Rüma 3

1Amba nih tï eyi awu, gü ba, ngü ka wü di enga Yïsarayele fa ngü ka wü ganzi kpara eyi. 2Angü de-a wü di enga Yïsarayele, a de gina nguwa wü kpara, ta te Me sere ngü ka-ye fü a gbü Ngari ye. 3Ah fanü, wü gara wü di enga Yïsarayele la le ngü ka Me de, amba yi mere e afï, gü ba, Me ena ace ewü ʼburu ace, teka ngü ka wü bu wü, la de. Me tï ace ewü ʼburu ʼburu de, angü wüh de wü vüngüte kaka. 4Te di bala, Me ngbü fï bü emere wü ngü te engu ngbü emala. Ah tï afü ngü ka-ye, baka nda wü kpara füh kotö ne, te ewü ngbü esutu wu ne, nda de. Angü Miri Davidi ba ta ngü la eyi gbü Ngari Me, gü ba, "Wayi bala Me, gbü wü ngü ka-mü, te mü ngbü emala ʼburu, mü su wu nda-mü de, mü ngbü emere ngü la te bala. Kükürü de, angü, te mü kolo ngü ka wü kpara la, wü kpara ʼburu ena awu, gü ba, mü kolo ngü la eyi mbi reke areke." 5Gara kpara tï eyi amala, gü ba, "Te ni mere siti ngü la, ngü la tï eyi asere fü wü kpara, gü ba, Me ka-ye de züka kpara duu me-ye. Te di bala, Me ena ato kuru te ni teka ngü la, neh teka ne?" 6Dela, ah de töndö ngü de? Me de kpara te ngbü ekolo ngü ka wü kpara ʼburu ereke areke. Teka ngü la, Me tï eyi ato kuru te nih, teka dürü ngü ka-nih. 7Gara kpara ena aga yïkï, gü ba, "Te wü kpara di ngbü egbo nga ïrï Me, teka siti ngü te ni ngbü emere ne la, Me ena adu ato kuru te ni, teka siti ngü la, neh teka ne?" 8Ngü la, ah ge baka e te wüh ga, nih tï eyi adi emere siti ngü, angü züka ngü ena akoro gbü ngü ka-nih la, fü wü kpara adu agbo nga ïrï Me, teka wü siti ngü te ni ngbü emere la. Dela ne töndö ngü ne? Wü gara kpara ngbü esiti ïrï a, gü ba, a ngbü kpah cu emala ngü bala me-a. Dela mere siti wu. Me ena ato kuru te mene wü kpara, te ewü ngbü emala ngü de bala ne, te gara. 9Wü gara ngbü efï nda-wü, gü ba, ngü ka-ani, wü di enga Yïsarayele, reke fa nda nguwa gara wü kpara. Amba ah bala de. Angü wü kpara füh kotö ne ʼburu ngbü emere siti ngü. Te di bala Me ena ato kuru te wü siti wü kpara la ʼburu, kpah baka ngü te ma mala fü yi la. Anga wüh de wü di enga Yïsarayele, anga nguwa ganzi wü kpara. 10Ah kpah baka ngü ta te wüh ba gbü Ngari Me gügü, gü ba, "Kpara biringbö, te ngbü emere züka ngü gbü jia Me, nda kü ma. 11Kpara biringbö te ngü ka Me rï eyi gbü nzönzö na mbi mbi mbi, nda ma. Kpara te to te-ye adi emere ngü ka Me de maguma ye ʼburu ʼburu, nda kpah ma. 12Wü kpara ʼburu ce ngü ka Me eyi. Wüh fü te-wü eyi ʼburu emere bi siti ngü gbü jia Me. Kpara biringbö te ngbü emere züka ngü nda ma. 13Wü ngü te wüh ngbü emala, ngbü esere nga siti ngü ka-ewü, te ewü ngbü efï, angü ngü ka-ewü la koro eyi baka zizi e, te sese ngbü efu afu. Wüh ngbü fï bü esu wu, da edi ngü te wü bu wü, kpah da emala wü gara kpeke ngü, te ngbü ecuru wü bu wü, baka kpürü, te ngbü ede kpara me-ye. 14Bi lara ngü sibi gömö ewü fa sü, angü wüh ngbü fï bü esoko wü bu wü, da esiri ewü. Fü ngü la angbü eto cïnga emaguma wü bu wü la efa sü. 15Maguma ewü ngbü enzu kere kere, fü ewü angbü emörö kpara teka siti maguma wü la. 16Gbü wü sü ʼburu te ewü ngbü ekoro tete, wüh ngbü fï bü eto cïnga te wü bu wü. 17Wüh le züka ngü, te ngbü eto gu ngü ne, nda-wü de. 18Wüh le ngü ka Me ʼburu ʼburu de. Wüh kpe cürü Me kpah de." Dela ngü te wüh ba gbü Ngari Me, teka wü kpara te ewü ngbü emere siti ngü de bala ne. 19Wü di enga wüna, dela ngü te ma le amala fü yi, gü ba, kpara biringbö, te di züka kpara gbü jia Me, nda ma. De-a, wü di enga Yïsarayele, ah le de a wu awu, gü ba, a kpah de siti wü kpara, Me ena ato kuru te a kpah ato teka siti ngü ka-a, angü Ngari Me mala bala. Te di bala, kpara biringbö füh kotö sene, te ena aga yïkï, nda ma. Angü Me ena ato kuru te wü kpara füh kotö ne ʼburu, anga ah ena adi de wü di enga Yïsarayele, anga wü ganzi kpara. 