2 TIMOTHI 2

1Ka hta, Bawi Khrit Jesuh ung kawng ät nak awn mi gah ah m'geinsei nak awn k'thamah ne om ä. 2Saksi gui akda ah ma ah kei naw ka shäu ah m'theithang nak gui cu, nang naw na ng'za pyi ci nei, cun cu la netah, chang hei gui m'theithang tu ba hning khai ah ngaih gep ah chang gui am, nam thei tu ba gui vai nei. 3Bawi Khrit Jesuh ah bekhüt ciah gakaap ah kia ne geinvai nak cu na dou vai nei. 4A bilawh mawng ung hnüntho ciah gakaap tumat cu, a bawi naw azum vai ah bilo ciah kiak ci, a hei a mawng ama ung käng cawngcam, kä hnün tho ci. 5Thu m'hnüt kä läk ah günglah ciah chang phung naw, a i zah ung phi günglah nak ung näng nak ng'chuh kä gah khai. 6Khüghaat ne kholo ciah chang naw väi lawk ciah geit cu, khäm ba ma khai ah kiak ci. 7Kang thu pyein cu nangaih tüh kheng vai nei, cun ung Bawipa naw hmuhmat nak thei ning pak khai nei. 8David ah ng'shon, sih nak näng ne tho ba ciah Bawi khrit Jesuh cu na shüm kheng vai nei, cun cu kam theithang nak ah Thu Ni ung ka pyein ah kiak ci nei. 9Kei cu Thu Ni ka pyein ah phäh ah ka geinvai ci, m'si gui awn phi ami na khih nak ah kiak ci. Cun ung phi Khanpughi ah Thu läi cu khih pawn nak kä om ci. 10Cun ah kia sei kei cu, Khanpughi ah a ghü ah chang gui ah hmawk ah a i phi ka buiaut ci nei. Cun cu ngahmi naw phi Bawi Khrit Jesuh ung hun nak ami gah tu vai la ang täi ah bäkhäk nak a gawk law vai ah hmawk ah kiak ci. 11Shin cu thu düng ah kiak ci: “Ani awn atäng ah mi sih ah a kiak ung, Ani awn atäng ah mi ghing ba khai. 12Mik mi ung khüighaat nak a om ah a kiak ung, Mik mi phi ani ung uk nak mi gah tuk khai. 13Mik mi kä mi bekhüt ung phi, Bawipa cu bekhüt ci, a i ah kia sei ci ung Ani cu amät naw amät cu käm shet phung ci. 14Shin ah a mawng ung nak chang gui nam cäi gui vai nei, thu awn ng'vawngshang küütneet ne kä ami kiak vai ah, Khanpughi ah ma ah akheng ah khän ne nam cäi gui vai nei. Cun ah mäih naw ni nak kä pyang ci, zak ciah chang gui ah ngaihdam ah kia ne shetkhat nak ah kiak ci. 15Bi bi ah hmawk ah kä lü ng'aa ciah khuutbi la Khanpughi ah thu thuuk düng khaiah m'thei ciah nang cu, Khanpughi ah ng'zak hlü vai ah k'tha na pi bäih ne na bi vai nei. 16Zum nak kä om ciah hmühma ne thu shai cu na hlawi vai, Cun ah mäih thushai naw chang cu Khanpughi awn ng'shawng sak pi ci nei. 17Cun ah mäih m'theithang nak cu pumsa keing khai ah ei ciah kheipung awn täng ci. Himenaeus la Philetus cun phi a cun ah mäih ah m'theithang ci goi nei. 18Ngahmi cu cacim ah düng nak ung kaa lam hma u ne, 'sih nak ung ka mi thawh nak ba cu gawk law pyi ci nei,' ci u ne zum ciah chang gui ah zum nak cu ng'lat sak ci gui. 19Cun ung phi Khanpughi naw ak khäng ah ling ne ak süm cu kä thüng hlawt ci nei. Cun ah khan ah, “Khanpughi naw a mät ah chang gui cu hmat gui ci nei”, ci la “Bawipa ung khäng pyi ciah pyein ciah chang phung naw cheishoh nak cu a phiawn nak vai nei,” ci ah ca cu guk ah kiak ci nei. 20Mang im ng'ki ah kyong ah ghui la ngui awn pian ni, Sing la m'dek la m'dek awn pian ni ah khlüng la k'am gui om ci. Am shah cu aküi kyang ah kiak ci, am shah cu ang neng düt ah kiak ci. 21Cun ah ak shekha gui phung ung kaa theingcim ciah chang cu a bawi ah hmawk ah bä ne, ak ni phung bi ge khai ah om ciah kia ne, ak küikyang ah kiak ci, a küi kyang nak ung mang hlü vai ah kiak ci. 22Ak hmaw chang gui ah hüithaw nak cu hlawi ne, Bawipa ah m'lungtheing awn taigü ci gui awn atäng ah düngdau nak,zum nak, m'hni nak la dimdeih nak gui cu na shui vai nei. 23Hmühma nak la ak ang ah ng'cuhcan nak gui cu na hlawi vai, Cun gui naw ng'tukvook nak a pian cu na hmat ci nei. 24Bawipa ah bikbi cu ng'tukvook lup ciah kä a kiak en vai, chang ng'nü m'gein ne, hniimgei thei ci ah saza k'ni ah a kiak vai. 25Ani hnu ng'tuk püi ciah chang gui cu ang awi gi ah m'cäi thei ciah kiak khai. Cun ah chang gui cu ng'za ba u ne, thu thuuk ami hmat tu vai ah Khanpughi naw akhin k'ni pe gui khai nei. 26Cun ung ngahmi cu düng nak hmu law u ne, ang zak hlü phung läk khai gui ah pha ne shum gui ciah khoshe ah kut ung kaa phiawng khai gui nei.

will be added

X\