LUKA 24

1Ak hnüüp ät hnüüp kho ngawi hta ah, kho kä thai thai sei, hnumi gui cu ami pian m'tham ah tuing'ui gui hteh püi ne, ng'cim hmun ah hteit ci gui. 2Ng'phuh hmun khui m'kawt ami khai nak ah lungnu cu m'hnawn ah kia sei hmu u netah, khui kyong ah lut ci gui. 3Cun ung phi Bawipa Jesuh ah a gook cu kä hmuk ci gui. 4Cun ah kia sei ngaih tüh khit u ne ami kiak zah ung, pyü ne khang sei suisak ciah chang hnih cu ami ma ah ang ghit ah ng'dang lawk ci goi. 5Cun ah hnumi gui cu kyi ne kawp u khätah, cun ah chang goi naw? “A i ah kia sei ghing ne om ci cu aksi ah om nak ah nami shui ang? 6Ani shin ung kä om ba ci, ghing ne tho ba pyi ci nei. Kalile kho ah a om zah ung; 7“Chang ah Htapa cu kat nak bik ciah chang gui ah kut ung ap khai gui. Kutlamtung ung tai ne ngawn khai gui, cun kawn ah ak hnüüp thum hnüüp ghing ne tho ba khai, ci ne a pyein cu ngai ba shüm vä,” ci ne kiak na gui ci. 8Cun kawn ah hnumi gui cu Bawipa Jesuh ah ng'thu gui man shüm law ba u netah; 9Ng'cim hmun ah kaa im ah dawng ba u ne, ang düihpüi gha-lei-ät la, ang khahpüi gui ami van-am, amawng avan cu m'thein tu gui ci gui. 10Ang düihpüi gui-am cun ah m'thein law ba ciah hnumi gui cu, Mari Makdale, Joanna la James ah nu Mari la ahei hnumi gui ah kiak ci. 11Ang düihpüi gui naw hnumi gui ah pyein cu, kä zum veih ci gui. 12Cun ung phi Peter cu dawng ne ng'cim hmun ah hteit netah, ng'phuh hmun cu m'kein ne teng ci. Hlawp nak ah zih akawn ah a i phi kä om khätah, ang htei ah cacät ne im ah dawng law ba ci. 13A cu hnüüp ung ang düihpüi hnih goi cu Emmaus pigaw ah hteit ci goi. Cun ah pigaw cu Jerusalem ung kaa naw mü chih shou ci. 14Ngani cu a cun ah amawng gui pyein ne ng'htau ne lawk ci goi. 15Cun ah ng'htau ne ani hteh zah ung Bawipa Jesuh amät ani pei ah gawk law ne, ngani awn atäng ah ng'gui law tu ci. 16Ngani naw, ani cu hmu ni ne phi Bawipa Jesuh bä ah kä hmat ci goi. 17Bawipa Jesuh naw, “Nangni lam na ni hteh ah k'phei ah a i ang nani pyein” ci ne ng'shi goi ci. Cun kawn ah ngami cu, ani hmai m'kiuum ne ng'düi ni netah, 18ngani ung kaa Kleopas naw, “Jerusalem ah gawk lawk ciah khin gui ung kaa, nang bäng vah shin ah kho hnüüp gui ah kyong ung, Jerusalem ah hmu ng'zak ah amawng gui cu kä na hmat tu phak ciah kiak ci,” ci ne kiak nak ci 19Bawipa Jesuh naw, “A i ah amawng gui ang?” ci ne ng'shi goi ci. Ngani naw, “Nazaret ah kaa Jesuh ah amawng gui nei. Ani cu Khanpughi la chang ah ma ah ang thu ng'htau a bilawh ung hlüngtai thamah nak awn be ciah profet ah kiak ci nei. 20Keimi ah taigü ng'vai gui la uk ci gui naw ami ngawn vai ah ap u sei, ani cu kutlamtung ung tai ne ami ngawn nei. 21Ani cu Israel chang gui k'phiawn gui khai ciah ami ngaih u ah kiak ci. Cun gui ah akiak law ah amawng gui cu, tuh ngaw awn hnüüp thum law lawk ci nei. 22Keimi ah kami paw gui hnumi gui cu kho ngawihta ah ng'cim hmun ah hteit ci gui. 23Ngami naw a gook kä hmu ba ci gui. Khankho chang gui bäng kami hmuk ci, ci ne pyein law ba ci gui. Cun ah khankho chang gui naw, Bawipa Jesuh cu ghing ba ne om ci nei, cik ci gui, ci ne pyein ci gui. Cun ah kia sei kami ngai khit ci. 24Keimi ung kaa am shah gui cun phi ng'cim hmun ah hteit tu u ne, hnumi gui ah hmuh ah mäih bä ah hmu tuk ci gui. Bawipa Jesuh läi kä hmuh nei, cik ci gui. 25Cun kawn ah Bawipa Jesuh naw, “Profet gui ah pyein man gui zum vai ah, shokshü aih ciah chang k'ang gui aw, 26Messiah cu bämang hlüngtai nak kä a gah pha ung, ashin ah mäih ah zaica nak cu abui awt vai ah hlü ciah kä kia ne ma?” ci