20Kpara biringbö ladü te ngbü emere wü Rïrï ka Me la ʼburu ereke areke fanü? Kpara te mere ngü la bala nda kü ma! Angü kpara biringbö te to tadu te Me gbü ngü ka Rïrï la nda kü ma! Amba Rïrï ka Me la ngbü esere fü nih, nga wü siti ngü, de te nih ngbü emere ne. 21Wü di enga wüna, Me fï nga kaje, te ngü ka-nih ena akoro tete mbi gbü jia ni Me, ne eyi cu me-ye. Enatikine, Me sere ngü la eyi fü nih. Ah de ngü ka rïrï nda de. Ah ka-ye de ngü te Me reke me-ye, baka ngü ta te wü mürü dofo ba gbü Ngari Me gügü. Ngü la, ah ka-ye de ngü ka Yesu Kurisito, te ena aküwa wü kpara me-ye. Angü te mü to maguma mü eyi fü Yesu Kurisito la, Me ena aceka mü baka züka kpara ka-ye tete, anga mü de enga Yïsarayele, anga mü de ganzi kpara. Te di bala, Me tï afüwa a, zu wü di enga Yïsarayele ne, nda kpah de, 23angü a ngbü kpah emere siti ngü baka gara wü kpara füh kotö ne ʼburu. Angü züka kpara biringbö, te di mbi gbü jia Me, nda ma. 24Amba Me de mürü züka maguma, te le wü kpara fa sü. Fü engu ayia afa wü kpara gbü siti ngü ka-ewü, teka ngü ka Yesu Kurisito. 25Angü Me tima Yesu Kurisito füh kotö sene, fü ah akpi teka areke ngü esüka nih de wü ye. Mene wü kpara te ewü ena ato maguma wü fü Yesu, Me ena aboro siti ngü ka-ewü. Dene eyi mene kaje te kpara ena akoro tete na mbi gbü jia Me. Te kpo ta gügü, zalü akoro enatikine, Me ngbü engbü de gu maguma ye, teka ngü ka siti ngü ka wü kpara. Ah le ato kuru te wü kpara kere la de. Yi ngbü efï, gü ba, Me wu wü siti ngü ka-ani de? Ah bala de. Me de züka miri, te ngbü emere zu ngü. Engu wu da eye süka ngü ka wü kpara mbi mbi mbi ne kpo. Ngü te engu le ato kuru te nih kere de ne, angü engu ce la lakï fü nih, teka fü nih afü maguma nih, fü nih aküwa. Tïtïne, dene eyi züka kaje te Me sere, teka areke ngü di esüka nih de wü ye. Angü Yesu Kurisito kpi eyi, teka afa nih gbü siti ngü ka-nih, de ngüte ye te tökö ne. Te nih to maguma nih eyi fefe na la, nih ena aküwa. Dela ngü te ngbü esere, gü ba, Me de kpara te wu da eye süka ngü ka wü kpara ʼburu mbi mbi mbi ne. 27Te di bala ne, te Me ngbü eceka nih baka züka kpara, ʼduwa teka ngü ka Yesu la, mü ena acu ngü mü, gü ba, ni de kpeke kpara, neh baye baye? Mü ngbü efï, gü ba, Me ngbü ele ni, teka züka ngü te ni ngbü emere ne? Ah bala de! Ngü ka-nih reke gbü jia Me, bü teka te nih to maguma nih eyi fü Yesu Kurisito. 28Ngü ka-nih koro gbü jia Me mbi, neh teka ne? Anga ah teka te nih ngbü emere wü Rïrï, ta te Müse ba gbü Ngari Me ne? Ah bala kpah de! Ngü ka-nih koro gbü jia Me ʼbe, nzö teka te nih to maguma nih eyi fü Yesu Kurisito. 29Fïngangü ka-yi gü ba, Me ngbü ele ka-ye bü nzö wü di enga Yïsarayele? Ah bala de! Me ngbü ele nguwa wü kpara füh kotö ne ʼburu. 30Me ka-ye kü biringbö. Kaje te kpara ena aküwa tete na, ka-ye kpah ngbee biringbö, ʼduwa te kpara to maguma ye eyi fü Yesu la. Ngü ma, te ah de enga Yïsarayele, anga ganzi kpara. 31Fïngangü ka wü gara kpara gü ba, nih, wü kpara ka Yesu, ngbü eceka Rïrï ka Me, ta te engu to gömö Müse ne, baka töndö ngü. Amba ah bala de! Tïtïne, baka te nih to maguma nih eyi fü Yesu Kurisito ne, nih wu si-ngü gbü Rïrï ka Me la eyi fanü.

will be added

X\