Tito 2

1Amba nda-mü, Tito, ah le de mü rï wü kpara, de wüh ngbü mbi, adi emere züka wü ngü, baka ngari Me, te a rï mü di. 2Mü mala fü wü cögbörö kpara, de wüh di de kpeke wü kpara, de züka fïngangü gbü nzö wü. Wüh zoro Yesu de kpa wü ʼbasu, da eje ngü kaka, kpah da ele wü bu wü de maguma wü ʼburu. Wüh di etüka te-wü, da ei maguma wü gö! gbü ngü ka Me. 3Mü mala kpah fü wü cögbörö würüse, de wüh ngbü baka züka wü kpara ka Me. Wüh mere e angbü wü mürü ambalaʼba de. Wüh o to wü teka fï kpah de. Wüh di kpah erï wü mada, teka de wüh di emere wü ngü ʼburu ba e te tï gbü jia wü kpara, kpah da ele wü watï wü, de wü jaji ka-wü. 5Wüh di erï ewü, de wüh di emere tima agba wü mbi mbi mbi, de züka fïngangü gbü nzö wü, da eje rïrï ka wü watï wü. Angü, te wüh je ngü ne de la, wü kpara ena asiti ïrï wü kpara ka Yesu, teka ngü ka-ewü la. 6Kpah bala, mü rï wü kaʼdörö kpekpeke, de wüh ngbü de züka fïngangü gbü nzö wü, da etüka te-wü teka siti gümü wü e de füh kotö ne. 7Amba zu teka mü, Tito, ah le de mü ngbü fï bü da emere züka ngü, te ngbü ereke gbü jia Me. Angü wü kpara ena awu da emere züka ngü, teka ngü ka-mü la. Mü ngbü kpekpeke, de züka fïngangü gbü nzö mü. Fü mü angbü kpah da erï wü kpara de zu ngari Me, de maguma mü ʼburu biringbö. 8Mü rï wü kpara de züka rïrï, teka avi jia wü vügü, de te ewü le ngü ka Me de ne, angü wüh ena agïrï kaje teka amala siti ngü eküte nih ma. 9Mü mala ngü fü wü labï kpekpeke, de wüh di eje rïrï ka wü mere kpara ka-wü. Wüh di emere wü ngü ʼburu te ena adi ereke gbü jia ewü. Wüh mere e alügü siti ngü fü mere kpara ka-wü de. 10Wüh mere e adi ezi e ka wü mere kpara ka-wü kpah de. Wüh di emere tima ka-wü kpekpeke de maguma wü ʼburu. Te wüh mere bala la, wü kpara ena angbü egbo nga Me, E-küwa-nih ne, teka ngü ka-ewü la. 11Ma mala ngü la fü mü kükürü de, angü Me gara tamu züka maguma ye eyi fü wü kpara ʼburu, gbü ngü ka Yesu Kurisito. 12Dela ngü te Me mere fü nih, teka fü nih amaka wazi, ace ngü ka kögö-nzö, bete ngü ka gümü wü e de füh kotö ne. Fü nih adu angbü de züka fïngangü gbü nzö nih, teka adi emere wü ngü ʼburu mbi, o nih di la de jia nih füh kotö ne. 13Nih ngbü emere wü ngü de bala, kükürü de, angü nih ngbü ecï nga züka tadu, te nih ena amaka te gara, gbü sïkpï te Miri ka-nih Yesu Kurisito ena adu akoro tete. Nih gbo nga ïïrï na de koko de karayi! Angü engu de Mere Me, ah kpah de E-küwa-nih. 14Engu to ta te-ye, akpi teka aküwa nih, teka afü nih, ao wü di ye tete, teka fü nih ace siti ngü ka-nih, adu ao to nih ʼburu teka adi emere züka wü ngü füh kotö sene. 15Dela wü ngü te mü ena angbü emala cu de wazi mü ʼburu, angü wüh o mü eyi mere kovo gbü nzö wü kpara ka Me. De mü di eto wazi fü mene wü kpara, te ewü ngbü emere züka ngü ne. Mene ewü, te ewü ngbü emere siti ngü ne, de mü di erï ewü kpekpeke, teka fü ewü ace wü ngü la ace. De mü ngbü de jia mü te mü, teka fü wü kpara awu züka ngü ka-mü, angü wüh ena afala mü.

will be added

X\