1 TIMOTHI 2

1Cun ah kia sei ah htük bäih ah chang gui ah hmawk ah Khanpughi huipaa nak, taigü nak, zoih thäh nak, la m'hlüngtai nak gui cu nami bi vai ah ka ning m'cäi gui ci. 2Mik mi cu Khanpughi ung ding gei nak la dimdeih nak awn a htingling ah ghing ne mi om vai ah ghangpughang gui la huham om ciah bawimang gui ah hmawk ah nami taigü vai nei. 3Cun cu nik ciah kia sei mi Hunbawi Khanpughi ah am hni ah kia ci. 4Chang nüng cu hun nak gah ne thu düng ami hmat vai ah Khanpughi naw ng'za hlük ci. 5Khanpughi tumat bäng om ci, Khanpughi la chang ah ng'lak ung geilam piang ciah, Bawi Khrih Jesuh phi tumat bäng ah kiak ci. 6Cun ah Bawi naw hnicim chang gui phiawn khai ah a pumsa ap ci. Cun cu chang nüng hun vai ah, a khin ni ah a kiak ah mawng, Khanpughi ah ang zak hlü cu am dang nak ah kiak ci. 7Cun ah kia sei, kei cu ang düih püi ah nam düih ne chang khui hei gui ah saza ah kia ne, zum nak thu düng cu ka shäu khai ah na tüi ci. Kei ka hleei ah kä kia ci, thu düng ka pyein na kiak ci. 8Khritha gui ah bum nak phung ung, pami ng'vai gui ami taigü vai, ngahmi cu Khanpughi ah ng'ap pyi ci gui ah kia ne, m'lung she nak la cuhcan nak kä om men sei, ami kut chang ne ami taigü vai ah ka ng'za hlük ci nei. 9Hnumi gui cun phi müisa ne nei aan khai ah ami suisak vai nei:lu m'kin ne, ghui shawi mo sawng, äh awi ne, aküi kyang ah, hnän thang binglawh ne kä ami kiak vai. 10Ngahmi cu zum ciah chang gui ah mäih ah ni kiom ciah om ih awn ami bilawh vai nei. 11Hnumi gui cu ng'awi gi ne, a düm hta ah ami theithang tu vai nei. 12Hnumi gui naw ami m'theithang vai la pami ah khan ah ami huham mah vai cu, kei naw kä ka zum ci nei: ngah mi cu kä chawkchek ne ami om vai nei. 13Khanpughi naw Adam cu tüi sho ma netah Eve cu tüi sho ci. 14Hmühma nak gah law ma ci cu Adam ah kä kiak ci, hnumi ah kiak ci, Ani naw Khanpughi ah thukhän cu shetkat sak ci. 15Cun ung phi hnumi gui cu, a htingling ah om ne, zum nak, m'hni nak la theingciim nak awn ami be ah a kiak ung, ami hta nau nak awn hun nak gah khai gui nei.

will be added

X\