Ngü te sere te-ye 8

1Fütanga ngü la, fü Yesu ayia afuru adu ku te köcökpa la. Fü wü kpara agbü kpï la ayia anga ʼduwa ngbiii! Ngü la yiri mba ayiri baka lö-ra biri. 2Fü ra ayia awu gara wü malayïka ka Me lorozi, te ewü ngbü ede kpökpö ka Me. Wüh ʼburu de wü kono esaka wü. 3Fütanga ngü la, fü gara malayïka ayia arü ede cangalï, te di engagira Me la, de gara e baka endu-fara-e esaka ye, te wüh reke gbü diki-se. Fü ewü ayia ato mere bi wü rü de züka se ye fefe, teka de ah curu füh cangalï la. Züka se-rü la, ah baka gba, de te wü kpara ka Me ngbü eku fü Me, teka de ah to kuru te wü vügü ka-ani. Fü malayïka la ayia aza züka se-rü de gbü endu-fara-e la, abu gbü wa, de te wüh deke füh cangalï la. 4Fü züka se-rü la angbü ecuru tïne de mere nguwa ye, ʼduuu! Fü sese agba sü ʼduwa truuu, bala. Fü se rü la afu akoro kpaka Me, kpah baka gba ka wü kpara ka Me, de te ewü ngbü eku fefe na füh kotö ne. 5Fü malayïka la ayia aza endu-fara-e esaka ye la, akö wü nye-wa de füh cangalï la gbügbü gbe. Fü ah aza nye-wa la, amoko mbïïï! kpa füh kotö kpakine. Fü mügbara angbü esüsürü tïne ʼduwa ngbee! ngbee! ngbee! kpah de wü ülele mini. Fü yiki-tö akpo kpah da emere te-ye. 6Fütanga ngü la, fü wü malayïka de lorozi la ayia areke te-wü, teka au kono ka-wü, te ena asere nga wü cïnga, de te Me ena ato te wü kpara füh kotö ne. 7Fü gina malayïka la ayia au kono ka-ye. Fü mere bi wü timiri akpo angbü egügürü füh kotö ne, de wa gbü ye, te diki baka ngüte la. Fü wa la akpo angbü ecuru sü füh kotö ne, enü di bü hawuu bala! Fü gara faka sü füh kotö ne ayia acuru, de wü yi gü, de wü rü gbü ye ʼburu. 8Fütanga ngü la, fü eʼbaʼbasu malayïka la ayia au nda-ye kono. Fü ra awu gara mere siti da bane, te ngbü ecuru, te yia tï kpa etü mere yï-ngu. Fü faka mere yï-ngu la ayia asiti, afü te-ye akoro didiki baka ngüte. 9Fü wü si de wü nü ka ngu, te ewü di gbü faka sü la, ayia akpi kpah le ʼburu. Kpah bala, wü zabu, te ewü di gbü faka sü la, ayia asiti kpah ʼburu. 10Fütanga ngü la, fü ebabata malayïka la ayia au kpah nda-ye kono. Fü ra awu mere küfara, te ngbü eci ʼduwa ngbööö, baka te-wa la. Fü mere küfara la ayia kpa tikpi kpala, ayere, atï kpa füh kotö kpakine ngbiii! Fü küfara la asiti mere bi wü ngu afa sü. Fü wü gara faka ngu gbü sü la, de wü jürü ze, de wü du-kpa-ngu, asiti ʼburu, ayia akoro süsü. Fü wü kpara agü ïrï te küfara la, gü ba, Sü-e. Fü mere bi wü kpara, te ewü nzö ngu la, ayia akpi ʼburu, angü ngu la ka-ye süsü. 12Fütanga ngü la, fü ebabala malayïka la ayia kpah au nda-ye kono. Fü ra awu wü ra ake fe, de wü küfara ʼburu, te ewü kpo ngbü esiti. Wüh du ci tïne mbi mbi, baka te enga gina ne, de. Teka ngü la, ra sü de, fü sü atï angbü ʼduwa mbirrri! teka wü lö-ra bala. Kpah bala, gbü biti, wü fe de wü küfara ci de, teka lö-ra bala. Ngü la ngbü mere te-ye bala te nga wü sïkpï ʼburu. 13Fütanga ngü la, fü ra ayia awu mere lu baka kpukpu la. Fü lu la ayia angbü endondoro tikpi, da eku gba de mere ri ye, gü ba dene, "Cïnga! Cïnga ba! Dela ne cïnga ne, te ena amaka wü kpara füh kotö ne! Angü wü gara malayïka de bata ne, wüh u nda-wü kono la de. Te wüh u nda-wü kono tïne eyi la, wü kpara ena amere tïne baye? Angü nda-wü cïnga, de te ewü ena ato ne, ena afa tïne sü!"

will be added

X\