ne ng'shi goi ci. 27Cun kawn ah Bawipa Jesuh naw, Messiah ung tün ne profet gui naw, ngami ah mawng ami guk ah cacim gui cu tän ne pyein ne m'thein goi ci. 28Ami hteh nak vai ah pigaw k'et law u netah, Bawipa cu ng'täi ne hteit khai pawng ci. 29Cun ung phi ngani naw, “Tuhbäi kho mü lawk khai kiak ci, keimi awn atäng ah mi ip tu kaw, ci ne khü tuk ci goi. Bawipa Jesuh cu ngani awn atäng ah ip tuk khai ah läk tu goi ci. 30Ngani awn atäng ah va kai ne ngo tu netah, m'htut cu la ne taigü ci. Cun kawn ah m'htut cu k'bou ne pe tu goi ci. 31Cun kawn ah ngani cu ani mik m'dei law sei, Bawipa Jesuh cu hmat lawk ci goi. Cun ung phi Bawipa cu ani mik ah hmuh ge ah maih ba ci. 32Ngani naw lam ah ana ng'htau püi goi zah ung phi bäi, cacim ana m'thein goi zah ung bäi, m'lung kyong ah mei däi ciah mäih ah kiak ci nei, ci ne ani mät ng'htau ci goi. 33Ngani cu acun vai-am ng'düi law ba ne Jerusalem ah hteit ba ci goi. Acu ah ang düihpüi gha-lei-ät la ang khahpüi gui cu ng'bum ne ana om u sei hmuk ci gui. 34Ng'bum ne ana om ciah chang gui naw, “Bawipa cu akcang ah tho ba pyi ci nei, Simon Peter ah ma ah ng'dang ba ci nei” ci ne kiak ci gui. 35Cun kawn ah ngami naw phi, lam ah ami ng'gui ah mawng, m'htut akbou law zah ung Bawipa ah ami hmat law ah mang gui cu, m'thein tu gui ci goi. 36Cun ah amawng gui cu ang düihpüi goi naw ami m'thein tu gui zah ung, Bawipa Jesuh cu ami lung ah dang law netah, “Nangmi ung Ding gei nak om sä” ci ne pyein ci. 37Ngami cu mumchaa naw m'kyih gui ciah ngai ne kyikyawk ci gui. 38Bawipa Jesuh naw, “A i ah kia sei nami kyihkyawk ang? A i ah kia sei m'lung kä üp, ngaih kä gep sei nami kiak ang? Kei ah ka kut la ka kho gui cu na teng vä. 39Tuhbäi nami hmuh cu kei ka mät ah kiak ci nei. Kei cu na tawn shüm vä, nami hmuh ah mäih ah kei ung ka sa la ka guh gui om ci nei. 40Cun kawn ah a kut la a kho gui cu ang düihpüi gui-am m'hnuh gui ci. 41Cun ung phi ngami cu cäi aih u netah, kä zum hlawt ne ami kiak zah ung, “Nangmi ung ei vai om ne ang?” ci ne ng'shi gui ci. 42Ngami naw ngai ng'shai am cawt cu pek ci gui. 43Bawipa naw cun cu la netah ami ma ah ei tuk ci. 44Cun kawn ah Bawipa Jesuh naw, “Moses ah thukhän, profet gui ah cacim la Salan cacim ung, kei ah mawng ami guk gui phung cu, akcang ah küm khai nei, ci ne nangmi awn atäng ah ka om zah ung ka ning m'thein gui pyi ci. Ka pyein ah mäih ah tuhbäi küm law pyi ci nei” ci ne m'thein gui ci. 45Cun kawn ah ang düihpüi gui naw cacim ami hmat vai ah ami m'lung cu hmawn pe gui netah, 46Bawipa Jesuh naw, “Cacim ung, Messiah cu sihnak awt khai, cun kawn ah ak hnüüp thum hnüüp sihnak ung kaa tho ba khai. 47Ani ah ang ming awn kat phiawn nak la ng'zu vat ba nak ah mawng cu Jerusalem ung tün ne, akho päng ung, chang pakhui avan-am m'thein gui vai nei. 48Nangmi cu a cun ah mawng gui nami mik awn nami hmuk ciah saksi ah nami kiak ci. 49Kapa ah shaitaak ah mäih ah nami khan ah ka gawk law sak khai nei. Cun ung phi nangmi cu, khankho ah kaa hlüngtai nak kä nami gah phaa ah chuih Jerusalem ah om ne nami gin vai nei” ci ne m'cäi gui ci. 50Bawipa Jesuh naw ang düihpüi gui cu Bethani pigaw pei ah khüt ne hteh püi gui netah, akut k'phiat ne hrilham pe gui ci. 51Cun ah hrilham a peit gui zah ung, Bawipa Jesuh cu ang düihpüi gui ah ma ung kaa pawng ne, khankho ah kai ba ci. 52Ang düihpüi gui cu ang htei ah zeikiai ne Bawipa Jesuh ah taigü u netah, Jerusalem ah hteit ba u ne; 53Taigü im ung ang täi sei Khanpughi ah ming m'hlüngtai ne om ci gui.

will be added

X\