Ngü te sere te-ye 5

1Fütanga ngü la, fü ra ayia awu köcökpa, te Me gara za o esaka ye. Wüh i komö köcökpa la de wü ku lorozi. Fü ewü alala komö wü ku la de e baka biküʼda. Fü ewü adu agbo wü tere fefeh biri biri ʼburu, teka wü kpara ena afuru atanga. Köcökpa la, wüh ba wü ngü gbügbü, zalü koro di ekükürüfe ʼburu. 2Fü ra awu gara mere kpeke malayïka, te ngbü emala ngü de mere ri ye, gü ba, "Züka kpara te Me fe engu, teka afuru köcökpa ne, atanga, neh da?" 3Fü wü malayïka akpo egïrï kpeke kpara, te tï afuru köcökpa ne, atanga. Fü ewü agïrï agbü kpï ma, wüh maka de. Wüh du gïrï füh kotö sene, kpah bima, wüh maka de. Fü ewü adu agïrï kpa esa tö, kpah le bima, wüh maka ʼburu ʼburu de. 4Fü ngü la ato mere cïnga emaguma ra. Fü ra akpo eku gba de ngura, angü kpara te tï afuru köcökpa la nda ma. 5Fütanga ngü la, fü gara mere kpara, esüka wü mere kovo teke biri de füh ye bala la, ayia amala ngü fere, gü ba, "De-ra deyï, ma mere e aku gba de. Yesu ladü. Engu de Mere Miri ka wü di enga Yïsarayele. Engu de kundu ye Miri Davidi, te Me tima teka aküwa wü kpara. Wawazi na baka nda kami, angü ah fa wazi kpi eyi. Me to wazi eyi fefe, teka fü engu afuru köcökpa ne me-ye, atanga." 6Te ma je ngü la bala, fü ra ayia ae jia ra, awu Yesu, te ngbü baka Kambiliki ka Me, de nga ka eküte ye, angü wüh mörö engu, teka areke ngü te di ezengba wü kpara de wü Me. Yesu rü ngbü ede kpökpö ka Me, etü wü angbe cögbörö malayïka bala, be kpah te wü mere kovo teke biri de füh ye bala ne. Ah ngbü baka Kambiliki ka Me, de wü di te nzö ye lorozi, kpah de wü jia ye lorozi. Wü di de wü jia Yesu lorozi la, wüh ngbü esere ngü ka wazi ka Nzïla Wazi Me, te di kpah lorozi ne. Wü wazi de lorozi la, Me tima teka amere wü tima ka-ye di, te nga wü sü füh kotö ne ʼburu. 7Fü Yesu ayia aza köcökpa la esaka Me, teka atanga. 8Te wü angbe cögbörö malayïka bala, de wü mere kovo la, wu Yesu, te za köcökpa la esaka Me ne, fü ewü angbü de mere tadu. Fü ewü aci ʼburu atï kötö eri lö Yesu, da egbo nga ïïrï na. Wü kovo la, wüh ʼburu de wü kuʼdu esaka wü, kpah de wü sila, te wüh mere gbü diki-se, de rü gbü ye, te wüh ngbü ecuru de züka se ye. Si-ngü teka züka se-rü la gü ba, ah de gba, te wü kpara ka Me ngbü eku fü Me, teka de Me küwa ani esaka wü vügü ka-ani. 9Fü wü kovo la ayia aza wü kuʼdu ka-wü la, akpo da emï to ci, da ebï, gü ba, "Wayi bala, Yesu! Mü de Kambiliki ka Me! A ngbü egbo nga ïrï mü! Mü me-mü de züka kpara gbü jia Me! Me to köcökpa ka-ye ne eyi esaka mü. Mü tï eyi afuru köcökpa la, atanga. A ngbü egbo nga ïrï mü! Angü mü to te-mü akpi, teka aküwa wü kpara de ngüte mü. A ngbü egbo nga ïrï mü! Angü mü küwa wü nguwa wü kpara füh kotö ne eyi ʼburu, teka fü ewü akoro wü di Me. 10A ngbü egbo nga ïrï mü! Angü mü o wü kpara ka-mü baka wü miri, gbü nzö wü kpara füh kotö ne ʼburu. Mü o wü kpara ka-mü baka wü kovo, teka fü ewü agbo nga ïrï Me agbü sü kaka agbü kpï fï mere badi." 11Fütanga ngü la, fü ra ayia, ae jia ra, awu mere bi wü malayïka ka Me, gbe gbe gbe! te ewü rü ngbü ede kpökpö ka Me. 12Fü ewü angbü ebï ci de mere ri wü, de wü koko, de wü karayi, gü ba, "Nih gbo nga ïrï Yesu, Angü ah kpi ta teka aküwa wü kpara. Nih gbo nga ïrï Yesu, Angü ngü kaka reke gbü jia Me fa sü. Nih gbo nga ïrï Yesu, Angü wawazi na fa nda wü kpara ʼburu. Nih gbo nga ïrï Yesu, Angü engu de mürü wü e füh kotö ne ʼburu. Nih gbo nga ïrï Yesu, Angü ah wu wü ngü ʼburu. Nih gbo nga ïrï Yesu! Ah le de wü kpara ʼburu di egbo nga ïïrï na! Nih gbo nga ïrï Yesu! Ah le de wü kpara ʼburu je rïrï kaka! Nih gbo nga ïrï Yesu! Ah le de wü kpara ʼburu di ecu ngüngü!" 13Te ngü la mere te-ye bala, fü wü kpara ʼburu, mene ewü te ewü di agbü kpï, de wü mene füh kotö, bete wü mene wü kpara te ewü kpi eyi ne, fü ewü akpo ʼburu ebï ci, de wü koko de wü karayi, gü ba, "Nih gbo nga ïrï Me! Nih gbo kpah nga ïrï Kambiliki ka Me. Angü wazi ewü fa sü! Nih gbo nga ïrï ewü fï mere badi! Nih gbo nga ïrï Me! Nih gbo kpah nga ïrï Kambiliki ka Me!" 14Fü wü angbe cögbörö malayïka de bala ne, ayia agbo nga ïrï Me de mere ri wü kpa tikpi, gü ba, "Ah di bala!" Fü wü mere kovo teke biri de füh ye bala ne ayia atï kötö, angbü ecu ngü Me, ake Miri Yesu.

will be added

X\