Ngü te sere te-ye 9

1Fütanga gba ka mere lu la, fü eʼbuʼburuve malayïka la ayia kpah au nda-ye kono. Fü ra ayia awu gara malayïka, te ngbü eci aci baka küfara, te yia kpa gbü kpï kpala, tï kpa füh kotö kpakine bü ciii! Fü Me ayia ato mafüta fefe, teka de ah ü komö mere siti du di. 2Te malayïka la nü ü komö mere siti du la, fü mere nguwa ayia akoro gbügbü ʼduwa ʼdiii bala! Ah ngbü baka nguwa ndi la. Fü sü abïrï ka nguwa la, atï angbü ʼduwa mbiri mbiri! Ra du sü tïne kpah de. 3Fü ra ayia awu mere bi wü e baka wü mbïra, te ewü ngbü ekoro gbü mere nguwa la. Fü Me ato wazi fü wü e la, de wüh di etütü wü kpara atütü, baka dira la. 4Fü malayïka la ayia ato rïrï fü wü e la, gü ba, "Wü mere e asiti wü fu-e, de wü gü, de wü rü nda-wü de. Wü mere e ato cïnga te wü kpara ka Me kpah de. Amba tima ka-wü bü nzö teka adi eto kuru te wü kpara, de te wüh ba tere ka Me eraku ewü de ne, angü wüh le ngü ka Me nda-wü de. 5Wü to bü kuru te ewü, ace ewü bala. Wü mere e amörö ewü amörö ne de. Wü mere ngü la bala teka wü fe ʼburuve." Te wü e la ngbü etütü wü kpara la bala, fü nganga angbü ekeke esiti, baka nga dira la. 6Fü wü kpara la angbü eyo kpi, ka gü keke ka wü e, de te ngbü etütü ewü la, amba wüh tï akpi nda-wü de. Fü wü e la angbü embü ewü bala teka wü fe ʼburuve. 7Wü mbïra la gegere ngbü baka wü siti nü, de te wüh reke te-wü, ngbü nzo teka amere gü. Nzö ewü diki ngbü ʼburu nzeee bala. Gbüra ewü ge baka gbüra kpara la. 8Fü kala su-nzö ewü angbü ʼduwa biya biya bala. Fü te ewü agegere ʼburu cögbörö baka te kami la. 9Baga ewü mere kpeke baka se la. Te wüh ngbü endondoro la, giri mbula ewü ngbü ewü rurrru, baka giri wü arabïya ka gü, te ewü ngbü ekpo me-wü. 10Wüh ngbü etü wü kpara de so wü baka dira, te ngbü etü kpara me-ye la. Fü ewü akpo angbü eto mere cïnga te wü kpara bala, teka wü fe ʼburuve. 11Miri ka-ewü ladü, te ngbü eto rïrï fü ewü. Ah de siti malayïka ka mere du. Ïïrï na de E-siti-e. 12Dela la mba gina cïnga te Me ena ato te wü kpara füh kotö ne. Amba du wü cïnga ʼbasu la ladü te koro la de. 13Fütanga ngü la, fü gara malayïka ayia au kpah nda-ye kono. Fü ra ayia aje ri kpara, te wü koro gbü cangalï, te di engagira kpökpö ka Me ne. 14Fü ri kpara la angbü emala ngü fü malayïka de tïne, te u kono ne, gü ba, "Ye nü enü kpa era mere ngu de ïrï ye Efürata ne, de ye furu wü malayïka de bala (4), de te wüh i ewü ce de kpala ne, teka de wüh kpo de tima ka-wü." 15Fü malayïka la ayia anü agbü Efürata, afuru wü malayïka, te wüh i ewü de kpala, teka de wüh nü amömörö wü kpara, te ewü le ngü ka Me de, gbü gara faka sü füh kotö ne. Angü wü malayïka de bala la, wüh ngbü fï bü ecï nga sïkpï, te Me fe fü ewü, te ewü ena akpo de tima la tete. 16Wü malayïka de bala la, wüh de mere bi wü marajümïya sidi nga wü gbe gbe gbe, baka wü mbüwü la. Wüh ngbü to ʼburu bongo se gbü baga wü. Nda wü gara didiki baka wa, nda wü gara bïbïrï baka nguwa la, nda wü gara nda-ye waaa baka küte kami la. Fü ewü alï angbü ʼburu füh wü nü, de nzö wü baka nzö wü kami la. Wege de te ngbü ekoro gömö wü nü la ngbü baka wa, de nguwa gbü ye kpuuu! Fü se gbü nze ewü angbü efu gbiri gbiri bala! 18Fü wü nü la angbü emömörö wü kpara bü de se nguwa gömö wü la. Angü wege de te ngbü ekoro gömö ewü la, ah baka wa. Fü ewü angbü kpah emömörö wü kpara de so wü, angü so ewü ka-ye baka nzö kpürü la. Fü mere bi wü kpara, gbü gara faka sü füh kotö ne, akpi ʼburu, teka wü ngü la. 20Amba mene wü kpara, de te ewü kpi nda-wü la de ne, wüh le afü maguma wü, ace siti ngü ka-wü ne, nda-wü de. Wüh ngbü ka-wü fï bü emömörö te-wü esüka wü. Wü gara ngbü ememere nda-wü ngü ka rü, anga ngü ka wü kuwa ka-wü. Wü gara ememere nda-wü waza. Wü gara da ezizi wü e ka wü bu wü. Wüh le ace wü siti ngü ka-wü la ʼburu ʼburu de. Wü gara ngbü fï bü ememere ngü ka gele bete ngü ka faranda. Amba wü faranda la, wüh tï ale ta-ngü te kpara nda-wü kpo de. Angü wüh tï aro mö de, wüh je ngü nda-wü kpah de. Kpah bala, jia ewü ceka kpï kpah de. Wüh nü nü kpah de. Amba gbü wü ngü la ʼburu, wü kpara le ace wü lara ngü ka-wü la nda-wü ʼburu ʼburu de. Dela la bü eʼbaʼbasu cïnga, de te Me ena ato te wü kpara, de te ewü le ngü kaka de ne.

will be added

X\