Ngü te sere te-ye 7

1Fütanga ngü la, fü ra ayia afü jia ra bane de, gbo! te wü malayïka ka Me bala (4), te ewü ngbü edebu sü bala (4) ka kotö ne biri biri ʼburu. Me to wazi fü ewü eyi, de wüh zoro wü siti wege esaka wü gö gö gö! angü wege la ena asiti wü e füh kotö ne. 2Fü ra ayia awu gara malayïka te koro tongo kpa fügö. Ah za e, te Me ngbü eba tere di, esaka ye. Fü malayïka la ayia amala ngü de mere ri ye, fü wü mene malayïka bala, de wege esaka wü ne, 3gü ba, "De-wü deyï, wü zoro wege la esaka wü gö! Angü ah le de ani ba la tere eraku wü kpara ka Me, de te ewü to maguma wü eyi fü Me ne, feke. Te ani ba tere eraku ewü nza eyi la, de wü du, wü ce kpa te wege la, teka fü ah akpo tïne eto cïnga te wü e füh kotö ne." 4Fü ewü akpo da etanga wü kpara ka Me, te ewü ena aba tere eraku ewü ne ʼburu. Wü di enga Yïsarayele la ta ʼburu baka wü kpara kutu kama biri teke ʼbasu de füh ye bala (144,000). 5Wüh ngbü ba tere eraku wü kpara kutu nzükpa de füh ye ʼbasu (12,000), gbü nguwa wü kundu ye Yïsarayele la biri biri ʼburu. Gbü nguwa Yuda, kutu nzükpa de füh ye ʼbasu (12,000). Gbü nguwa Rübena kutu nzükpa de füh ye ʼbasu (12,000). Gbü nguwa Gada kutu nzükpa de füh ye ʼbasu (12,000). 6Gbü nguwa Asera kutu nzükpa de füh ye ʼbasu (12,000). Gbü nguwa Nafatalï kutu nzükpa de füh ye ʼbasu (12,000). Gbü nguwa Manase kutu nzükpa de füh ye ʼbasu (12,000). 7Gbü nguwa Sïmïyona kutu nzükpa de füh ye ʼbasu (12,000). Gbü nguwa Levi kutu nzükpa de füh ye ʼbasu (12,000). Gbü nguwa Yïsakara, kutu nzükpa de füh ye ʼbasu (12,000). 8Gbü nguwa Zebulona, kutu nzükpa de füh ye ʼbasu (12,000). Gbü nguwa Yüsefa kutu nzükpa de füh ye ʼbasu (12,000). Gbü nguwa Benzamina wü kpara kpah kutu nzükpa de füh ye ʼbasu (12,000). Dela ʼburu nguwa wü Yïsarayele, te wüh ena aba tere la eraku ewü. 9Fütanga ngü la, fü ra ayia afü jia ra, awu kpah mere bi wü kpara, te ewü sibi fa sü, te wüh tï atanga, anza de. Wü kpara la, wüh ʼburu de wü kpara ka Me, te ewü koro gbü nguwa wü kpara, te nga wü sü de füh kotö ne biri biri ʼburu. Wüh to ʼburu züka bu bongo eküte wü, ngboro ngboro bala. Wüh za kpah wü kpa mbïra esaka wü, teka asere tadu emaguma wü di. Fü ewü arü ʼburu tikpi engagira kpökpö ka Me, ake Yesu Kurisito, Kambiliki ka Me. 10Fü wü kpara la akpo angbü ebï ci, da emï koko, da etü karayi de mere ri wü kpa tikpi, gü ba, "Nih gbo nga ïrï Me! Angü ah küwa nih eyi me-ye! Nih gbo nga ïrï Yesu, Kambiliki ka Me! Angü engu küwa nih eyi me-ye!" 11Teka ngü la, fü mere bi wü malayïka, de te ewü ngbü ede kpökpö ka Me la, de wü mere kovo teke biri de füh ye bala ne, abe kpah te mene wü angbe cögbörö malayïka bala ne ayia aci ʼburu, atï kötö engagira Me, da egbo nga ïïrï na, gü ba, 12"Wayi, ah di bala! Nih gbo nga ïrï Me! Ah le de wü kpara ʼburu di egbo nga ïrï Me! Angü wawazi na fa nda wü kpara ʼburu! Wayi, nih gbo nga ïrï Me! Angü, engu wu ngü ʼburu! Nih gbo nga ïrï Me fï mere badi! Ah di bala!" 13Fütanga ngü la, fü gara kpara biringbö, esüka wü mere kovo la, ayia amala ngü fere, gü ba, "De-ra deyï, ma wu sü te wü kpara, de te ewü to züka bu bongo te wü la, koro tete na ne eyi? Wüh neh wü da?" 14Fü ra ayia alügü ngü fefe, gü ba, "Akoo, mere kpara, ma ena awu ngü la, neh baye baye? Ye wu ngü ka-ewü ka-ye bü me-ye. Ah le de ye sere ngü la fere." Mere kovo la gü ba, "Wü kpara la, wüh de wü kpara ka Yesu, de te wü vügü ka-ewü ngbü ta eto cïnga te ewü efa sü ne. Amba wüh ce ngü ka Yesu nda-wü ta de. Wüh ngbü rü ta fï bü kpekpeke gbü wü cïnga ka-wü. Te di bala, wüh zürü siti ngü ka-wü eyi de ngüte Yesu, Kambiliki ka Me ne. Teka ngü la, fü bongo ka-ewü avi, angbü kpïlïlï de bala! 15Te di bala, dela si-ngü, te wüh rü ngbü ede kpökpö ka Me, fï mere badi ne. Wüh ngbü engbü kpa esambü ka Me, da egbo nga ïïrï na, biti de ra mini. Me ena adi eceka kpï fütanga ewü me-ye, da eto wazi fü ewü. 16Tala tï amere wü kpara la tïne de. Gümü ngu tï amere ewü kpah de. Anga ra tï acuru ewü ne kpah de. Cïnga tï adu amere ewü tïne de. 17Miri Yesu ena angbü eceka kpï fütanga ewü me-ye, baka kpara te ngbü eceka kpï fütanga wü kambiliki ka-ye. Ah ena angbü eza ewü, enü di kpa esa bïrï, teka fü ewü angbü enzö züka gu ngu kpala. Fü ewü angbü ka-wü tïne ezükü agbü kpï, fï mere badi. Me ena akö ngura gbü jia ewü ʼburu ʼburu asidi, angü Me le ewü fa sü!" Dela ngü te ma wu cu de jia ra, teka wü kpara ka Me, te ewü di agbü kpï ne.

will be added

X\