Rüma 5

1Wü di enga wüna, Me reke ngü esüka nih de wü ye eyi. Ah fü nih eyi baka züka wü kpara ka-ye, angü nih to maguma nih eyi fü Miri Yesu Kurisito. 2Teka ngü ka kpi ka Yesu, nih tï eyi awu wü züka ngü ʼburu, te Me mere fü nih de züka maguma ye ne, angü nih to maguma nih eyi fü Yesu Kurisito. Nih tïne eyi de tadu, angü nih wu eyi, gü ba, nih ena angbü kpaka Me, agbü sü kaka agbü kpï kpala, fï mere badi. 3Te di bala, nih tï kpah eyi agbo nga Me de tadu, gbü wü lö-ra ka cïnga, te nih ena angbü ezü füh kotö ne. Angü nih wu eyi, gü ba, nih ena amaka züka ngü te gara, kpaka Me agbü kpï. Kükürü de, angü te nih tüka te-nih gbü wü cïnga ka-nih la, maguma nih ena akoro kpekpeke. 4Te maguma nih koro eyi kpekpeke la, ngü ka-nih ena areke gbü jia Me. Te ngü ka-nih reke eyi gbü jia Me la, nih ena adu ao jia nih te Me, te ena aküwa nih ne. 5Te nih o jia nih eyi eküte Me la, engu tï ace nih de. Ah ena aküwa nih aküwa fanü fanü. Kükürü de, angü Me le nih cu fa sü, de maguma ye biringbö. Fü engu ayia atima Nzïla Wazi ye, de ah koro, ah ngbü emaguma nih, adi esere ngü la fü nih. 6Me mere wü züka ngü la fü nih bala, kükürü de, angü wazi nih, te nih ena aküwa te-nih di de tete-nih ne, ta nda ma. Fü Me awu cïnga nih, fü ah ayia atima Yesu Kurisito, de engu koro, ah to te-ye, ah kpi teka aküwa nih, wü siti kpara. Me mere ngü la gbü sïkpï te engu fe me-ye. 7Gara kpara ladü füh kotö ne, te ena akpi teka ngü ka kiri ye? Anga te kiri ye na la ena adi de züka kpara la, e-wu neh da, kpara la ena atüka maguma ye bü bala, akpi teka kiri ye la. 8Te di bala, yi fï la nga mere lele ka Me tüngü nih, teka kpi ka Yesu Kurisito. Gbü sïkpï ta te Yesu Kurisito kpi tete teka ngü ka-nih ne, nih ta de züka wü kpara? Ah bala de! Nih ta de siti wü kpara, angü nih ta de wü vügü ka Me. 9Wü di enga wüna, Me küwa nih eyi, teka kpi ka Yesu Kurisito. Te di bala, maguma Me tï adu anzu eküte nih tïne de. Angü engu boro wü siti ngü ka-nih eyi, teka ngü ka Yesu. 10Nih ta de wü vügü ka Me, amba Me yia fï nga ngü la ka-ye nda me-ye! Fü ah ayia areke ngü, te di ta esüka nih de wü ye ne, teka kpi ka Ye ye, Yesu! Tïtïne, nih koro eyi wü vüngüte ka Me. Te di bala, nih ena aküwa fï mere badi fanü, kpah baka Yesu Kurisito, angü engu zükü gbü kpi, fü ah angbü fï mere badi. 11Te di bala, nih gbo nga Me, teka ngü ka Miri ka-nih Yesu Kurisito, angü Yesu de kpara ta te za nih, lügü kpaka Me, fü nih adu akoro wü vüngüte ka Me ne. 12Wü di enga wüna, Yesu küwa nih eyi gbü siti ngü ka-nih, angü ta gügü mere kundu kundu nih de ïrï ye Adama ne, mere siti ngü gbü jia Me. Fü Me ayia akïna engu, de ah kpi akpi teka ngü la. Dela si-ngü te wü kpara füh kotö ne ʼburu ngbü ekpi tete, angü wü kpara ʼburu de wü kundu ye Adama. Wüh ngbü fï bü da emere wü siti