk ci gui. 11Chang khli gui naw, “Shin ah chang cu Kalile kho, Nazaret gawnu ah kaa profet Jesuh nei” ci ne ng'shäu ci gui. 12Bawipa Jesuh naw pum im kyong ah hteit netah, pum im kyong ah sumlei ci gui cu k'täm gui ci. Ngui m'thawng ci gui ah tawnglan la mümkha zoi ci gui ah m'küm gui cu gäi ne lat zawp ci. 13Cun kawn ah Bawipa Jesuh naw, “Cacim ung Khanpughi naw, ‘Ka pum im cu taigü nak ah im ah kia ci nei,’ cik ci. Cun ung phi nangmi naw m'guk ei ah ng'thuh nak ah nami piang ci nei,” ci ne kiak na gui ci. 14Pum im ah amik m'dauh gui la akho shum gui law u sei, Bawipa Jesuh naw gai sak gui ci. 15Taigüpa gui la thukhän saza gui cu cäicat vai kiak ciah Bawipa Jesuh ah bi lawh gui cu hmu u ne, pum im kyong ah akhmaw gui naw, “David ah Htapa cu m'hlüngtai vä,” ci ne a ming shäu cu zak u netah, ang htei ah m'lungshe ci gui. 16Ngami naw Bawipa Jesuh-am “akhmaw gui a i ci ne ami m'lau cu nang zak ci ang?” ci ne ng'shik ci gui. Bawipa Jesuh naw,“Akcang ah kang zak ci nei. Cacim ung, ‘Bawipa naw, htahmaw gui la nau hmaw gui cu ami m'hlüngtai thei vai ah Theithang gui ci nei,’ ciah om ci cu, Kä nami phat man ci ma?” ci ne kiak na gui ci. 17Cun kawn ah Bawipa Jesuh cu cun ah gawnu ung kaa naw, hteit ba ne Bethani ah mü ip ci. 18Kho ngawihta ah mang gawnu ah ami hteh ba lam ah Bawipa Jesuh cu ei cawi lawk ci. 19Lam pei ah baangghing tumat om sei apei ah hteit ne teng ci. Cun ah baangghing cu käm theih ah ahnah gui bäng om ci. BawipaJesuh naw cun ah baangghing cu tawk ne, “Nang cu a ngawi ah phi kä nam theih khai,” ci ne taam khätah, a cun vai-am cun baangghing cu ng'zai ne chawng ci. 20A cun cu ang düihpüi gui naw hmu u ne, ang htei ah cäicat u netah, “Shin ah baangging cu a i hawkcha, a cun vai-am ng'zai ne ak chawng ang?” ci ne ng'shik ci gui. 21Bawipa Jesuh naw, “Kei naw akcang ka pyein cu, nangmi cu ngaih hnga nak kä om ciah zum nak a om ung baangghing ung kei ah bi ah mäih ah nami bi tu hning khai. Cun bäng ah kä kiak ciah shin ah m'htung cu ‘shin ung kaa ng'nawn ne tui ung lut ä,’ nami ci ung nami pyein ah mäih ah kiak khai nei. 22Nangmi naw zum nak awn nami zoih ung nami zoih phung cu nami gah khai nei” ci ne pyein ci. 23Bawipa Jesuh naw pum im ah law ba ne am theithang gui zah ung taigüpa gui la ang vai gui cu Bawipa Jesuh ah pei ah law u netah, “Nang naw shin gui cu a i m'khüt näng nak awn na bi ang? Cun ah m'khüt näng nak cu a u naw a ning peit ang?” ci ne ng'shik ci gui. 24Bawipa Jesuh naw, “Kei naw tumat ka ning shi gui khai, Cun cu nami m'hlan ba hning ah a kiak ung shin ah a mawng gui cu, a i m'khüt näng nak awn ka bi ah ka ning m'thein gui khai. 25Zohan naw tuihnim nak a peit cu, Khanpughi ah peit ah m'khüt näng nak awn ang a peit, chang ah peit ah m'khüt näng nak awn ang a peit?” ci ne ng'shi gui ci. Ngami naw, “Khanpughi ah peit ah m'khüt näng nak awn pek ci mi ci ah a kiak ung, Zohan a i ah kia sei kä nami zum ang'ci ne nang shi ba gui khai, 26Chang ah peit ah m'khüt näng nak awn pek ci mi ci ah a kiak ung chang gui naw Zohan cu profet tumat ah zum ci gui kia ne, cun ah chang gui cu kyih gui vai kiak ci,” ci ne ami mät ng'cecäk ci gui. 27Cun ah kia sei ngami naw, “Kä kami hmat ci nei,” ci ne m'hlan ba ci gui. Cun kawn ah Bawipa Jesuh naw, “Kei naw kabi ah mawng gui phi a i m'khüt näng nak awn kabi ah kä ka ning m'thein gui khai,” ci ne kiak na gui ci. 28Cun kawn