ngü baka nda diri kundu wü la. 13Amba ngü ka Rïrï ka Me nda-ye baye? Rïrï, te Me to gömö Müse, koro ka-ye sidi, o siti ngü di ka-ye nda-ye kü eyi ladü füh kotö sene gügü, teka ngü ka kundu kundu nih, Adama. Amba fïngangü ka-yi gü ba, wü kpara ta te ewü kpi, o Me to Rïrï la de ne, wüh kpi teka ne? Wayi, wüh tï eyi akpi, angü ngü ka-nih siti eyi de ewü ʼburu, teka siti ngü ka kundu nih, Adama. Baka te Me kïna kundu nih, Adama, fü nih angbü ekpi ʼburu teka ngü kaka-na ne, kpah bala, nih ena aküwa kpah ʼburu teka ngü ka Yesu Kurisito, te Me zükü engu gbü kpi ne. 15Te di bala, ngü ka Yesu fa ngü ka Adama ka, angü Yesu reke siti ngü, ta te Adama mere ne eyi. Adama mere siti ngü kü me-ye kpikpi ye, fü ngü la ayia asiti ngü ka wü kpara gbü jia Me ʼburu ʼburu. Fü Me ayia akïna wü kpara ʼburu, de wüh di ekpi. Yesu Kurisito ka-ye kpah kü kpikpi ye, te yia mere züka ngü fü nih, aküwa nih gbü siti ngü ta te Adama mere ne. Teka ngü ka Yesu la, fü maguma Me adu agu eküte nih. Fü ah angbü tïne eceka nih ʼburu baka züka wü kpara ka-ye, teka züka maguma ye. 17Baka te Adama mere siti ngü, kü bü me-ye kpikpi ye ne, fü Me ayia akïna engu, teka ngü la, fü wü kpara füh kotö ne angbü ekpi ʼburu, gbü ngü kaka la. Amba, ah kpah bü duu teka ngü ka Yesu Kurisito, fü Me ayia aküwa nih. Te di bala, te nih le züka ngü, de te Me mere fü nih, de züka maguma ye ne la, fanü fanü, nih ena aküwa ka-nih aküwa fï mere badi, teka ngü ka Yesu. 18Baka ta te Adama le rïrï ka Me de ne, fü ngü ka wü kpara ʼburu ayia asiti gbü jia Me, fü Me ayia ato kuru fü ewü ʼburu. Amba ngü la ngbü fï bala nda de. Angü, baka te Yesu Kurisito je rïrï ka Me, fü ah ayia akoro aküwa nih ne, fü Me adu aceka nih ʼburu, baka züka wü kpara ka-ye, teka ngü de te Yesu mere la. 20Amba, baka te wü kpara le, gü ba, ani ngbü dela emere siti ngü, nda-ani de ne, fü Me ayia ato ta Rïrï ka-ye fü ewü gömö Müse, o nga ngü ka Adama ra eyi fa sü. Me to Rïrï la, neh teka ne? Teka asere nga mere bi wü siti ngü ka wü kpara, te ewü ngbü emere ne, fü ewü. Baka te Rïrï koro, fü wü kpara ayia awu, gü ba, maguma Me nzu eyi eküte ani fa sü, angü ani ngbü emere siti ngü. Amba Me le ta kpah de wü kpara wu, gü ba, ni tï eyi aboro mere bi wü siti ngü, te ewü ngbü emere ne, te ewü le züka ngü de te Yesu mere ne eyi la. Wü di enga wüna, dela ngü te ma ele amala fü yi. Fanü, siti ngü ka wü kpara füh kotö ne zu eyi fa sü. Amba wazi lele ka Me fa wü siti ngü la ʼburu ka. 21Baka te wü kpara füh kotö ne ngbü eyi ekpi teka siti ngü, te ewü ngbü emere ne, fü Me ayia awu cïnga ewü, fü ah ayia atima Yesu Kurisito, teka aküwa ewü. Te di bala, te nih le ngü ka Miri ka-nih Yesu Kurisito eyi la, Me ena adu aceka nih baka züka wü kpara ka-ye. Fü engu aküwa nih fï mere badi.

will be added

X\