ah Bawipa Jesuh naw, “Nangmi naw a i hawkcha ah nami ngai ci ang? Chang tumat ung ahtapa pahnih om ci. Ani cu ahta ng'vai ba ah hteit netah, ‘Ka hta tuhngawi sapyit lo ah hteit ne bi na bi vai,’ ci nak ci. 29Ahta ng'vaipi naw, ‘Kä ka hteit khai,’ cik ci. Cun ung phi a hngeng ah am lung thawng ba netah hteit ne bik ci. 30Ani pa cu ahta hmawpi ah mä hteit ne a cun ah mäih ah pyein ci. Ahta hmawpi naw, ‘Ka hteit khai nei, pa oi,’ cik ci. 31Cun ung phi kä hteh ah om ci. Cun ah chang goi ung kaa a u naw ang apa ah beit ng'zak ciah a kiak kaw!” ci ne ng'shi gui ci. Ngami naw, “Hta vaipi naw beit zak ci nei,” cik ci gui. Bawipa Jesuh naw, “Kei naw akcang ka pyein cu, khawn look ci gui la chang hlawhlang gui cu, nangmi ah mä ma pi ne, Khanpughi ah uk nak kho ah gawk khai gui nei. 32Zohan naw nangmi ah law ne lam düng cu ning m'shüm gui sei phi, nangmi naw kä nami zum ci. Cun ung phi khawn look ci gui la chang hlawhlang gui naw zum ci gui nei. Shin ah amawng ama gui nami hmuhmat kawn ah phi, nangmi cu nami m'lung thawng ne Zohan cu kä nami zum hlawt ci. 33“A hei tumtäng nak tumat cu ngai vä, sapyit akda geit ciah khomdek mah tumat om ci. Ani cu lo avan ng'vong ne sapyit neen nak vai khui phi shawk ci, shaam tumat phi co ci. Cun kawn ah a sapyit lo cu chang gui-am ak phlam a ei vai ah m'kai ne khah gui netah, a kho hei ah hteit ci. 34Sapyit khäm vai akhin gawk law sei, ak chang shäm gui cu lo ng'vat ci gui ah tüi gui ne, a gah vai ah ak phlam cu lak sak gui ci. 35Lo ng'vat ci gui naw ak chang shäm a tüih gui cu pha u netah am shah cu that ne, am shah cu ngawn ne, am shah cu lung awn vawi ne cik ci gui. 36Cun kawn ah lo mah naw chang akda pi tüi ba gui sei, cun gui cun phi a cun bä ah ci ba ci gui. 37Cun kawn ah ani naw, ‘Ka mät ah hta läi cu kyih aa khai gui,’ ci ne ngai netah a mät ah hta cu tüi ne k'phlam cu soh sak gui ci. 38Cun ung phi ngami naw lo maè ah hta cu hmu law u netah, ‘shin ah chang cu lo mah ah pakhui m'düng khai ah chang ah kiak ci, lawvä, ani cu mi ngawn u ne, ak chaw vai a khawh cham avan mi lak khai nei,’ ci ne ng'ge u netah, 39A hta cu pha u netah lo ng'naw ah hteh püi ne ngawn ci gui. 40Cun ah a kiak ung lo mah a law ung lo ng'vat ne bik ci gui cu, a i ah ci gui khai ang,” ci ne ng'shi gui ci. 41Ngami naw, “Lo mah naw cun ah chang she gui cu ngawn ne ghawt gui khai nei. Lo cun phi sapyit khäm khin ung akcang ah phlam sook khai ah ahei gui-am bi sak gui khai nei,” ci ne pyein ci gui. 42Bawipa Jesuh naw, “Shin ah cacim cu kä nami phat tu man ci kia ne maa? “Lung im co ci gui naw ghü ne ami ghäih ah lung cu, Ak tung pibäih ung düi ciah lung ah kia lawk ci. Cun cu Bawipa ah bi ah kia ne, ang htei ah cäicat vai ah kia ci. 43“Cun ah kia sei kei naw akcang ka pyein cu, Khanpughi ah uk nak kho cu nangmi ung kaa la ba ne, düng nak awn vuipai khai ah chang gui-am pe gui khai. 44(Cun ah lung ah khan ah kia lawk ciah chang cu hngetbät khai, ak khan ah cun ah lung naw a kiak ah chang cun phi deng ne khui khai)” ci ne kiak na gui ci. 45Bawipa Jesuh naw, cun na m'tumtäng nak am thein gui cu taigüpa gui la pharisee gui naw, ng'za u netah, ngami k'ü nak gui ah a pyein ah hmat ci gui. 46Cun ah kia sei ngami naw Bawipa Jesuh cu phaa vai ah k'tha nak ci gui. Cun ung phi ngami naw, “Bawipa Jesuh cu profet nei,’ ci ne zum ciah chang gui cu kyih gui ci gui.

will be added

X\